ۇلتتىق پالاتا 2021 جىلعا ارنالعان ەلەكتروندىق ساۋدانىڭ نەگىزگى باعىتتارىن, ونىڭ ىشىندە «الەۋمەتتىك جەلىلەردەگى ساۋدانى راسىمدەۋ جانە ونى كولەڭكەدەن شىعارۋ» باعىتتارىن انىقتادى.
«بۇگىندە الەۋمەتتىك جەلىلەر ارقىلى ساتىلاتىن تاۋارلار كولەمى تۋرالى مالىمەتتەر جوق. بۇل نارىق زاڭ تالاپتارى ساقتالماعان «سۇر ايماق». رەگۋلياتيۆتىك اۋىرتپالىقتان بوساتىلعان بەيرەسمي سەكتوردىڭ شاعىن سۋبەكتىلەرى نەگىزسىز باسەكەلىك ارتىقشىلىقتارعا يە بولادى», دەدى ناريمان ابىلشايىقوۆ ساۋدا جانە ينتەگراتسيا مينيسترلىگىنىڭ وتىرىسىندا.
ونىڭ ايتۋىنشا, زاماناۋي تسيفرلىق پلاتفورمالاردى قولدانا وتىرىپ, ەركىن تابىس تابۋ ەكونوميكاسىن دامىتۋدىڭ جول كارتاسى الەۋمەتتىك جەلىلەردەگى ساۋدانى راسىمدەۋگە ارنالعان ءىس-شارانى قاراستىرادى.
«شاعىن جانە ورتا بيزنەستى ءوز قىزمەتىن رەسىمدەۋدى ىنتالاندىرۋدىڭ ءتيىمدى ادىستەرىنىڭ ءبىرى ەلەكتروندى كوممەرتسيا سۋبەكتىلەرىن جەڭىلدەتىلگەن قارجىلاندىرۋ بولىپ تابىلادى, ول سونداي-اق كورسەتىلگەن دوركارتقا ەنگىزىلگەن», دەپ قوستى ول.
سونىمەن قاتار تۇتىنۋشىلاردىڭ ەلەكتروندى ساۋداداعى قۇقىقتارىن قورعاۋدىڭ نورماتيۆتىك-قۇقىقتىق شارالارى ازىرلەنەتىن بولادى. ناريمان ابىلشايىقوۆتىڭ ايتۋىنشا, بۇگىنگى كۇنى تاۋارلاردى قايتارۋ, كورسەتىلەتىن قىزمەتتەردىڭ ساپاسى, تۇتىنۋشىلاردىڭ داۋلارىن شەشۋمەن بايلانىستى پروبلەمالار ءالى دە بار. سونداي-اق, قازاقستاندىق ەلەكتروندىق كوممەرتسيا وپەراتورلارىن قولداۋ ءۇشىن وتاندىق جانە شەتەلدىك ينتەرنەت-دۇكەندەر اراسىنداعى بيۋدجەتتىك تەڭدىكتى قامتاماسىز ەتۋ ماسەلەسى قاراستىرىلاتىن بولادى.
«سالىق تولەمدەرىنىڭ تولەنبەۋىنە بايلانىستى شەتەلدىك ساتۋشىلار ىشكى ساۋدا الاڭدارىنا قاراعاندا باعالىق ارتىقشىلىققا يە, بۇل سوڭعىلارىن باسەكەگە قابىلەتسىز جاعدايعا قالدىرادى. ءبىز بۇل ماسەلەنى سالىق كودەكسىنە كەلەسى وزگەرىستەر مەن تولىقتىرۋلار اياسىندا ازىرلەۋدى ۇسىنامىز», دەپ ءتۇسىندىردى ناريمان ابىلشايىقوۆ.
ول 2021-2025 جىلدارعا ارنالعان ساۋدانى دامىتۋدىڭ مەملەكەتتىك باعدارلاماسى جوباسىندا ەلەكتروندىق ساۋدانى دامىتۋعا باعىتتالعان بىرقاتار شارا قاراستىرىلعانىن قوستى.
«بۇل ساۋدانىڭ دامۋىن باقىلاۋ مەن تالداۋدىڭ بىرىڭعاي اقپاراتتىق-تالدامالىق جۇيەسىن قۇرۋ, ستاتيستيكالىق ەسەپتى جەتىلدىرۋ, ەلەكتروندىق كوممەرتسيا نارىعىنىڭ اناليتيكالىق جانە ماركەتينگتىك زەرتتەۋلەرىن جۇرگىزۋ, ەلەكتروندى پلاتفورمالاردى كەڭەيتۋ, فۋلفيلمەنت جەلىسىن ورتالىقتاندىرۋ», دەپ قوسىپ ءوتتى.
بۇل باعىتتارداعى جۇمىستاردى ۇلتتىق كاسىپكەرلەر پالاتاسى ساۋدا جانە ينتەگراتسيا مينيسترلىگىمەن بىرگە جۇرگىزەتىن بولادى.
