ول 11 جىلدان بەرى مەديتسينا سالاسىندا جۇمىس ىستەپ كەلەدى. قازىرگى تاڭدا شىمكەنت قالاسىنداعى №1 قالالىق كلينيكالىق اۋرۋحاناسىنىڭ باس دارىگەرى. التىن قولدى حيرۋرگ 600-دەن اسا ناۋقاسقا وپەراتسيا جاساعان. حيرۋرگيا باعىتىنا يننوۆاتسيالىق تەحنولوگيالاردى ەندىرىپ, ترانسپلانتولوگيا سالاسىن دامىتۋدا. ءوزى باسقارىپ وتىرعان اۋرۋحاناداعى بىلىكتى ماماندارمەن بىرگە ابىلاي ءابدىجاپپار ۇلى 2019 جىلى باۋىر ترانسپلانتاتسياسى وتاسىن 5 ساعات 48 مينۋتتا جاساپ, قازاقستاندىق رەكوردتى جاڭارتتى.
«بۇيرەگى نەمەسە باۋىرى جاراماي قالىپ, شاراسىز حالگە تۇسكەن ناۋقاستاردىڭ كوزىنەن سونگەن ءۇمىتتى بايقايمىن. سوندىقتان مۇنداي ناۋقاستاردىڭ ءومىرىن امان الىپ قالۋ ءۇشىن كۇردەلى وتا جاساپ, ۇمىتتەرىن قايتا جالعاعىم كەلەدى. ناۋقاستاردىڭ وتادان كەيىن قۋانىشتى ءجۇزىن كورىپ, ودان ءارى شابىتتانا تۇسەمىن. ءوزىم باسقارىپ وتىرعان № 1 قالالىق كلينيكالىق اۋرۋحانادا جوعارى مامانداندىرىلعان مەديتسينالىق قىزمەتتىڭ ساپاسىن ارتتىرسام دەيمىن. الدا جوسپارىم كوپ. ەڭ باستى مىندەتىم سىرقاتتانعان جاندارعا مەديتسينالىق كومەك كورسەتۋ دەپ بىلەمىن», -دەيدى ابىلاي دونباي.
بۇگىنگى كۇنگە دەيىن بىلىكتى دارىگەر جۇمىس جاسايتىن №1 قالالىق كلينيكالىق اۋرۋحاناسىندا بۇيرەك جانە باۋىر ترانسپلانتاتسياسى وتالارى ءساتتى جاسالعان. سونىمەن قاتار, مەديتسينالىق ءتۋريزمدى دامىتۋ ماقساتىندا 23 شەتەل ازاماتىنا (گەرمانيا, كانادا, يزرايل, رۋمىنيا) بۇيرەك ترانسپلانتاتسياسى جاسالعان. ودان وزگە 166-شى بۇيرەك ترانسپلانتاتسيا وتاسى ءساتتى اياقتالعان.
