مەكتەپكە دەيىنگى ءبىلىم بەرۋ
ا. ايماعامبەتوۆ اتاپ وتكەندەي, بالاباقشالاردىڭ جۇمىسىن جەتىلدىرۋ اياسىندا ەلىمىزدە مەكتەپكە دەيىنگى ءبىلىم بەرۋدىڭ جاڭارتىلعان مەملەكەتتىك ستاندارتى, مەكتەپكە دەيىنگى وقىتۋ مەن تاربيەمەن قامتۋدى ۇلعايتۋ, بالاباقشالاردا قولايلى جاعدايلارمەن قامتاماسىز ەتۋ جانە ۆاۋچەرلىك قارجىلاندىرۋدى ەنگىزۋ قاراستىرىلعان كەشەندى جوسپار ازىرلەندى.
پرەزيدەنتتىڭ تاپسىرماسى اياسىندا مەكتەپكە دەيىنگى مەكەمەلەردى سۋمەن, ىستىق سۋمەن جانە كارىز جۇيەسىمەن قامتاماسىز ەتۋ ءۇشىن بىرقاتار شارالار جوسپارلانعان. بۇل ماسەلەلەر تۇركىستان, قوستاناي, شىعىس قازاقستان, سولتۇستىك قازاقستان, باتىس قازاقستان, اقمولا جانە اقتوبە وبلىستارىنداعى مەكەمەلەردە وزەكتى بولىپ وتىر. ءمينيستردىڭ ايتۋىنشا, پروبلەمالاردى بەلگىلەنگەن مەرزىمدە شەشۋ قاجەت.
ينكليۋزيۆتى ءبىلىم بەرۋ
مەملەكەت باسشىسىنىڭ تاپسىرماسىنا سايكەس, بيىل, ءمينيستردىڭ ايتۋىنشا, 50 بالاعا ارنالعان 1 پسيحولوگيالىق مەديتسينالىق-پەداگوگيكالىق كوميسسيا (پمپك) قاعيداتى بويىنشا ەرەكشە بالالارعا ارنالعان ۇيىمداردى اشۋ نورماتيۆتەرى جاڭارتىلادى.
«بيىل 46 پمپك جانە 25 تۇزەتۋ كابينەتىن اشۋ قاجەت. ەرەكشە بالالار ءۇشىن بۇل اۋاداي قاجەت ماسەلە. ءبىز ەرەكشە بالالارعا ارنالعان ءبىلىم بەرۋ ماسەلەلەرىن باقىلاۋعا الامىز», — دەپ اتاپ ءوتتى ا. ايماعامبەتوۆ.
بۇگىنگى تاڭدا, ونىڭ ايتۋىنشا, پمپك سانىن ارتتىرۋعا تۇركىستان, الماتى, قاراعاندى, اتىراۋ وبلىستارى مەن نۇر-سۇلتان قالاسى بارىنشا مۇقتاج.
ورتا ءبىلىم بەرۋ
ورتا ءبىلىم بەرۋ جۇيەسىندە بيىل وقۋ جۇكتەمەسىن ازايتۋ, ۇلگىلىك وقۋ باعدارلامالارىن جاڭارتۋ ماسەلەلەرى قارالاتىن بولادى. وقۋ باعدارلاماسىندا ماتەماتيكا, ينفورماتيكا جانە ءتىل پاندەرى باسىم بولادى. سونىمەن قاتار ءمينيستردىڭ ايتۋىنشا, قازاقستان تاريحى مەن دۇنيەجۇزى تاريحى بويىنشا بىرىڭعاي وقۋلىقتاردى ازىرلەۋ جانە ەنگىزۋ جۇمىستارى باستالدى.
ينفراقۇرىلىمدىق ماسەلەلەر
ءبىلىم بەرۋ جۇيەسىندە ينفراقۇرىلىمدىق ماسەلەلەر بۇرىنعىسىنشا وزەكتى بولىپ قالۋدا.
