قالا اكىمىنىڭ ايتۋىنشا, جۇمىسسىز قالعان تۇرعىندارعا بارىنشا قولداۋ كورسەتىلەدى. جەرگىلىكتى كاسىپكەرلەر دە مەملەكەتتىك باعدارلامالار شەڭبەرىندە جاڭا جۇمىس ورىندارىن اشپاق. بۇگىندە تبكب-دا جۇمىس تاۋىپ ۇلگەرمەگەن 269 ادام بار. ولاردىڭ ەكەۋى ۋاقىتشا جۇمىس ىستەپ جاتسا, 79 ادام ۇسىنىلعان جۇمىستان باس تارتقان. ERG-ءدىڭ باسقا كاسىپورىندارىنا بۇعان دەيىن 189 ادام قىزمەتكە الىنعان.
«2021 جىلدىڭ قاڭتار ايىندا كەن باسقارماسى قىزمەتىنىڭ تولىق توقتاۋىنا بايلانىستى ERG توبى وكىلدەرىنىڭ, قوستاناي وبلىسى اكىمىنىڭ ورىنباسارىنىڭ, ارقالىق قالاسى كاسىپكەرلەرىنىڭ قاتىسۋىمەن كەڭەس ءوتتى. وندا «ەۋرازيالىق توپ» جشس الاڭىندا بوساتىلاتىن وبەكتىلەردى تبكب-نا بەرۋ ماسەلەلەرى قارالدى. اتالمىش نىساندار قايتارىمسىز نەگىزدە بەرىلەدى دەپ جوسپارلانۋدا. تبكب قىزمەتكەرلەرىن جۇمىسقا ورنالاستىرۋ شارتى دا جاسالادى», دەدى قايرات ابىشەۆ.
قازىردىڭ وزىندە جەرگىلىكتى «الليۋمينستروي» سەرىكتەستىگىنىڭ جانار-جاعارماي نىساندارى, تەحنولوگيالىق كولىك تسەحى, جوندەۋ-ەنەرگەتيكالىق جابدىقتارى مەن قويما شارۋاشىلىعى ۋچاسكەلەرىنە 80 جۇمىسشى الىنادى. قالا اكىمى ايتقانداي, «ەڭبەك» باعدارلاماسى اياسىندا ارقالىقتا ءتورت جوباعا 53 ملن تەڭگە شاعىن نەسيە بەرىلدى.
«باستاۋ-بيزنەس» بويىنشا 17 ارقالىق تۇرعىنىنا كاسىپتەرىن دامىتۋ ءۇشىن جالپى سوماسى 47 ملن تەڭگە قاراجات بەرىلدى, ەكى كوپبالالى انا 1 ملن تەڭگەگە گرانت قاراجاتىنا قول جەتكىزدى. ولار وڭالتۋ ورتالىعى مەن بالالار مەكتەبىن اشقان.
