كوللاجدى جاساعان امانگەلدى قياس, «EQ»
ادىلەتتى مەملەكەت قۇرىلماي جەر بەتىندە شىندىق سالتانات قۇرماق ەمەس. پرەزيدەنتتىڭ ء«بىز ادىلەتتى قوعام مەن ءتيىمدى مەملەكەت قۇرۋدى كوزدەپ وتىرمىز» دەگەن ءسوزى بارشا قاۋىمنىڭ ەرتەڭگە دەگەن سەنىمىن ارتتىرىپ, قاناتتاندىرا ءتۇستى.
زادى, باسشى باتىل بولماي, قوسشى باتىر بولمايدى. قاسىم-جومارت توقاەۆ بيلىك باسىنا كەلگەلى بەرى وڭ وزگەرىستەر جاسالىپ جاتىر. شىندىقتىڭ شىمىلدىعى ءتۇرىلىپ, ءالى ءبىر تۇسكە ەنە قويماعان قۇراق كورپە سەكىلدى قازاق قوعامىنىڭ بەت-بەينەسى ايقىن كورىنە باستادى.
جەلتوقسان كوتەرىلىسىندە الپاۋىت كۇشتەردىڭ ەلگە جاساعان زۇلمات سۇمدىعى مەن اقىرىپ تەڭدىك سۇراعان كوكورىم جاستارعا كورسەتكەن قورلىعى مەن زورلىعىنىڭ اششى شىندىعى كۇنى بۇگىنگە دەيىن اقيقات تىلىندە اشىق ايتىلماي بۇركەمەلەنىپ كەلىپ ەدى. مەملەكەت باسشىسىنىڭ «... ازاتتىقتىڭ العاشقى قارلىعاشتارى – جەلتوقسان قاھارماندارىنىڭ ازاماتتىق ەرلىگى لايىقتى باعاسىن الىپ, جوسپارلى تۇردە ناسيحاتتالۋى كەرەك» دەۋى تەگىن ەمەس. سەبەبى بۇنىڭ ارعى تەرەڭ استارىندا ەرلىكتى باعالاماۋ – ەلگە سىن دەگەن ەگەۋلى نايزا وتكىر وي جاتىر. وسىنىڭ وزىنەن-اق پرەزيدەنتتىڭ كەۋدەسىندە كوسەمدىككە ءتان قانداي اساۋ اعىستار ءجۇرىپ جاتقانىن اڭعارۋ قيىن ەمەس.
سوڭعى جىلدارى قازاق جەرىنە كوز الارتىپ, سۇعىن قاداعاندار كوبەيىپ, بۇل قاي قازاقتى دا الاڭداتا باستاعان ەدى. پرەزيدەنتتىڭ «جەرگە بايلانىستى ءبارىمىز ايقىن بىلەتىن جانە بۇلجىمايتىن اقيقات – قازاقتىڭ جەرى ەشبىر شەتەلدىكتىڭ مەنشىگىنە بەرىلمەيدى, ەشقاشان ساتىلمايدى» دەگەن بەرىك بايلاۋى سەنىمىن سەمسەر ەتىپ سەرتكە ۇستاعان ازامات ەردىڭ سوزىندەي ەل قۇلاعىنا ساڭقىلداپ جەتىپ, كوشەنىڭ الىپ-قاشپا جەلكەۋدە سوزىنە ءبىرجولا نۇكتە قويعان-دى.
راس, قاي ادام دا دۇنيەگە پاتريوت بولىپ كەلمەيدى. ادامدى پاتريوت ەتىپ قالىپتاستىراتىن كۇش: ءتالىم-تاربيە, ساپالى ءبىلىم, سانالى ورتا جانە جاۋاپكەرشىلىك. باۋىرجان مومىش ۇلى ەشكىم باتىر بوپ تۋمايدى, باتىردى سيتۋاتسيا جاسايدى دەگەن. كوكجال زامان ادامداردى كوكجال ەتپەي قويماعان.
وسى ورايدا ەلباسىنىڭ: «تاۋەلسىزدىكتى قورعاۋ ءۇشىن ءبىز ءتىرى بولۋىمىز كەرەك, ءتىرى بولۋ ءۇشىن ءىرى بولۋىمىز كەرەك, ءىرى بولۋ ءۇشىن ءبىلىمدى بولۋىمىز كەرەك» دەگەن اتالى ءسوزى ەسكە تۇسەدى. بۇل نە دەگەن ءسوز؟ بۇل ءىرى بولماي, ءبىلىمدى بولماي ىرگەلى ەلگە پانا, ءتاڭىرى سىيلاعان تاۋەلسىزدىگىمىزگە قورعان بولا المايمىز دەگەن ءسوز. ال پرەزيدەنت قاسىم-جومارت توقاەۆتىڭ جاستاردىڭ بويىنا مەملەكەتشىلدىك رۋحتى سىڭىرمەي, مەملەكەتىمىزدىڭ مەرەيى ۇستەم بولمايدى دەگەن ماعىنادا ايتىلعان ءۋاجى ەلباسىنىڭ اتالى سوزىنە ۇيلەسىپ, قازاقستاننىڭ قازىرگى ساياسي جۇيەسى زامان تالابىنا ساي دامىپ كەلە جاتقانىن ايقىنداي تۇسەدى.
زامانىندا بۇكىل دۇنيەنى ءدۇر سىلكىندىرگەن عۇندار نەگە مىقتى بولدى؟ ويتكەنى ولار قانداي جاعدايدا دا مىزعىماس بىرلىكتە عۇمىر كەشتى. ەندەشە, قاسىم-جومارت توقاەۆ مەملەكەت باسقارىپ تۇرعاندا ءبىز ءبارىمىز بىرگەمىز, شايقالمايدى ىرگەمىز. ەل بىرلىگى – تاۋەلسىزدىكتىڭ بەرىك قورعانى.
رافاەل نيازبەك,
اقىن, قازاقستاننىڭ ەڭبەك سىڭىرگەن قايراتكەرى
