قالا اكىمىنىڭ ايتۋىنشا, اسفالت توسەلۋى جانە جوندەلۋى ءتيىس جولدار بىرنەشە سانات بويىنشا تاڭدالدى. اتاپ ايتقاندا, بۇرىن اسفالت بولماعان جولدار; جاڭا اۆتوبۋس باعدارلارى ىسكە قوسىلاتىن كوشەلەر; كولىك كوپ جۇرەتىن جولدار مەن الەۋمەتتىك نىساندارعا اپاراتىن جولدار ىرىكتەپ الىندى.
«جالپى العاندا, 173 كوشەگە اسفالت توسەدىك, ولاردىڭ 100-دەن استامى تۇرعىن الاپتارىندا ورنالاسقان. بۇل جۇمىستاردى بيىل دا جالعاستىرامىز. تۇرعىن الاپتارى مەن قالانىڭ ەسكى بولىگىنە باسىمدىق بەرىلەدى», دەدى التاي كولگىنوۆ.
ونىڭ اتاپ وتۋىنشە, جول جۇمىستارىن جۇرگىزۋگە «جۇمىسپەن قامتۋدىڭ جول كارتاسى» باعدارلاماسى ءبىرشاما كومەكتەستى. ول بويىنشا 15 مىڭنان استام جۇمىس ورنى اشىلدى. ءبىرىنشى كەزەكتە قالالىقتار جۇمىسپەن قامتۋ ورتالىعى ارقىلى جۇمىسقا ورنالاستىرىلدى. سونداي-اق, بۇرىن جارىعى جوق كوشەلەرگە جارىق قوسىلدى. بۇعان قوسا, ەسكى شامدار زاماناۋي ەنەرگيا ۇنەمدەيتىن جارىقديودتى شامدارعا الماستىرىلدى.
