وسىنداي ىزگى نيەتتى جاس تولقىننىڭ بويىنان بايقاعان كەزدە ءۇمىت وتى لاۋلاي جاناتىنى بار. ولاردىڭ جان جىلۋى «جامان تۇماۋدىڭ» جان اۋىرتار قاتىگەز كورىنىسىن جىبىتە تۇسكەندەي. جالپاق الەمدى جان القىمنان العان دەرت سالماعىن قوعامداسا كوتەرىپ, كومەك قاجەت ەتكەندەرگە قول ۇشىن بەرۋدى ادامگەرشىلىكتىڭ اسىل كورىنىسى دەسەك تە ابدەن بولادى.
وبلىس – ايعا جۋىق «قىزىل ايماق» ساناتىندا. داۋاسىز دەرت كۇننەن-كۇنگە ءورشىپ, ۇدەپ بارادى. العاشقى بەتتە ءۇرپيىپ قاراعان, ۇركىپ بويىن جيناعان حالىق بۇل كۇندە بوسبەلبەۋ كۇيگە تۇسكەنىن دە جاسىرۋعا بولماس. ىندەتتىڭ جان جابىرقاتار وقيعالارى باسىلماسا دا, بوي ۇيرەنگەندەي. بالكىم سودان با ەكەن, سوڭعى ۋاقىتتا ساقتاندىرۋ ءتارتىبىن بۇزاتىندار جيىلەپ كەتتى. وتكەن اپتادا وبلىستا كارانتين رەجىمىن بۇزا وتىرىپ, كوپشىلىك شارالار وتكىزىلگەنى انىقتالدى. وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە, تسەلينوگراد اۋدانىنىڭ قابانباي باتىر اۋىلىندا مونيتورينگتىك توپ كارانتين رەجىمىن بۇزعانداردى اشكەرە ەتتى. اۋىلداعى اعايىن «جامان تۇماۋ» جاعادان الىپ جاتقاندا 80 ادامنىڭ قاتىسۋىمەن 70 جىلدىق مەرەيتوي ۇيىمداستىرىپتى. مونيتورينگتىك توپ كوكشەتاۋ قالاسىنداعى «التىن شاڭىراق» قوناقۇي كەشەنىندە ۇيلەنۋ تويى وتكىزىلگەنىن انىقتادى. بۇل كەشەن كارانتيندىك تالاپتاردى ەلەمەي, جاپپاي ءىس-شارالار وتكىزىپ تۇرادى ەكەن. ءتورت مارتە اكىمشىلىك جاۋاپكەرشىلىككە تارتىلىپتى. سونداي-اق وبلىس ورتالىعىنداعى «حان سارايى» مەيرامحاناسىندا «تيولاين» سەرىكتەستىگى 200 ادامنىڭ قاتىسۋىمەن كورپوراتيۆتىك ءىس-شارا ۇيىمداستىرعان. ءتارتىپ بۇزعاندارعا اكىمشىلىك شارا قولدانىلادى.
جاعداي وسىلاي قالىپتاسىپ تۇرعاندا «قىزىل ايماق» ساناتىنان شىعۋ ازىرگە مۇمكىن ەمەستەي. ەشبىر جاۋاپكەرشىلىكتى سەزىنبەي, تاباننان تاۋسىلىپ توي سوڭىندا جۇرگەندەر وزدەرىن عانا ەمەس, جالپاق جۇرتتىڭ باسىن قاتەرگە تىگىپ وتىرعانىن اڭعارا دا قويمايتىن شىعار.
ال سانالى جاستار, ەلىمنىڭ كەلەشەگى, جۇرتىمنىڭ اماندىعى دەيتۇعىن كەيىنگى تولقىن بار اۋىرتپالىقتى تولايىم كوتەرۋگە اتسالىسۋدا. ماسەلەن, شوقان ءۋاليحانوۆ اتىنداعى كوكشەتاۋ ۋنيۆەرسيتەتىنىڭ وقىتۋشىسى, «امانات» ۆولونتەرلەر ورتالىعىنىڭ جەتەكشىسى, قالالىق ىسكەر ايەلدەر اسسوتسياتسياسىنىڭ بەلسەندى مۇشەسى ايجان قۇسايىنوۆا باستاعان جاستار قاۋلاعان قارا ورتكە قاناتىمەن سۋ سەپكەن قارلىعاشتاي شىرىلداپ ءجۇر. ايجاننىڭ جان-دۇنيەسىن جاقسى بىلەتىن قۇربىلارىنىڭ ايتۋىنا قاراعاندا, ول – كىشكەنتايىنان قول قۋسىرىپ قاراپ وتىرا المايتىن ەلگەزەك, قايىرىمدى ادام. وزىمەن تىلدەسكەندە جۇرەك قالاۋى تۋرالى اعىنان جارىلدى.
– مەنەن تانىستارىم كىم ءۇشىن, نە ءۇشىن جانتالاسىپ ءجۇرسىڭ دەپ تە سۇرايدى. اسىلىندا مۇنداي ساۋال قويۋ دا قيسىنسىز. جاناشىرلىقتى اركىم دە جاساۋى ءتيىس. ءبىز ەشقاشان قايىرىمدى بولۋدان قاشپاۋىمىز كەرەك. ەگەر جان-جاعىمىزدا قايىرىمدى ادامدار قاپتاپ جۇرسە, ولار جاتقا جىلۋىن سىيلاسا, جىلاعان بالانى ۋاتىپ, ومىردەن تۇڭىلگەن جاننىڭ ءۇمىت وتىن لاۋلاتسا, عانيبەت ەمەس پە؟! – دەيدى ا.قۇسايىنوۆا.
