مۋزەي ديرەكتورى راشيدا حاريپوۆانىڭ ايتۋىنشا, تاندىر نان پىسىرەتىن پەشتىڭ ءتۇتىن جۇرەتىن ارناسىندا ءبۇتىن كۇيىندە جاتقان ەكەن. قىشتان جاسالعان ىدىستىڭ ءپىشىنى تسيليندرگە ۇقسايدى. ءتۇبى ساقينا تارىزدەس البارەللو سارعىش توپىراق تۇستەس سىرمەن سىرلانىپتى. بيىكتىگى – 16,5, ەرنەۋىنىڭ ديامەترى – 7,5, ءتۇبىنىڭ ديامەترى – 5,7 سم. ىدىستىڭ سىرتى ويۋلى كومپوزيتسيامەن كوركەمدەلىپ, جوعارى جاعىنا ءتورت جاپىراقتى گۇلدى فريز جۇرگىزىلىپتى. جوعارعى بولىگى تىك سىزىقتارمەن بىرنەشە سەكتورعا ءبولىنىپ, 20 تراپەتسيادان تۇرادى. سونداي-اق شىرشا تارىزدەس ورنەگى دە بار.
– البارەللو – ورتا عاسىرلار مەن قايتا ورلەۋ داۋىرىندە كەڭ تارالعان دارىحانالىق ىدىستىڭ ءبىر ءتۇرى. بۇل ىدىس مەديتسينادا كوپ قولدانىلاتىن جاقپا مايلار, شوپتەر مەن ءتۇرلى ءدارى-دارمەكتى ساقتاۋعا ارنالعان. ونى يتالياندىق تەحنولوگيامەن يتاليا مەن يسپانيانىڭ, فرانتسيا مەن گوللانديانىڭ قالالارىندا جاساعان. ۇلى جىبەك جولى بويىنداعى سارايشىققا البارەللو قىرىمنان اكەلىنگەن بولۋى مۇمكىن. ويتكەنى سول كەزەڭدە قىرىم جاعالاۋىندا گەنۋيا كولونيالارى بولعانى ءمالىم, – دەيدى راشيدا حاريپوۆا.
بۇل ىدىستىڭ سارايشىق قالاشىعىندا جاسالۋى مۇمكىن بە؟ بۇل ءۇشىن تاريحي قالاشىقتان تابىلعان البارەللوعا عىلىمي زەرتتەۋ جۇرگىزىلۋى كەرەك-اق.
اتىراۋ وبلىسى
