مەديتسينالىق ۇيىمدار ينتەرنەت جەلىسىمەن 100 % قامتىلعان جانە كومپيۋتەرلىك تەحنيكامەن جابدىقتالۋى – 75 %. مەديتسينالىق مەكەمەلەردى تسيفرلاندىرۋ جوباسى اياسىندا بارلىق ەمحانالاردا ءاربىر دارىگەر بولمەسىندە QR-كود ءىلىندى. بۇل ارقىلى ءار دارىگەردىڭ جۇمىسىن باعالاۋعا بولادى.
العاش رەت رەسپۋبليكا بويىنشا شىمكەنت قالاسىندا ءار ەمحانادا اقپاراتتىق-سيتۋاتسيالىق ورتالىق اشىلدى. بۇل رەتتە «جۇكتى ايەلدەردى مونيتورينگىلەۋ», «نارەستەلەر پاتروناجى», «سوزىلمالى اۋرۋلار مونيتورينگى» اتتى باعدارلامالار ورناتىلىپ, ناتيجەسىندە مەديتسينالىق كومەكتىڭ ساپاسى ارتىپ وتىر.
قالا بويىنشا باستاپقى مەديتسينالىق سانيتارلىق جانە ستاتسيونارلىق كومەك كورسەتەتىن مەديتسينالىق ۇيىمدار «دامۋمەد» مەديتسينالىق اقپاراتتىق جۇيەسىمەن («تسيت دامۋ» جشس) جۇمىس جۇرگىزۋدە. جەدەل جاردەم قىزمەتى «ارماكوم» مەديتسينالىق اقپاراتتىق جۇيەسىنە قوسىلعان. شاھاردا موبيلدىك قوسىمشانى پايدالانۋشىلار – 201 780 ادام. ەلەكتروندىق دەنساۋلىق پاسپورتتارى 1052849 پاتسيەنتكە تولتىرىلعان. بۇل – قالا حالقىنىڭ 97,8 %-ى.
ەمحانالاردا «دامۋمەد» قوسىمشاسى ارقىلى دارىگەر قابىلداۋىنا جازىلۋعا بولادى. بۇل ءوز كەزەگىندە ازاماتتاردىڭ جەكە ۋاقىتىن ۇنەمدەيدى. جالپى موبيلدىك قوسىمشا ارقىلى 322 304 ادام قابىلداۋعا جازىلىپ, 10 994 دارىگەر ۇيگە شاقىرتىلعان.
شىمكەنت قالالىق دەنساۋلىق ساقتاۋ جۇيەسىن تسيفرلاندىرۋ ناتيجەسىندە بىرقاتار جەتىستىككە قول جەتكىزۋ جوسپارلانۋدا. اتاپ ايتقاندا, شاھاردا ەمحانادا دارىگەردىڭ قابىلداۋىنا جازىلۋ كەزەگى 9-دان 2 ادامعا دەيىن, كەزەكتەردى 30 مينۋتتان 15 مينۋتقا دەيىن, زەرتتەۋ ناتيجەلەرىن الۋ ۋاقىتىن 2 ەسەگە قىسقارتۋ (5 ساعاتتان 2 ساعاتقا دەيىن), دارىگەرگە قابىلداۋ ۋاقىتىن 50%-عا تومەندەتۋ (20 مينۋتتان 10 مينۋتقا دەيىن), ۇيدەن شىقپاستان سىناق ناتيجەلەرىن, كەڭەستەردى جانە رەتسەپتتەردى الۋ جانە جەكە دەنساۋلىق تۋرالى بارلىق اقپارات ونلاين رەجيمىندە قول جەتىمدى ەتۋ باعىتىندا جۇمىستار اتقارىلۋدا.
