«قازىرگى تاڭدا پاترۋلدىك پوليتسيا قىزمەتكەرلەرىنىڭ قولىندا 9000-نان استام پلانشەت بار. ولاردىڭ ءبارى ءىىم-ءنىڭ ورتالىق بازاسى مەن باس پروكۋراتۋرانىڭ اكىمشىلىك ءىس وندىرىستەرىنىڭ بازاسىنا قوسىلعان. جول قازعالىسىن قاداعالايتىن ءاربىر قىزمەتكەر پلانشەتپەن جابدىلعان. پلانشەتسىز قىزمەت اتقارىلمايدى. جۇرگىزۋشى كۋالىگى مەن كولىكتىڭ تىركەۋ دەرەكتەرى وسى پلانشەت ارقىلى تەكسەرىلەدى. قازىرگى تاڭدا پلانشەت كومەگىمەن جۇرگىزۋشىنىڭ جەكە باسىن بىرىزدەندىرۋگە بولادى. ول ونىڭ تولقۇجات دەرەكتەرى ارقىلى ىسكە اسادى نەمەسە جسن-ءىن پلانشەتتە تەرسە بولدى. سول كەزدە جۇرگىزۋشىنىڭ كۋالىگى بار-جوعى, ول قۇجاتتىڭ مارتەبەسى, كولىك تۋرالى مالىمەتتەر شىعادى. جۇرگىزۋشىنىڭ اكىمشىلىك قۇقىق بۇزۋ دەرەكتەرىن دە پلانشەت ارقىلى تەكسەرە الادى», دەيدى كوميتەت وكىلى.
ونىڭ سوزىنە قاراعاندا, جۇرگىزۋشى كولىككە مىنەر كەزدە كۋالىگى مەن تەحنيكالىق پاسپورتىن الماسا دا, جەكە كۋالىگىن ۇمىتپاۋى كەرەك. وسى كەزدە عانا ونىڭ كولىك تىزگىندەۋى زاڭعا قايشى بولمايدى.
«ايتقىم كەلەتىنى, جۇرگىزۋشىنىڭ كۋالىگىنسىز كولىك ايداۋ ءۇشىن وزىمەن بىرگە جەكە باسىن كۋالاندىراتىن قۇجات بولۋى كەرەك. وعان جەكە تولكۇجات, ديپلوماتيالىق قىزمەتتىك كۋالىك, جەكە كۋالىك, شەتەلدىكتەردىڭ ىقتيار حاتى, تۋ تۋرالى كۋالىك جاتادى. ال كولىكتى تەكسەرۋ ءۇشىن مەملەكەتتىك تىركەۋ ءنومىرىن پلانشەتكە ەنگىزەدى. وسى كەزدە جۇيە اتالمىش كولىك تۋرالى دەرەكتەردى اۆتوماتتى تۇردە ەكرانعا شىعارادى. كولىكتىڭ تەحنيكالىق بايقاۋدان قاشان وتكەنى جانە ساقتاندىرۋ ءپوليۋسى قاشان رەسىمدەلگەنى تۋرالى دا مالىمەتتەر پلانشەت ارقىلى كورىنەدى», دەدى سەرىك ءتۇسىپوۆ.
