بۇعان دەيىن بەس جىلعا جۋىق قازىعۇرت اۋدانىن باسقارعان ت.تەلعاراەۆ 1973 جىلى تۋعان, ءبىلىمى جوعارى, ماماندىعى – ينجەنەر-مەحانيك, ەكونوميست-قارجىگەر. ەڭبەك جولىن شىمكەنتتە قۇرىلىسشى بولىپ, ال مەملەكەتتىك قىزمەتتى 1997 جىلى وڭتۇستىك قازاقستان وبلىسى اۋماقتىق جەكەشەلەندىرۋ كوميتەتى مەملەكەتتىك اكتسيا پاكەتتەر جانە مەملەكەتتىك قاتىسۋ ۇلەسى ءبولىمىنىڭ باس مامانى رەتىندە باستاعان. ءار جىلدارى وبلىستىق كوممۋنالدىق مەنشىك, وبلىستىق قارجى, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار دەپارتامەنتتەرىندە ءبولىم باستىعى بولعان, سونداي-اق وڭتۇستىك قازاقستان وبلىسى قارجى باسقارماسى باسشىسىنىڭ ورىنباسارى قىزمەتىن اتقاردى.
تولەبي اۋدانى اكتيۆىنە, دەپۋتاتتارعا جاڭا تاعايىندالعان اكىمدى تانىستىرعان وبلىس اكىمى ومىرزاق شوكەەۆ ەرەكشە نازار اۋدادار بىرقاتار باعىتتاردى اتاپ ءوتتى. ال اۋداندىق ارداگەرلەر كەڭەسىنىڭ توراعاسى ءاتىرحان شىڭعىسباەۆ ءوڭىردىڭ ەرەكشەلىكتەرىنە توقتالا كەلە, تەلعاراەۆتىڭ ەلىمىزدىڭ تاۋەلسىزدىگى جىلدارى, ياعني سوڭعى وتىز جىل ىشىندە اۋداندى باسقارۋعا كەلگەن ون ءبىرىنشى اكىم ەكەنىن ايتتى. ءوز كەزەگىندە تولەگەن تۇرتاي ۇلى سەنىم بىلدىرگەن وبلىس باسشىسىنا العىسىن بىلدىرە وتىرا, اۋداندى دامىتۋدا العا قويىلعان مىندەتتەردى ورىنداۋدا بار كۇش - جىگەرىن جۇمسايتىنىن جەتكىزدى.
ايتا كەتەلىك, اۋداندى بۇعان دەيىن باسقارعان باۋىرجان وماربەكوۆ پرەزيدەنت اكىمشىلىگىنىڭ مەملەكەتتىك ينسپەكتورى قىزمەتىنە تاعايىندالعان بولاتىن.
