ايماقتار • 03 اقپان، 2021

تۇركىستان وبلىسىندا «تۇران» فۋتبول كومانداسى قۇرىلدى

8 رەت كورسەتىلدى

وبلىس əكىمى ومىرزاق شوكەەۆتىڭ باستاماسىمەن جاساقتالعان «تۇران» كومانداسى ەل چەمپيوناتىنىڭ پرەمەر-ليگا ويىندارىنا جولداما العان كوماندا رەتىندە جاڭا ماۋسىمعا جان-جاقتى دايىندالۋدا.

– ەلىمىزدىڭ فۋتبول فەدەراتسياسىنىڭ اتقارۋشى كوميتەتى كەزەكتى وتىرىستا پرەمەر-ليگادا وينايتىن كوماندالار قۇرامىن 14-كە دەيىن كوبەيتۋ تۋرالى شەشىم شىعاردى. قازاقستاننىڭ ءبىرىنشى ليگاسىندا ءبىزدىڭ وبلىستان ءۇش كوماندا قاتىسقان بولاتىن. ولار – "ماقتاارال"، "ارىس" جانە "قىران" كوماندالارى. ءبىز وسى ۇزدىك ءۇش كوماندادان ىرىكتەۋ جۇرگىزىپ، وبلىستىڭ، ەلدىڭ نامىسىن قورعايتىن «تۇران» فۋتبول كومانداسىن جاساقتاپ جاتىرمىز. جاڭا فۋتبول كلۋبىن قۇرۋ مارتەبەسىنە وراي، وبلىس اكىمدىگى كوماندانىڭ جاڭا لوگوتيپىن قالىپتاستىرۋ ءۇشىن بايگە جاريالاپ وتىر. بايقاۋعا ەلىمىزدىڭ بارلىق ديزاينەرلەرى مەن سۋرەتشىلەرىن قاتىسۋعا شاقىرامىز. ءوڭىرىمىزدىڭ تاريحي، رۋحاني ەرەكشەلىگى مەن سالاۋاتتى ءومىر سالتىن ۇستانۋعا باعىتتايتىن، ۇزدىك دەپ تانىلعان لوگوتيپ اۆتورىنا «تۇران» فۋتبول كومانداسىنىڭ ويىندارىنا ءبىر جىلدىق تەگىن بيلەت سىيعا بەرىلەدى. بايقاۋعا «Coreldraw» باعدارلاماسىمەن دايىندالعان، وسى جىلدىڭ 10 اقپانىنا دەيىن جىبەرىلگەن جۇمىستار قابىلداناتىن بولادى»، دەدى وبلىس اكىمىنىڭ ورىنباسارى ساكەن قالقامانوۆ وڭىرلىك كوممۋنيكاتسيالار قىزمەتىندە وتكەن بريفينگتە.

جاڭا كوماندانىڭ باستى ەرەكشەلىگى – قۇرامى تەك جەرگىلىكتى سپورتشىلاردان جاساقتالعان. ياعني شەت مەملەكەتتەردەن لەگيونەرلەر شاقىرىلمايدى. بۇل – جەرگىلىكتى تالانتتى فۋتبولشىلاردىڭ ۇلكەن ارەناعا شىعىپ، ءوز قابىلەتتەرىن كورسەتۋگە مول مۇمكىندىك. سونداي-اق بريفينگتە وبلىستىق فۋتبول فەدەراتسياسىنىڭ پرەزيدەنتى حاكيم كوشقاليەۆ فەدەراتسيا جانىنان الداعى ۋاقىتتا وبلىستىق فۋتبول اكادەمياسى قۇرىلاتىنىن جەتكىزدى. «فۋتبول تۇركىستان وبلىسىندا دا كەڭ وركەندەپ، حالىقارالىق دەڭگەيدە داميتىن بولادى. وعان جۋىردا عانا اشىلعان «تۇركىستان ارەنا» ستاديونى تولىق جاۋاپ بەرە الادى. وڭىرىمىزدە وتاندىق فۋتبولدى جاڭعىرتۋ ماقساتىندا فۋتبول فەدەراتسياسى قۇرىلدى. جاڭادان قۇرىلعان فەدەراتسياسىنىڭ باستى ماقساتى – وبلىستاعى بالالار مەن جاسوسپىرىمدەر فۋتبولىن دامىتۋ. جاڭادان قۇرىلعان «تۇران» فۋتبول كلۋبىنا الداعى ۋاقىتتا جەڭىستەر تىلەيمىز»،  دەدى وبلىستىق فەدەراتسيا باسشىسى.

 

 

تۇركىستان وبلىسى

 

سوڭعى جاڭالىقتار

ۇقساس جاڭالىقتار