قاۋىپتى دەرت قارماعان وقۋشىلار, نەگىزىنەن كوكشەتاۋ قالاسىندا. ازىرگە وبلىس ورتالىعىنداعى 11 مەكتەپ كارانتينگە جابىلدى. وسى ورايدا بىردەن ايتا كەتەتىن ۇسىنىس, قىزىل ايماقتىڭ» قاتەرىنەن قۇتىلا الماي تۇرعاندا ءبىلىم وشاقتارىنداعى وقۋ-تاربيە جۇمىستارىن تولىعىمەن ونلاين جۇيەسىنە كوشىرسەك قالاي بولادى ەكەن؟ سوڭعى تاۋلىكتە 20 وقۋشى ىندەتكە شالدىقتى. ولاردىڭ دەنى مەكتەپكە بارىپ ءبىلىم الىپ جۇرگەن بالالار.
– بارلىق ءبىلىم وشاقتارى دەزينفەكتسيالاۋ جۇمىستارىن جۇرگىزىپ, ساقتاندىرۋ شارالارىنا مۇقيات بولعانىمەن, احۋال وسىنداي بولىپ تۇر, – دەيدى كوكشەتاۋ قالالىق ءبىلىم ءبولىمىنىڭ ادىسكەرى گۇلنار جايلاۋوۆا.
بۇگىنگى تاڭدا ءبىلىم وشاقتارىنداعى جاعداي شىن مانىسىندە الاڭداتارلىق. وتكەن ءبىر ايدىڭ ىشىندە جۇزدەن استام وقۋشى «جامان تۇماۋ» دەرتىنە شالدىعىپ وتىر. جالعىز وقۋشىلار عانا ەمەس, مۇعالىمدەر دە كوروناۆيرۋس جۇقتىرعان.
– وقۋ جىلى باستالعالى 243 وقۋشىدان كوروناۆيرۋس انىقتالدى, – دەيدى كوكشەتاۋ قالاسىنىڭ باس سانيتارلىق دارىگەرى قانات ىسقاقوۆ. تالداۋ جاساپ قاراساڭىز, وسى بالالاردىڭ 26-سى عانا ونلاين جۇيە ارقىلى ءبىلىم العان ەكەن. قالعاندارى مەكتەپتەردە ءبىلىم العان. دەمەك, قاۋىپ وقۋ ورنىندا كوپ دەگەن ءسوز. مىسالى, ءبىر ءبىلىم وشاعىندا دەرت جۇقتىرعانىن اڭعارماعان مۇعالىم بەس بىردەي سىنىپتىڭ وقۋشىسىنا ساباق بەرگەن. سونىڭ سالدارىنان 100-دەن استام وقۋشى كارانتينگە جىبەرىلدى.
وبلىس بويىنشا 38 ءبىلىم بەرۋ مەكەمەسى جابىلدى. اسىرەسە, ساندىقتاۋ جانە زەرەندى اۋداندارىندا قاتەرلى دەرتكە شالدىعۋ وقيعالارى كوپ. سوندىقتان, قاۋىپ سەيىلگەنشە بارلىق ءبىلىم وشاقتارى ونلاين جۇيەسى ارقىلى جۇمىس ىستەسە, جاس تولقىنعا دەگەن قاۋىپ-قاتەر ازايار ما ەدى دەگەن تىلەگىمىزدى تاعى ءبىر قايتالاپ ايتۋعا تۋرا كەلىپ تۇر.
كوكشەتاۋ
