ۇلتتىق بانك قاڭتار ايىندا نەلىكتەن ينتەرۆەنتسيا جاسامادى؟

ماسەلەن، ءبىر جىلدان بەرى العاش رەت Brent مۇنايىنىڭ باعاسى باررەلىنە 60 دوللاردان اسىپ، بىرقاتار دامۋشى ەلدەر ۆاليۋتاسىنىڭ نىعايۋىنا، ەكونوميكانىڭ قايتا قالپىنا كەلۋىنە دەگەن سەنىمدىلىكتىڭ ويانۋىنا تۇرتكى بولدى. دەگەنمەن ۆيرۋستىڭ جاڭا شتاممىنىڭ كەڭ قارقىنمەن قايتا تاراي باستاۋى، ىندەت جۇقتىرعاندار سانىنىڭ ازايماي تۇرعانى قورقىنىشتى قايتادان كۇشەيتىپ وتىر.
وسىعان وراي ۇلتتىق بانك توراعاسىنىڭ ورىنباسارى ءاليا مولدابەكوۆا قاڭتار ايىن قورىتىندىلاپ، الداعى جاعداي تۋرالى بولجامىمەن ءبولىستى.

– قاڭتاردىڭ العاشقى ەكى ونكۇندىگىندە اقش ەكونوميكاسى كەزەكتى ىنتالاندىرۋ پاكەتىن العان سوڭ جانە ينفلياتسيالىق بولجامداردىڭ وسۋىنە بايلانىستى، تومەن ستاۆكالاردىڭ پەرسپەكتيۆاسىن رەتتەۋشى پىكىرلەرگە بايلانىستى قوردىق يندەكستەردىڭ ءوسىمى بايقالدى. ايدىڭ باسىندا شيكىزات نارىقتارىندا دا جاقسى ديناميكا بايقالدى. 5 قاڭتار كۇنى وپەك+ مۇشە ەلدەر مۇناي ءوندىرۋدى ازايتۋ تۋرالى كومپروميستى شەشىمگە قول جەتكىزدى. ساۋد ارابياسى اقپان مەن ناۋرىزدا ەرىكتى تۇردە تاۋلىگىنە 1 ملن باررەلگە از مۇناي وندىرەمىز دەگەن شەشىمىن ءمالىم ەتىپ، بۇل دا ءوز كەزەگىندە مۇناي نارىعىنا قولداۋ بولدى. قارا التىننىڭ باعاسى پاندەمياعا دەيىنگى دەڭگەيىنە جەتىپ، باررەلىنە 57 دوللاردان استى. الايدا، ايدىڭ سوڭعى اپتاسىندا كاسىبي ەمەس ترەيدەرلەردىڭ GameStop سياقتى بىرقاتار كومپانيالارعا جاساعان مامىلەلەرى قورلار نارىعىنداعى جاعدايدى قۇبىلتىپ جىبەردى، – دەيدى ۇلتتىق بانك وكىلى.

اقش قور نارىعىنداعى قۇبىلمالى جاعدايدىڭ يندەكسى 11 پايىزدىق پۋنكتكە، 22 پايىزدان 33 پايىزعا دەيىن وسكەن. بۇدان باسقا، ۆاكتسيناتسيا ۋاقىتى مەن ونى ەلدەر اراسىندا تەڭ بولمەۋ ماسەلەسىنە بايلانىستى دا نارىقتا پەسسيميستىك بولجامدار تۋىنداعان. قۇبىلمالى جاعدايعا اكەپ سوعاتىن باستى فاكتور – Covid-19 جۇقتىرعانداردىڭ كوپتىگى. سىرتقى نارىق ۆاليۋتا ديناميكاسىنا ەلەۋلى اسەر ەتەدى. كوپتەگەن دامۋشى ەلدەردىڭ ۆاليۋتاسى قاڭتار ايىندا السىرەپ كەتكەن. برازيليا رەالى 5،4 پايىز، مەكسيكا پەسوسى 3،3 پايىز، وڭتۇستىك افريكا راندى 3،2 پايىز، رەسەي ءرۋبلى 2،5 پايىز، ال تەڭگە 0،8 پايىزعا السىرەگەن.

– قازاقستان قور بيرجاسىنداعى ساۋدا-ساتتىقتىڭ جالپى كولەمى 2020 جىلدىڭ جەلتوقسانىنداعى 2،5 ملرد دوللار كورسەتكىشىنەن 2021 جىلدىڭ قاڭتارىندا 2،2 ملرد دوللارعا دەيىن تومەندەدى. نارىق نەگىزگى فاكتورلاردىڭ ىقپالىنا قاراي قالىپتاستى. وسىعان بايلانىستى ۇلتتىق بانك ينتەرۆەنتسيا جاساعان جوق. بيۋدجەتكە ترانسفەرت بەرۋ اياسىندا ۇلتتىق قوردان الىنعان ۆاليۋتانىڭ ساتىلىمى تەڭگەگە ءبىراز قولداۋ كورسەتتى. ساتىلىم كولەمى 720 ملن دوللار بولدى. سونداي-اق، كۆازيمەملەكەتتىك سەكتورداعى سۋبەكتىلەردىڭ 206 ملن دوللار كولەمىندە پايدا تابۋى دا تەڭگەگە كومەگىن تيگىزدى، – دەيدى ءاليا مولدابەكوۆا.

ۇلتتىق بانك دەرەگىنشە، التىن ۆاليۋتا قورىندا ايتارلىقتاي وزگەرىس جوق. جىل باسىنان بەرى رەزەرۆ 35،6 ملرد دوللاردى قۇرادى. الايدا قاڭتاردىڭ سوڭىندا ۇلتتىق قور اكتيۆتەرى جىل باسىنان بەرى 1 ميلليارد دوللارعا ازايىپ، 57،7 ميلليارد اقش دوللار بولعان. وعان اسەر ەتكەن باستى سەبەپ – بيۋدجەتكە ترانسفەرتتەردىڭ (381 ملرد تەڭگە) ءبولىنۋى ەكەن. دەگەنمەن اقپان ايىنىڭ باسىندا قور نارىعى قالپىنا كەلە باستاعان. العاشقى بەس كۇندە قوردىڭ ينۆەستيتسيالىق كىرىسى 440 ملن دوللارعا جەتىپتى.

ۇلتتىق بانك وكىلىنىڭ ايتۋىنشا، وسىنشاما قۇبىلۋعا قاراماستان جاعدايدى وڭ دەپ باعالاۋعا بولادى. ويتكەنى اقپان ايىنىڭ باسىنان قور يندەكستەرى مەن مۇناي باعاسى ءوستى. بۇل دامۋشى نارىقتاردىڭ ۆاليۋتالارىنا جانە قارجى قۇرالدارىنا قاتىستى ينۆەستورلاردىڭ تاۋەكەلىنىڭ جوعارىلاۋىنا ىقپال ەتپەك.

ەسكە سالساق، 2020 جىلى تەڭگە كۋرسىن ۇستاپ تۇرۋ ءۇشىن ۇلتتىق بانك 1،9 ملرد دوللار كولەمىندە اقشا جۇمسادى. تەك ناۋرىز ايىنىڭ وزىندە تەڭگەنىڭ تىم قاتتى قۇنسىزدانىپ كەتپەۋى ءۇشىن 1،4 ملرد دوللار بولگەن. بۇل البەتتە، ايتارلىقتاي سوما. الايدا ساراپشىلار ۆاليۋتا كۋرسىن تۇراقتى ۇستاۋعا ءدال بۇلاي قارجى جۇمساۋ ەكونوميكاعا زيان كەلتىرمەيدى دەپ سانايدى.