قوستاناي وبلىسىندا 2020 جىلدىڭ باسىنان بەرى 3600 پاتەر پايدالانۋعا بەرىلدى. ونىڭ 430-ى جالعا بەرىلەتىن پاتەر بولسا, 665-ءى – جەكە تۇرعىن ۇيلەر. قازىرگى ۋاقىتتا «قوناي» جانە «بەرەكە» جاڭا شاعىن اۋداندارىندا قۇرىلىس قارقىندى. جوسپارعا سايكەس, مۇندا 102 كوپقاباتتى تۇرعىن ءۇي سالىنادى, سونىمەن قاتار جەكە تۇرعىن ءۇي قۇرىلىسى ءۇشىن 2 مىڭنان استام جەر ۋچاسكەسى بولىنەدى. ال «بەرەكە» شاعىن اۋدانىندا 8 ءۇي بوي كوتەرەدى.
«سوڭعى 4 جىلدا قوستانايدا تۇرعىن ءۇي قۇرىلىسى ەرەكشە قارقىن الدى. اتالعان مەرزىمدە وبلىس ورتالىعىندا 1 ملن شارشى مەتردەن استام جەرگە ءۇي سالىنىپ, 4 شاعىن اۋدان بوي كوتەردى. 11 مىڭنان استام وتباسى جەكە پاتەرگە يە بولدى. وبلىس ورتالىعىندا «اۋەجاي» جانە «يۋبيلەينىي» شاعىن اۋدانىنىڭ قۇرىلىسى اياقتالۋعا جاقىن, ولاردا 76 ءۇي تۇرعىزىلدى. تاعى 12 ءۇيدىڭ قۇرىلىسى اياقتالىپ كەلەدى. «قوناي» شاعىن اۋدانىندا وسى جىلى 19 كوپقاباتتى تۇرعىن ءۇي پايدالانۋعا بەرىلەدى. اۋداندا ءبىر جانە ەكى قاباتتى كوتتەجدىك ۇيلەر سالۋدى جوسپارلاپ وتىرمىز. «نۇرلى جەر» باعدارلاماسى اياسىندا بىرەگەي ساۋلەت ستيلىندە جەر ۇيلەر سالۋ جوباسى العاش قوستاناي اۋدانىنىڭ زارەچنىي كەنتىندە قولعا الىنعان بولاتىن. باس-اياعى ەكى-ءۇش جىلدىڭ ىشىندە 37 گەكتار بوس جەردە كوتتەدج ۇلگىسىندەگى ۇيلەر قالاشىعى پايدا بولدى», دەيدى قۇرىلىس, ساۋلەت جانە قالا قۇرىلىسى باسقارماسىنىڭ باسشىسى بەرىك تاڭجارىقوۆ.
2020 جىلى وبلىستا مۇقتاج ازاماتتارعا 281 پاتەر بەرىلدى. وىڭ ىشىندە 153 كوپ بالالى وتباسى باسپانالى بولدى. قالعاندارى جەتىم بالالارعا, حالىقتىڭ الەۋمەتتىك جاعىنان وسال توپتارىنا, بيۋدجەت قىزمەتكەرلەرىنە تاپسىرىلدى.
وبلىس اكىمى ارحيمەد مۇحامبەتوۆتىڭ تاپسىرماسىنا سايكەس, 2021 جىلى وڭىردە تۇرعىن ءۇيدى پايدالانۋعا بەرۋ كورسەتكىشى 10%-عا ارتادى. «نۇرلى جەر» مەملەكەتتىك باعدارلاماسىن ىسكە اسىرۋعا 2021 جىلى بيۋدجەتتەن بارلىعى 20,4 ملرد تەڭگە ءبولىندى.
