– ءبىزدىڭ باستامامىزدى ىسكە اسىرۋعا وبلىس اكىمدىگى قولداۋ ءبىلدىردى. ال شەتەلدىك ستۋدەنتتەر ءۇشىن اشىلعان كۋرستا قازاق, اعىلشىن, ورىس, تۇرىك جانە قىتاي ءتىلىن ۇيرەتۋ كوزدەلىپ وتىر. بۇل باستاماعا كاسپي ماڭى ەلدەرىندەگى جوعارى وقۋ ورىندارىنىڭ ماماندارى دا, اتىراۋلىق ەرىكتى ستۋدەنتتەر دە اتسالىسادى. باستى ماقسات – قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قازاق ءتىلىن ۇلتارالىق قاتىناس ءتىلى دەڭگەيىنە كوتەرۋ تاپسىرماسىنا ۇلەس قوسۋ. اسىرەسە شەتەلدىك ستۋدەنتتەردىڭ قازاق ءتىلىن تەرەڭ مەڭگەرۋىنە جول اشىلادى, – دەيدى سالامات يدريسوۆ.
رەكتوردىڭ ايتۋىنشا, جەتى جۇرتتىڭ ءتىلىن مەڭگەرگەن الاش قايراتكەرىنىڭ ەسىمىن يەلەنگەن ۋنيۆەرسيتەتتە 200-دەن استام شەتەلدىك ستۋدەنت وقيدى. ولاردىڭ باسىم بولىگى – رەسەي فەدەراتسياسىنداعى استراحان وبلىسىنىڭ تۇرعىندارى.
ال وبلىستىق تىلدەردى دامىتۋ باسقارماسىنىڭ باسشىسى ءاسيا قىستاۋباەۆانىڭ پىكىرىنشە, اكىمدىك تاراپىنان قازاق ءتىلىنىڭ حالىقارالىق قاتىناس ءتىلى رەتىندە كەڭ قانات جايۋىنا قولداۋ كورسەتىلەدى. ويتكەنى مۇنداي باستاما شەتەلدە تۇراتىن قانداستارىمىزدىڭ انا ءتىلىن مەڭگەرۋىنە سەپتىگىن تيگىزەدى.
– وسىعان بايلانىستى وبلىستىق تىلدەردى دامىتۋ باسقارماسى اتالعان كۋرستا قولعا الىنعان تاجىريبە نەگىزىندە ادىستەمەلىك قۇرالدار دايىنداۋدى كوزدەپ وتىر. سەبەبى مۇنداي تالاپ تىلدەردى دامىتۋ مەن قولدانۋدىڭ مەملەكەتتىك باعدارلاماسىندا ايقىن كورىنىس تاپتى, – دەيدى ءاسيا قىستاۋباەۆا.
اتىراۋ وبلىسى