«بيىل مەملەكەت باسشىسىنىڭ تاپسىرماسى بويىنشا ءتورت مەحانيزم اياسىندا 200 مەكتەپ سالۋ جوسپارلانۋدا. بۇل – مەملەكەتتىك-جەكەمەنشىك ارىپتەستىكتى قولدانۋ, مودۋلدىك قۇرىلىمداردان مەكتەپتەر سالۋ, جەكە مەكتەپتەر جەلىسىن دامىتۋ جانە جاڭا مەكتەپتەردىڭ نىسانالى قۇرىلىسى», — دەدى ا. ايماعامبەتوۆ.
ءمينيستردىڭ ايتۋىنشا, 10 اقپانعا دەيىن جەرگىلىكتى اتقارۋشى ورگاندارمەن بىرلەسىپ مەكتەپ قۇرىلىسى بويىنشا جول كارتاسى بەكىتىلەدى.
«اكىمدەردەن بۇل ماسەلەنى ءبىر اپتا مەرزىمدە جەكە قاراستىرۋدى, وڭىرلىك جوسپاردى دايىنداپ, مينيسترلىككە ۇسىنۋدى سۇرايمىن», — دەپ اتاپ ءوتتى ا. ايماعامبەتوۆ.
جوعارى ءبىلىم بەرۋ جۇيەسى
ءمينيستردىڭ ايتۋىنشا, جوعارى ءبىلىم بەرۋ جۇيەسىندە گرانتتار ءبولۋ ماسەلەلەرى بويىنشا جۇمىس كۇشەيتىلەدى. مەملەكەتتىك تاپسىرىس سۇرانىسقا يە باعىتتارعا بولىنەتىن بولادى, كاسىپتىك باعدارلاۋ جۇمىسى كۇشەيتىلەدى, كاسىپتىك ستاندارتتار مەن كاسىپتەر اتلاسى نەگىزىندە ءبىلىم بەرۋ باعدارلامالارىن جاساۋ جوسپارلانۋدا.
«جوعارى ءبىلىم بەرۋ ساپاسىن ارتتىرۋ ءۇشىن پەداگوگتاردى, دارىگەرلەردى, زاڭگەرلەر مەن ساۋلەتشىلەردى دايارلاۋعا ەرەكشە بىلىكتىلىك تالاپتارىن ەنگىزۋ جوسپارلانۋدا. جوعارى وقۋ ورىندارىنىڭ اكادەميالىق ادالدىقتى بۇزعانى جانە سىبايلاس جەمقورلىق بۇزۋشىلىقتارى ءۇشىن اكىمشىلىك جاۋاپكەرشىلىگى ەنگىزىلۋدە», — دەدى ا. ايماعامبەتوۆ.
بۇدان باسقا, ليتسەنزيالاۋ جانە تەكسەرۋ ءتارتىبىن, زاڭناماعا وزگەرىستەر مەن تولىقتىرۋلار ەنگىزە وتىرىپ, ليتسەنزيالاردى قايتارىپ الۋ ءراسىمىن وزگەرتۋ, سونداي-اق ساپاسىز ءبىلىم بەرەتىن جوعارى وقۋ ورىندارىن جابۋ جوسپارلانىپ وتىر. كوللەدجدەرگە اكادەميالىق ەركىندىك بەرىلەدى.
«بۇل ولارعا ءبىلىم بەرۋ باعدارلامالارىن جاڭارتۋعا, وقىتۋ ساپاسىن ارتتىرۋعا, وقۋ كەزەڭىن قىسقارتۋعا جانە ەڭبەك نارىعى ءۇشىن مامانداردى جەدەل دايارلاۋدى جۇرگىزۋگە مۇمكىندىك بەرەدى», — دەپ اتاپ ءوتتى ا. ايماعامبەتوۆ.
سونداي-اق بيىل جوعارى ءبىلىم بەرۋ جۇيەسىندە وڭىرلەردى قولداۋ بويىنشا جوبانى ىسكە اسىرۋ جوسپارلانىپ وتىر.
«وڭىرلەردە جوعارى ءبىلىم بەرۋ ساپاسىن ارتتىرۋ ءۇشىن 15 وڭىرلىك جوو ىرىلەندىرىلەدى, وقۋ جانە عىلىمي زەرتحانالاردى جابدىقتاۋعا جانە جاڭا ءبىلىم بەرۋ باعدارلامالارىن ازىرلەۋگە قارجى ءبولىندى», — دەپ تۇيىندەدى ا. ايماعامبەتوۆ.