ايجاننىڭ تۇسىنىگىنشە, كومەكتەسۋ دەگەنىڭىز تەك قانا ماتەريالدىق تۇرعىدان دەمەۋ ەمەس ەكەن, كەي-كەيدە ءبىر اۋىز جىلى ءسوزدىڭ ءوزى دەرت مەڭدەگەن ادامنىڭ الپىس ەكى تامىرىنداعى قاندى ويناتىپ, سەنىم شىراعىن قولامتانىڭ شوعىنداي مازداتىپ جىبەرۋى ابدەن مۇمكىن.
«امانات» ۆولونتەرلەر ورتالىعىندا 60-تان اسا بەلسەندى جاس بار. ولاردىڭ ارقايسىسى ءوزارا اقىلداسا كەلە, جۇمىس اۋقىمىن بەلگىلەپ, ىستەيتىن شارۋاسىن قاجەتتىلىگىنە وراي ىڭعايلاپ وتىرادى. ارمان-مۇراتتارى ءبىر ارنادا توعىسقان بەلسەندى جاستاردىڭ باستى ماقساتى – جاس تولقىندى ءوز ەلىنە پايداسى تيەتىن ادام ەتۋ.
– نەگىزىندە «امانات» دەپ اتاۋدىڭ وزىندە ۇلكەن ءمان بار. ارىداعى ارۋاقتى اتا-بابامىز بىزگە ءوز بويلارىنداعى تاماشا قاسيەتتەردى اماناتتاپ كەتتى. سونىڭ ءبىرى, ءارى بىرەگەيى – تاس-ءتۇيىن بولىپ بىرىگۋ ءۇشىن ءبىر-ءبىرىن باۋىرىنا تارتىپ, جاناشىر بولۋ. بۇگىنگى جاستار سول ارىداعى اتا-بابانىڭ قانىمەن دارىعان قاسيەتتى قاستەرلەپ ۇستاۋى كەرەك. ويتكەنى ول – اتا اماناتى, – دەيدى ايجان.
جاستاردىڭ ايتۋىنا قاراعاندا, دەمەۋشى بولۋعا ۇمتىلاتىندار دا از ەمەس. الدەبىر قاجەتتىلىك تۋىنداپ قالعاندا قۇلاقتانسا بولدى, جان ۇشىرىپ جەتىپ كەلەدى. ەرىكتى جاستار «جاقسىلىق جاسا» جوباسى بويىنشا وبلىستاعى جۇزدەگەن وتباسىعا ارقيلى كيىم-كەشەك, ازىق-ت ۇلىك جەتكىزىپتى. الەۋمەتتىك جاعىنان از قامتىلعاندارعا ءدارى-دارمەك اپارعان. تۇرمىسى تومەن وتباسىلاردىڭ بالالارىن مەكتەپكە دايىنداۋعا قولۇشىن بەرگەن. قىسقا دايىندالۋعا مۇمكىندىگى جوق وتباسىلارىنا وتىن, كومىر جەتكىزگەن. بۇل ايتىپ وتىرعانىمىز – ەرىكتىلەر ورتالىعىنىڭ اتقارعان ۇلان-عايىر شارۋاسىنىڭ ءبىر پاراسى عانا. ەستىگەن جان ءسۇيسىنىپ, قام كوڭىلدىڭ رەنىشىن جادىراتار جاقسى شارۋالار ءالى دە جالعاسىن تابۋدا. الداعى ۋاقىتتا ورتالىق جاستارى الەۋمەتتىك جوبالارعا بارىنشا باسىمدىق بەرمەكشى.
وسى ءبىر ىزگى ىستەردىڭ ۇيىتقىسى بولىپ وتىرعان ايجان – ەرىكتىلەر ورتالىعىنىڭ جەتەكشىسى عانا ەمەس, ۋنيۆەرسيتەتتە تاريح ءپانىنىڭ وقىتۋشىسى. ورتالىق مۇشەلەرىنە حالقىمىزدىڭ كونە تاريحىنداعى ايرىقشا ءماندى مىسالداردى, قايىرىمدىلىق پەن جاناشىرلىق سيپاتىنداعى ىزگى قاسيەتتەردىڭ قانداي دا ءبىر قيىندىق ساتتەردە الىپ شىققانى جايىندا ايتىپ وتىرادى. ونىڭ ءوزى دە ورتالىق جاستارىن رۋحاني كەمەلدەندىرىپ, جان-دۇنيەلەرىن بايىتىپ, جاناشىرلىعى مول, قايىرىمدىلىق قاسيەتىن قانىنا سىڭىرگەن ارىستاي ازامات ەتىپ تاربيەلەۋگە ۇلكەن ىقپالى تيەتىنى ءسوزسىز.
ەرىكتى جاستار وتكەن جىلى وبلىس اكىمى ەرمەك مارجىقپاەۆتىڭ قولىنان ماراپات الدى. بۇل – ولاردىڭ مەيىرىمدى ىستەرىنە بەرىلگەن ۇلكەن باعا. ءبىر عاجابى, ورتالىق مۇشەلەرىنىڭ كوبى – تاۋەلسىزدىك قۇرداستارى. تاۋەلسىز ەلدىڭ تەكتى جاستارىنىڭ ءدال وسىنداي قايىرىمىن كوپكە تيگىزىپ, كوركەيىپ ءوسىپ كەلە جاتقانىن كورۋدىڭ, ەستۋدىڭ ءوزى – قۋانىش.
كوكشەتاۋ
