قاۋلىعا سايكەس اتىراۋ قالاسىندا ەپيدەميالىق احۋال تولىق تۇراقتالعانعا دەيىن كارانتيندىك شەكتەۋ ءىس-شارالارى ساقتالادى. اسىرەسە كوپشىلىك مەرەكەلىك, ويىن-ساۋىق, كوپشىلىك مادەني, سپورتتىق, ءبىلىم بەرۋ سالاسىندا, كورمەلەردى, كورپوراتيۆتى, فورۋمداردى, كونفەرەنتسيالاردى, سونداي-اق وتباسىلىق بانكەتتەر, ۇيلەنۋ تويلارى, مەرەيتويلار, ەسكە الۋلار, ونىڭ ىشىندە ۇيدە جانە جاپپاي ادامدار جينالاتىن وزگە دە ءىس-شارالاردى وتكىزۋگە تىيىم سالىنىپ وتىر. سونداي-اق قالاداعى ويىن-ساۋىق نىساندارىنىڭ, بانكەت زالدارىنىڭ, تۇنگى كلۋبتاردىڭ, كاراوكە, كومپيۋتەرلىك جانە ويىن كلۋبتارىنىڭ, كاليان, بۋكمەكەرلىك كەڭسەلەردىڭ قىزمەتىن, مەنشىك نىسانىنا قاراماستان مەكتەپكە دەيىنگى بالالار مەكەمەلەرىنىڭ (كەزەكشى توپتاردى قوسپاعاندا), مادەني نىسانداردىڭ, جەكە, توپتىق دايىندىقتاردى قوسا العاندا كينوتەاترلاردىڭ, تەاترلاردىڭ قىزمەتى توقتاتىلدى.
مۇنداي شەكتەۋ شارالارىن كۇشەيتۋگە نە سەبەپ بولدى؟ ارينە, الدىمەن بۇل مەيرامحانالار مەن ءدامحانالاردىڭ شەكتەۋدى ساقتاماۋىنا قاتىستى بولىپ وتىر. ويتكەنى اتىراۋدا وسى سالاداعى كاسىپكەرلىك نىساندارى كارانتين تالابىن ءجيى بۇزادى. ماسەلەن, ءۇش كۇندە 20-عا جۋىق كاسىپكەرلىك نىسانى يەلەرى بۇل تالاپتى ساقتامايتىنى انىقتالدى. مۇنداي دەرەك اتىراۋ قالالىق پوليتسيا باسقارماسى مەن قالالىق اكىمدىك قىزمەتكەرلەرىنەن قۇرالعان مونيتورينگتىك توپتىڭ جۇرگىزگەن رەيدى كەزىندە انىق بايقالدى.
– اتىراۋ قالاسىندا 29 قاڭتاردا كەشكى ساعات 21:40-تا Chechil Pub بارى, ال ساعات 22:45 شاماسىندا Vivaldi, ساعات 23:30-دا Urban مەيرامحاناسى جۇمىس ىستەپ تۇرعانى بەلگىلى بولدى. اتالعان مەيرامحانالاردىڭ ارقايسىسىنىڭ ىشىندە شامامەن 30-عا جۋىق ادام بولعان. كارانتيندىك شەكتەۋ تالابىن «ەلدورادو» مەيرامحاناسى مەن «كەرۋەن» تويحاناسى دا بۇزعان. سوڭعىسىندا 20-عا جۋىق ادامنىڭ قاتىسۋمەن تۋعان كۇن كەشى وتكەن. سونداي-اق «موروككو» مەيرامحاناسىندا 50-دەن استام ادامعا قىزمەت كورسەتىلگەن, – دەپ اقپارات تاراتتى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
ال 30 قاڭتاردا «رىبا موەي مەچتى» كاراوكە, «لوتو» ويىن-ساۋىق كلۋبى, «توفۋ», «رودەم», «اسپانديار» مەيرامحانالارى شەكتەۋلى ۋاقىتتان كەيىن جۇمىس ىستەگەنى بەلگىلى بولدى. بۇعان دەيىن «رىبا موەي مەچتى» كلۋبى مەن «توفۋ» مەيرامحاناسى كارانتين رەجىمىن بىرنەشە رەت بۇزعانى ءۇشىن جاۋاپكەرشىلىككە تارتىلعان ەدى. «اسپانديار» مەيرامحاناسىندا دا تۋعان كۇن كەشى ءوتىپتى. وسىنداي دەرەك 31 قاڭتاردا دا انىقتالدى. جەكسەنبى كۇنى «ماشا ي مەدۆەد», «كاۋسار», «سۇلتان حولل» مەيرامحانالارىندا 40-50-عا ادامعا دەيىن قاتىسقان تۋعان كۇن كەشى تويلانىپتى. جۇمىسكەر كەنتىندە ورنالاسقان «كەرەمەت» مونشاسى دا كەلۋشىلەرگە قىزمەت كورسەتەدى ەكەن. سونداي-اق 31 قاڭتاردا «پەرسونا ا», «بەلۋچي» كيىم دۇكەندەرى شەكتەۋگە قاراماستان جۇمىس ىستەپ تۇرعان.
كارانتيندىك شەكتەۋ تالاپتارىن بۇزۋعا بايلانىستى انىقتالعان دەرەكتەرگە قاتىستى جيناقتالعان ءىس-قۇجاتتار اتىراۋ قالالىق سانيتاريالىق-ەپيدەميولوگيالىق باسقارماسىنا جولداندى. الايدا كارانتين تالابىن ءبىر ەمەس, بىرنەشە رەت بۇزعان مەيرامحانالار مەن كلۋبتار جۇمىسىن ءالى جالعاستىرىپ كەلەدى. نەگە؟
اتىراۋ وبلىسى
