ماسەلەن, بۇگىندە الدىڭعى اعا بۋىننىڭ كوپشىلىگى جاستاردى كىنالاي سويلەيدى. ءبارىنىڭ بىردەن اكىم, پروكۋرور سياقتى لاۋازىمدى ورىنعا بارعىسى كەلەدى دەگەنىن دە ءجيى ەستيمىز. بىراق بۇگىن عانا قولىنا ديپلوم العان جاستى ەشكىم دە جايلى ورىنعا جايعاستىرا سالماسى انىق. الايدا ماماندىق تاڭداۋ ءار ادامنىڭ ءوز ەركى. قوعامدا كوپ رەتتە جاستاردىڭ جۇمىسشى ماماندىقتارىنا ءجيى بارا بەرمەيتىنى ايتىلادى. ەلىمىز بۇگىنگىدەي كاسىپكەرلىككە قولداۋ كورسەتىپ وتىرعاندا, ءبىر جاعىنان جۇمىسشى ماماندىعىندا وقىعان جاستىڭ كەيىننەن كاسىپ اشىپ, ءىستىڭ كوزىن تابۋىنا دا مۇمكىندىگى بار. ءارى بالا كۇنىنەن شارۋاشىلىققا بەيىم جاستىڭ وسە كەلە جۇمىسشى ماماندىعىن دا تاڭدايتىنى ءسوزسىز.
مەملەكەت باسشىسى قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا «ونىمدىلىكتى كوبەيتۋ, ەكونوميكانىڭ اۋقىمدىلىعىن جانە تەحنولوگيالىق سيپاتىن ارتتىرۋ» كەرەكتىگىن ايتقان بولاتىن. مۇنىڭ ءبارى دە جۇمىسشى ماماندىعىنا بايلانىستى. بۇل رەتتە مەملەكەت تاراپىنان دا اتالعان ماماندىق يەلەرىن دايارلاۋعا ءجىتى كوڭىل بولىنۋدە. ماسەلەن, جامبىل وبلىستىق ءبىلىم باسقارماسىنا قاراستى №9 مەركى كوللەدجى بۇگىندە 7 ماماندىق, 11 بىلىكتىلىك بويىنشا جۇمىسشى ماماندار دايارلاپ كەلەدى. اتالعان مەكەمە 1953 جىلى №102 اۋىل شارۋاشىلىعىن مەحانيزاتسيالاۋ ۋچيليششەسى بولىپ اشىلعان. سودان بەرى ءتۇرلى قيىن-قىستاۋ كەزەڭدى باستان كەشىرگەن وقۋ ورنىندا قازىرگى كەزدە «تاماقتاندىرۋدى ۇيىمداستىرۋ», «ەلەكتر گازىمەن دانەكەرلەۋشى», «ەسەپتەۋ تەحنيكاسى جانە باعدارلامالىق قامتاماسىز ەتۋ», «فەرما شارۋاشىلىعى», «توكارلىق ءىس جانە مەتالل وڭدەۋ» جانە وزگە دە ماماندىقتار بويىنشا 601 جاس ءبىلىم الۋدا. «كوللەدجدە جالپى شتاتتىق كەستە بويىنشا 125 قىزمەتكەر جۇمىس اتقارادى. ولاردىڭ ىشىندەگى 92 قىزمەتكەر وقىتۋشىلار مەن وندىرىستىك وقىتۋ شەبەرلەرى. پەداگوگ كادرلاردىڭ 49-ى جوعارى ءبىلىمدى ماماندار», دەيدى اتالعان كوللەدج ديرەكتورى عالىمجان مامىرباەۆ.
الەمدىك تاجىريبەگە ساي, بۇگىندە كاسىپتىك ءبىلىم بەرۋدى دامىتۋ, ءبىلىم بەرۋدى دۇنيەجۇزىلىك ستاندارتتارعا سايكەستەندىرۋ وتە ماڭىزدى ماسەلە بولىپ وتىر. سول سياقتى, يننوۆاتسيالىق ەكونوميكانى قالىپتاستىرۋ دا ۇلكەن مىندەتتىڭ ءبىرى. اتالعان ماقساتتا №9 مەركى كوللەدجىنە «جاس مامان» جوباسى اياسىندا 313 144 200 تەڭگە ءبولىنىپ, وعان قاجەتتى بارلىق زاتتار الىنعان. ونىڭ ىشىندە 2 تراكتور, دانەكەرلەۋ اپپاراتى, كومباين, كاماز جانە وزگە دە جۇمىسشى ماماندىعىنا كەرەكتى تەحنيكالار بار. بۇل كۇندە اتالعان كوللەدج تۇلەكتەرىنىڭ الدى ءوز كاسىبىن اشىپ, اۋدان ەكونوميكاسىنىڭ دامۋىنا ۇلەس قوسىپ كەلەدى.
