باس سانيتارلىق دارىگەردىڭ ايتۋىنشا, ۆاكتسينا العان ادامداردىڭ جاعدايى جاقسى, ەشبىر وزگەرىس بايقالمايدى. ەكپە ەكتىرۋ ءۇشىن كەلگەندەردىڭ ءبارى ەكپەنى الماس بۇرىن ارنايى مەديتسينالىق بايقاۋ كابينەتىندە دارىگەرلىك تەكسەرۋدەن ءوتىپ, ساۋالداما تولتىرىپ, ەكپەگە ءوز ەركىمەن كەلگەنىن راستايتىن قۇجاتقا قول قويىپتى. تەكسەرىستەن وتكەن سوڭ, رەسەيلىك «سپۋتنيك V», ياعني عىلىمي-فارماتسەۆتيكالىق اتاۋى «گام-كوۆيد-ۆاك» ۆاكتسيناسىن الدى. ءبىر قۇتى بەس ادامعا دەيىن بەرۋگە جەتەدى. ەكپە ارنايى مۇزداتقىشتا بەلگىلەنگەن تەمپەراتۋرادا ساقتالىپ, بولمە تەمپەراتۋراسىمەن ەرىتىلىپ, بىردەن بەرىلەدى.
سونىمەن بىرگە ءۇش كۇن بويى ۋچاسكەلىك دارىگەرلەر ۆاكتسينا العان ادامعا حابارلاسىپ, جاعدايىن ءبىلىپ تۇرۋى قاجەت. ەگەر ىندەتپەن اۋىرىپ تۇرعان ادامدار بولسا, ولار جارتى جىل بويى ۆاكتسينا الماۋلارى ءتيىس. قازاقستاندىق ۆاكتسينا بولسىن, رەسەيلىك بولسىن قۇرامى ءبىر. سوندىقتان قايسىسىن السا دا ادامدا ىندەتكە قارسى يممۋنيتەت بولادى. ۆاكتسينا 18 بەن 60 جاسقا دەيىنگى ادامدارعا ەرىكتى تۇردە بەرىلەدى. جۇكتى جانە بالا ەمىزەتىن ايەلدەرگە ەكپە الۋعا تىيىم سالىنادى. ۆاكتسينانى العان ادام كوپشىلىك جەرگە بارماي, ءوزىن وقشاۋلاعانى ابزال.
ءبىرىنشى كۇنى ۆاكتسينانى 120 ادام الدى. بۇل رەسەيلىك «سپۋتنيك V» پرەپاراتى كورشى مەملەكەتتە جاپپاي ەگىلىپ جاتىر. وبلىستىق كوپبەيىندى اۋرۋحاناسىنىڭ باس دارىگەرى نۇرلان جاروۆتىڭ ايتۋىنشا, ۆاكتسينانى اۋرۋحانادا ۆيرۋستى جۇقتىرىپ الۋ قاۋىپتىلىگى جوعارى مەديتسينا قىزمەتكەرلەرى الادى. اۋرۋحانانىڭ 73 قىزمەتكەرى اتالعان ەكپەنى ەرىكتى تۇردە الىپتى. ۆاكتسينا ەگەتىن قىزمەتكەرلەر الدىن الا وقىتىلىپ, پرەپاراتتى ساقتاپ, قولدانۋدىڭ تالاپتارىن ساقتاعان.
– مەن كوروناۆيرۋسپەن اۋىرعان جوقپىن, سوندىقتان وعان قارسى يممۋنيتەت قالىپتاستىرۋ ءۇشىن ۆاكتسينا الۋعا بەل بۋدىم. بۇل ەكپەنىڭ باسقا ەكپەلەرگە قاراعاندا ەشقانداي ايىرماشىلىعى جوق. جىل سايىن تۇماۋعا قارسى ەكپەنى بارشامىز الىپ ءجۇرمىز. باسقا دا اۋرۋلارعا قارسى ەكپەلەردى الۋعا ۋچاسكەلەرىمىزگە بارامىز. ەكپەدەن كەيىنگى جاعدايىم جاقسى. مەن ءوزىم ماماندىعىم بويىنشا مال دارىگەرىمىن, سوندىقتان يممۋنيتەت قالىپتاستىرۋ ءۇشىن نە كەرەكتىگىن جاقسى بىلەمىن. بۇل ۆاكتسينا بارشامىزعا كەرەك دەپ ويلايمىن, – دەدى وبلىس اكىمىنىڭ ورىنباسارى عالىمجان ابدىحالىقوۆ.
سونىمەن بىرگە كوكشەتاۋ قالالىق №1 ەمحاناسىندا دا ەكپە ەگۋ باستالدى. بۇل جەردە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ناريمان سىزدىقوۆ باستاعان ونداعان ادام كوروناۆيرۋس جۇقپاسىنا قارسى ەكپە الدى.
اقمولا وبلىسى
