نەگىزىنەن وڭىردە ەگىستىك جەرلەردى يگەرۋ باستى ماسەلەنىڭ ءبىرى. ەگىستىك جەرلەردىڭ كوبى بۇل كۇندە جەكە ادامداردىڭ قولىندا بولعاندىقتان, ونى تولىعىمەن يگەرۋ دە ءتۇرلى ماسەلە تۋىنداتادى. بۇل ورايدا, اۋداندا قازىرگى كەزدە ەگىستىك جەرلەردى يگەرۋ قولعا الىنعان. ناتيجەسىندە, جالپى 146 مىڭ 148 گەكتار ەگىستىك جەر تولىق يگەرىلگەن. ونىڭ ىشىندە 53 664 گەكتار جەرگە كۇزدىك بيداي, 58 133 گەكتارىنا جازدىق ارپا سەبىلگەن. سونىمەن قاتار بىرقاتار القاپقا جۇگەرى, ماقسارى, كوكونىس, قانت قىزىلشاسى, كارتوپ جانە وزگە دە ءونىم تۇرلەرى ەگىلگەن. اۋىل شارۋاشىلىعى سالاسىن دامىتۋ ماقساتىندا 143 تەحنيكا ساتىپ الىنىپ, ماشينا-تراكتورلار پاركى 14 پايىزعا جاڭارتىلعان.
«وبلىسقا بولىنگەن 33 جاڭبىرلاتىپ سۋارۋ قوندىرعىسىنىڭ 15-ىنە ءوتىنىم بەرىلىپ, بۇگىندە 7 قوندىرعى الىندى. ال مال قىستاتۋ ناۋقانىنا جوسپارلانعان ازىق كولەمى 100-دەن 167 پايىزعا دەيىن ارتىعىمەن ورىندالدى. بارلىق تۇرىنەن مال باسى 104,3 پايىزدان 122,4 پايىزعا دەيىن ارتتى. مال ونىمدەرىن وندىرۋدە 102,8 پايىزدان 107,7 پايىزعا دەيىن ءوسىم بولدى», دەيدى اۋدان اكىمى ەربولات سادىرقۇلوۆ.
بۇگىندە اۋداندا نەگىزىنەن مال شارۋاشىلىعى وركەندەپ كەلەدى. جىل سايىن مال باسى ارتۋدا. ماسەلەن, اۋدان كولەمىندە قازىرگى كەزدە 2 650 باس ءمۇيىزدى ءىرى-قاراعا ارنالعان – 12, 780 باس جىلقى مالىنا ارنالعان – 5, ال 3 600 باس قوي مالىنا ارنالعان 4 بورداقىلاۋ الاڭى بار. بۇل رەتتە شارۋالار دا اۋىلدارداعى مال شارۋاشىلىعىن ىلگەرىلەتۋگە ءوز ۇلەسىن قوسىپ وتىر ەكەن. «داۋلەتباي» شارۋا قوجالىعىنىڭ توراعاسى ۇمبەت ءجانادىلوۆ ءوز قوجالىعىندا 1 مىڭ باس ءمۇيىزدى ءىرى-قارا مالىن بورداقىلاۋ, مال سويۋ, ونى ساقتاۋ, توڭازىتۋ جانە مال تەرىسىن دايىنداۋ كەشەنىنىڭ قۇرىلىسىن اياقتاپتى. بۇل ءوز كەزەگىندە اۋدانداعى ءونىم كولەمىن دە ارتتىرۋعا سەرپىن بەرەتىنى ءسوزسىز. سونىمەن قاتار اۋدانداعى «شالقار» شارۋا قوجالىعى 1,5 مىڭ باسقا, «الراي» شارۋا قوجالىعى 1 مىڭ باسقا ارنالعان ءمۇيىزدى ءىرى قارا مال بورداقىلاۋ كەشەندەرىن دە ىسكە قوسقالى وتىر. سول سياقتى قۇمارىق اۋىلىنداعى «جاستار بولاشاعى» شارۋا قوجالىعى 100 باسقا ارنالعان ساۋىن سيىر فەرماسىن اعىمداعى جىلى ىسكە قوساتىن بولادى.
