ەكونوميكا • 07 اقپان، 2021

قازاقستان وپەك+ مىندەتتەمەسىن ورىنداۋعا دايىن ەكەنىن مالىمدەدى

قازاقستان وپەك+ حالىقارالىق كەلىسىمى اياسىندا وزىنە جۇكتەلگەن مىندەتتەمەلەردى ورىنداۋعا جانە بۇدان بۇرىن ارتىعىمەن وندىرىلگەن كولەمدەردى وتەۋ بويىنشا شارالار قابىلداۋعا ءازىر. بۇل تۋرالى ەنەرگەتيكا مينيسترلىگى حابارلادى.

اباي قازبەك ۇلى

3 اقپاندا بەينەكونفەرەنتسيا فورماتىندا وپەك+ مينيسترلىكتەرى بىرلەسكەن مونيتورينگ كوميتەتىنىڭ 26-وتىرىسى ءوتكەن. وندا ءوندىرىستى قىسقارتۋ بويىنشا قابىلدانعان شارالاردىڭ ارقاسىندا الەمدىك مۇناي نارىعىنداعى وڭ ۇردىستەر اتالعان.

2021 جىلى الەمدىك ەكونوميكانىڭ ءوسۋى 4،4 پايىز دەڭگەيىندە بولىپ، مۇنايعا دەگەن الەمدىك سۇرانىس تاۋلىگىنە 95،9 ملن.باررەلگە جەتپەك. بۇل 2020 جىلمەن سالىستىرعاندا تاۋلىگىنە 5،6 ملن باررەل ءوسىم بولعاندىعىن كورسەتەدى.

سونداي-اق، جەلتوقسان ايىندا كەلىسىمگە قاتىسۋشى ەلدەردىڭ مىندەتتەمەلەرىن ورىنداۋى بويىنشا كورسەتكىشتەردىڭ جاقسارعانى دا ايتىلدى: 101 پايىز، ونىڭ ىشىندە وپەك ەلدەرى – 103 پايىز، وپەك ەمەس ەلدەر – 93 پايىز.

ەنەرگەتيكا مينيسترلىگى بۇعان دەيىن حابارلاعانداي وپەك+ كەلىسىمى اياسىندا قازاقستاننىڭ ءوز مىندەتتەمەسىن ورىنداۋى 2020 جىلدىڭ جەلتوقسان ايىندا 96 پايىزدى قۇراعان. جەلتوقساندا ەل اۋماعىندا 5،9 ملن توننا مۇناي ءوندىرىلىپتى. ال قاڭتار ايىندا قازاقستان وپەك+ كەلىسىمىن 111 پايىزعا ورىنداعان.

ەسكە سالساق، مۇناي ءوندىرىسىن ازايتۋ تۋرالى كەلىسىمدى وپەك+ ەلدەرى العاش رەت بىلتىر ءساۋىر ايىندا جاساستى. مۇنداي كەلىسىم مۇنايعا دەگەن الەمدىك سۇرانىستىڭ كۇرت تومەندەپ كەتۋىنە بايلانىستى ىسكە اسىرىلدى. كەلىسىم ەكى جىلدى قامتيدى. بىراق بىرتىندەپ ءار توقسان سايىن ءوندىرىستى ۇلعايتۋ جوسپاردا بار.

2021 جىلدىڭ 4-5 قاڭتارىندا جاسالعان كەلىسىم بويىنشا قازاقستان اقپان ايىندا تاۋلىگىنە 1،427 ملن، ال ناۋرىز ايىندا 1،437 ملن باررەل مۇناي وندىرۋگە قۇقىلى.