«Worldskills Zhambyl – 2018» بايقاۋىندا «اسپازدىق ءىسى» قۇزىرەتتىلىگى بويىنشا جۇلدەگەر اتانعان ادىلەت امانجول قازىرگى كەزدە اۋداندا «دونەر» جەكە كاسىپكەرلىگىن اشىپ, ءتۇرلى تاعام تۇرلەرىن ساتۋمەن اينالىسادى ەكەن. سول سياقتى, «Worldskills Zhambyl – 2018» بايقاۋىندا «اۆتوكولىكتى جوندەۋ, پايدالانۋ جانە قىزمەت كورسەتۋ قۇزىرەتتىلىگى» بويىنشا جۇلدە العان ولجاس ماركىم دە مەركى اۋدانىندا اۆتوموبيل جوندەۋ ورتالىعىن اشىپ, كاسىبىن دوڭگەلەتىپ وتىر. سونداي-اق ءار كەزەڭدە ءتۇرلى بايقاۋلارعا قاتىسىپ, جۇلدەگەر اتانىپ, جەتىستىككە جەتىپ جۇرگەن جاستار بارشىلىق.
قازىرگى كەزدە №9 مەركى كوللەدجىندە جاڭا الىنعان شەتەلدىك جانە وتاندىق تەحنيكالار اۋىل شارۋاشىلىعى سالاسىنىڭ قارقىندى دامۋى ماقساتىندا پايدالانىلۋدا.
«ال ساپالى قۇرال-جابدىقتار ستۋدەنتتەردىڭ تەحنيكالىق جانە كاسىپتىك ماماندىقتارعا دەگەن قىزىعۋشىلىعىن ارتتىرۋدا. ورتا بۋىن جۇمىسشى ماماندارىن ساپالى باسەكەگە قابىلەتتى ەتىپ دايىنداۋ ماقساتىندا «ديزەلدى قوزعالتقىشتاردى جوندەۋ جانە قىزمەت كورسەتۋ», «جەڭىل اۆتوكولىكتى جوندەۋ جانە قىزمەت كورسەتۋ», «دانەكەرلەۋ تەحنولوگيالارى» قۇزىرەتتىلىك ورتالىقتارى اشىلدى. سونىمەن قاتار كوللەدجدە ماماندىقتى وقىتۋعا ارنالعان 14 وقۋ كابينەتى, 5 شەبەرحانا, 4 زەرتحانا بار. وندىرىستىك وقۋ شەبەرحانالارى مەن وقۋ كابينەتتەرى زامان تالابىنا ساي جابدىقتالدى», دەيدى ع.مامىرباەۆ.
سونىمەن قاتار مەركى اۋدانىنىڭ اكىمى مەيىرحان ومىربەكوۆ كوللەدجگە 200 گەكتار جەر بەرىپ, قولداۋ كورسەتىپ وتىر ەكەن. مۇنداعى ماقسات – جاستاردى جۇمىسشى ماماندىعىنا باۋلۋ, تەحنيكالارمەن سول جەرگە ەگىن ەگىپ, ءونىم الۋ بولىپ وتىر. ءبىر سوزبەن ايتقاندا, جاستاردى وقىتۋدان بولەك, ءبارىن تاجىريبە جۇزىندە كورسەتۋ. ال تەحنيكالىق جانە كاسىپتىك ءبىلىم بەرۋ بويىنشا مامان دايىنداۋ ساپاسىن ارتتىرۋ دا نەگىزگى ماسەلەنىڭ ءبىرى. بۇل رەتتە كوللەدج تۇركيا مەملەكەتىندە, چەحيا رەسپۋبليكاسىنىڭ پراگا قالاسىندا جانە مالايزيا ەلىندە ورنالاسقان بىرقاتار تەحنيكالىق جانە كاسىپتىك وقۋ ورىندارىمەن تاجىريبە الماسۋدا.
جامبىل وبلىسى,
مەركى اۋدانى