جامبىل وبلىسىندا وسىدان ءبىراز ۋاقىت بۇرىن «وبلىس تۇرعىندارىنىڭ تۇرمىستىق تابىسىن ارتتىرۋ» جوباسى قولعا الىنعانى بەلگىلى. بۇل ورايدا وڭىردەگى 10 اۋداننان 10 اۋىلدىق وكرۋگ تاڭدالىپ, ءتيىستى جۇمىستار باستالىپ تا كەتكەن. ءتىپتى بىرقاتار اۋىلدا جەرگىلىكتى تۇرعىندار جوبانىڭ پايداسىن دا كورىپ ۇلگەردى. اتالعان جوبا نەگىزىندە قاناتقاقتى ۇلگىدە ت.رىسقۇلوۆ اۋدانىندا 2019 جىلى «قۇمارىق-تاۋ» اۋىل شارۋاشىلىعى كووپەراتيۆى قۇرىلىپ, اۋىل شارۋاشىلىعى ونىمدەرىن وندىرۋمەن اينالىساتىن اۋلا يەلەرى مەن شارۋالار, سونداي-اق كاسىپكەرلەر انىقتالىپ, قارجى كولەمى ناقتىلانعان بولاتىن. اتالعان كووپەراتيۆ بۇگىندە جالپى قۇنى 90 ملن تەڭگەگە 17 بىرلىك اۋىل شارۋاشىلىعى تەحنيكالارى مەن ءتۇرلى قوندىرعىلاردى ليزينگ ارقىلى الىپ, كووپەراتيۆ ەنشىسىنە 17 گەكتار جەر ءبولىنىپ بەرىلگەن. ال ەندى بۇدان شىققان ناتيجە قانداي؟ بۇل رەتتە اۋدان اكىمى ە.سادىرقۇلوۆ قۇمارىق اۋىلدىق وكرۋگىنىڭ قۇمارىق, قاراكەمەر جانە العاباس اۋىلدارى قاناتقاقتى جوباعا قاتىسىپ, اۋىل حالقى 5 باعىت بويىنشا بۇگىنگى تاڭدا جالپى قۇنى 797,2 ملن تەڭگە قارجىنى يگەرگەنىن ايتتى.
«جەكەلەي باعىتتار بويىنشا ايتقاندا, ءۇي ىرگەسىندەگى جەردى ءتيىمدى پايدالانۋ ماقساتىندا 14,8 ملن تەڭگەگە 598 اۋلانى قامتيتىن جەرگە سارىمساق, كارتوپ, قيار ەگۋگە تۇقىم, تىڭايتقىش الىندى. قازىرگى تاڭدا ءۇي ىرگەسىندەگى جەرلەردىڭ 54 گەكتارىنا 100 پايىز تولىق داقىل ەگىلدى. اۋلاداعى مال شارۋاشىلىعىن ءتيىمدى پايدالانۋعا 676,8 ملن تەڭگەگە 229 اۋلا 2,5 پايىزدىق نەسيە الىپ, وعان 7 558 باس مال ساتىپ الىندى. ونىڭ ىشىندە
6 280 باس ۇساق مال, 356 ءمۇيىزدى ءىرى قارا جانە 592 باس جىلقى مالى بار», دەيدى ول.
اۋىلدى كوركەيتۋدىڭ, اۋىل تۇرعىندارىنىڭ الەۋمەتتىك جاعدايىن كوتەرۋدىڭ نەگىزگى جولى – اۋىل شارۋاشىلىعى سالاسىن دامىتۋ بولماق. بۇل رەتتە ەگىن جانە مال شارۋاشىلىعىنا قولايلى اۋماقتا ورنالاسقان ت.رىسقۇلوۆ اۋدانى مەملەكەت بەرىپ وتىرعان مۇمكىندىكتى مەيلىنشە پايدالانۋدا. ەسەسىنە, ونىڭ يگىلىگىن اۋىلدىقتار كورىپ وتىر.
جامبىل وبلىسى,
ت.رىسقۇلوۆ اۋدانى
