ساياسات • 09 اقپان، 2021

ازاماتتىق قوعامنىڭ بەلسەندى ءىس-قيمىلى

26 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ الماتى قالاسىندا قوعام بەلسەندىلەرىمەن اشىق ديالوگ وتكىزدى.

«بەلسەندى ازاماتتىق قو­عام­­سىز جەمقورلىقتى ازايتۋ، ءتىپتى ونى تۇبەگەيلى جويۋ تۋرالى اي­تۋدىڭ ەش ءمانى جوق. سون­دىق­تان ءبىز قوعامدىق سەرىك­تەس­­تەردى تاڭداۋدا جانە ونىڭ سا­نىنا قاتىستى ءوزىمىزدى شەكتە­مەيمىز. بۇگىنگى تاڭدا اگەنتتىك سىبايلاس جەمقورلىققا قارسى 80 مىڭعا جۋىق بەلسەندى مەن ەرىك­تىلەردىڭ قولداۋىنا يە. ولار­دىڭ قايتارىمسىز قىزمەتى ازا­ماتتاردىڭ ناقتى ماسەلەلەرىن شەشۋگە كومەكتەستى. ءبىز مۇنىمەن توقتاپ قالمايمىز، جۇمىستى جالعاستىرىپ، الدىن الۋ قىز­مەتىن كۇشەيتەمىز»، دەدى اليك شپەك­باەۆ.

ءىس-شاراعا الماتى قالاسى اكى­مىنىڭ ورىنباسارى ەرجان بابا­قۇماروۆ، مەملەكەتتىك ورگان­داردىڭ باسشىلارى، ۇكىمەتتىك ەمەس ۇيىمداردىڭ، بۇقارالىق اقپا­رات قۇرالدارىنىڭ وكىلدەرى، قوعام قايراتكەرلەرى، جوعارى وقۋ ورىندارىنىڭ رەكتورلارى، «ال­ماتى – ادالدىق الاڭى»، «سانالى ۇرپاق» جوبالىق كەڭسەلەرىنىڭ، ارنايى مونيتورينگ توبىنىڭ جانە ولاردىڭ فيليالدارىنىڭ جەتەكشىلەرى قاتىستى. شاقى­رىلعاندار قاتارىندا قازاقستان رەس­پۋبليكاسى تۇڭعىش پرەزي­دەنتى – ەلباسى قورىنىڭ اتقا­رۋشى ديرەكتورىنىڭ ورىنبا­سارى، اگەنتتىك جانىنداعى سى­باي­­لاس جەمقورلىققا قارسى ءىس-قي­­مىل جونىندەگى قوعامدىق كەڭەس­تىڭ توراعاسى يگور روگوۆ بولدى.

وتىرىستا الماتى قالاسى اكىمى­نىڭ ورىنباسارى، «الماتى – ادالدىق الاڭى» جوباسىنىڭ كۋراتورى ەرجان باباقۇماروۆ جوبانى ىسكە اسىرۋدىڭ وڭ نا­تي­جەلەرىن اتاپ ءوتتى: «جۇر­گىزىل­­گەن جۇمىستار اياسىندا سى­­باي­­لاس جەمقورلىق قۇقىق بۇ­زۋ­شى­لىقتار دەڭگەيىنىڭ تومەندەۋى مەن حالىقتىڭ جەمقورلىققا قارسى بەلسەندىلىگىنىڭ ارتۋىندا وڭ وزگەرىس بايقالادى». ءتۇرلى فور­ماتتاعى ءىس-شارالار ارقىلى جۇز­دەگەن الماتىلىق ەلدەگى سى­بايلاس جەمقورلىققا قارسى ساياسات تۋرالى  اقپارات الدى، قۇقىقتىق بىلىمدەرىن نىعايتتى. بۇل جۇمىس قالانىڭ بارلىق اۋدانىندا «ادالدىق الاڭى» فيليالدارى اشىلعاننان كەيىن قوسىمشا قارقىنعا يە بولدى.

كەزدەسۋ بارىسىندا «ادال­دىق الاڭى» جوبالىق كەڭسەسىنىڭ جاڭا جەتەكشىسى، پرەزيدەنت جانىنداعى ۇلتتىق قوعامدىق سەنىم كەڭەسىنىڭ مۇشەسى اينۇر ءسابيتوۆا تانىستىرىلدى.

ءىس-شاراعا قاتىسقان قو­عام بەلسەندىلەرى سىبايلاس جەم­قورلىققا قارسى جۇمىسقا، ونىڭ ىشىندە قوعامدى ساياسي جاڭ­عىرتۋ جانە دەموكراتيالان­دىرۋ تۇرعىسىنان ءوز كوزقاراستارىن ءبىلدىرىپ، ناقتى جەمقورلىق تاۋە­كەلدەرىن بەلگىلەدى. اگەنتتىك توراعاسى بارلىق ماسەلە بويىن­شا تولىق تۇسىنىكتەمە بەرىپ، بىر­قاتار ناقتى ءوتىنىش پەن شا­عىمدى باقىلاۋعا الدى. سون­داي-اق مەملەكەتتىك ورگانداردىڭ باسشىلارىن جەمقورلىققا قارسى ءىس-قيمىل سالاسىنداعى جۇمىستى كۇشەيتۋگە، «ادالدىق الاڭى» جوباسىنىڭ جۇمىسىن جان­داندىرۋعا شاقىردى. «بىردە-ءبىر ماسەلە نازاردان تىس قالماي­دى. ءبىز ءۇشىن بەلسەندى قايرات­كەر­لەرمەن وتكەن ءار كەزدەسۋ ما­ڭىزدى. ءبىز مۇقيات پىسىق­تاپ، ناقتى باسقارۋشىلىق شە­شىم­دەر قابىلدايمىز، مۇنىڭ ءبارى زاڭناماداعى وزگەرىستەردە كورى­نىس تابادى»، دەپ ءسوزىن تۇيىندەدى ا.شپەكباەۆ.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار