اقيىق اقىننىڭ تۋعان كۇنىنە وراي وتكەن شارادا جاستار مۇقاعالي جىرىنان شاشۋ شاشىپ, ليريكالىق اندەرىن تارتۋ ەتتى. بۇدان بولەك اقىننىڭ ولەڭدەرىن جاتقا بىلەتىن, وبلىستىڭ اتىن رەسپۋبليكا كولەمىندە تانىتىپ جۇرگەن جاس اقىندار مۇقاعاليعا ارنالعان ارناۋ ولەڭدەرىن وقىدى. ر.سەيتمەتوۆ اتىنداعى سازدى-دراما تەاترىنىڭ اكتەرى تالعات قارىنباەۆتىڭ رەجيسسەرلىگىمەن ساحنالانعان قويىلىم كوپشىلىك كوڭىلىنەن شىقتى. مۇقاعاليدىڭ جاستىق شاعى, سۇيگەن جارى لاشىنعا دەگەن ىنتىزار سەزىمى, قىزى مايگۇلدىڭ قازاسىاكەلگەن ورنى تولماس وكىنىشىن اكتەرلەر جوعارى دەڭگەيدە جەتكىزە الدى. تۋىندى «مەن ولەمىن قىرىقتىڭ بەسەۋىندە» دەپ اقىننىڭ ءوزى ايتقانداي, ءومىرىنىڭ سوڭعى كەزەڭدەرىمەن قورىتىندىلاندى.
كەشكە قاتىسقان كومپوزيتور, عالىم, جۋرناليست بەكجىگىت سەردالى, ايتىسكەر اقىن, وبلىستىق ءماسليحات دەپۋتاتى بەكارىس شويبەكوۆ, وبلىستىق قوعامدىق دامۋ باسقارماسى باسشىسىنىڭ ورىنباسارى داۋرەن ساريەۆ ۇيىمداستىرۋشىلار مەن قاتىسۋشىلارعا ايرىقشا العىسىن ءبىلدىردى. "مۇقاعالي اقىننىڭ شىعارماشىلىعى قازىرگى قازاق قوعامىندا, اسىرەسە, كەيىنگى بۋىن جاستاردىڭ اراسىندا ۇلكەن تانىمالدىلىققا يە. سونىڭ ايقىن دالەلى-بۇگىنگى ادەبي كەش. وسىنداي ءماندى, ماعىنالى كەشتەر ارقىلى اقىن شىعارماشىلىعىنىڭ ودان ءارى ناسيحاتتالىپ, ومىرشەڭ بولارىنا كامىل سەنەمىن", دەگەن داۋرەن ساريەۆ اقىننىڭ تويى جالعاسىن تاباتىندىعىن جەتكىزدى.
