بۇگىنگى كۇندە «ەل گازەتى» دەگەن ءسوز تىركەسى مىندەتتى تۇردە قوساقتالىپ ايتىلاتىن باسىلىممەن تانىستىعىم بالا كەزىمنەن باستالعان ەدى. مارقۇم اكەم قومار بۇرىنعى «سوتسياليستىك قازاقستان», قازىرگى «Egemen Qazaqstan» گازەتىن ەتەكتەي قىلىپ جايىپ تاستاپ, شۇقشيا وقىپ جاتۋشى ەدى. اكەمنىڭ وسى اياۋلى دا ىستىق بەينەسى سانامدا ماڭگى ساقتالىپ قالدى. ەل گازەتىنە دەگەن ەرەكشە قۇرمەتتىڭ قالىپتاسۋىنا جادىدا جاتتالىپ قالعان سول سۋرەتتىڭ دە ۇلكەن سەپتىگى ءتيدى-اۋ دەگەن وي ءجيى كەلەدى بۇگىندە...
البەتتە, عاسىر جاساعان گازەتتىڭ زامانا تامىرىن تاپ باسقان بۇگىنگى بەت-بەينەسى, ءمان-مازمۇنى قاتتى وزگەرگەن. شىنتۋايتىنا كەلگەندە, باسىلىم قازىر ءوزىنىڭ وركەندەۋ ءداۋىرىن باستان كەشىپ جاتىر دەپ باتىل تۇردە ايتۋعا بولادى. ونىڭ ءاربىر بەتىنەن بۇگىنگى كۇننىڭ ماڭىزدى ءھام وزەكتى دەگەن تاقىرىپتارى بار بوياۋ-بولمىسىمەن جارقىراي كورىنىس تاۋىپ كەلەدى. ەلدەگى وقيعالار ءوز الدىنا, گازەت الەمدىك كەڭىستىككە ەركىن قانات قاعىپ, حالىقارالىق دەڭگەيدە دارەجە بيىگىنە كوتەرىلە باستادى.
ءوزىم ەكى جىلدان بەرى باق, ءبىلىم, مادەنيەت جانە ونەر سالاسىنىڭ قىزمەتكەرلەرىنە ارنالعان «تۇلعا» سىيلىعىن تاعايىنداپ, وسى جوبانى جۇزەگە اسىرىپ كەلەمىن. ايتايىن دەگەنىم, اتالعان سىيلىق اياسىندا اقپارات سالاسىنىڭ ۇزدىكتەرىنە بەرىلەتىن باس جۇلدە «Egemen Qazaqstan» گازەتىنىڭ اتىن يەمدەنگەن. مۇنى مەن حالقىنا قالتقىسىز قىزمەت ەتىپ كەلە جاتقان بايىرعى باسىلىمعا دەگەن ءوزىمنىڭ قۇرمەتىم دەپ سانايمىن.
بۇگىن وسى وردالى باسىلىمنىڭ وتىز مىڭىنشى سانى جارىققا شىققان ەكەن. ولاي بولسا, جاڭاشىلدىقتىڭ جارشىسى, كەمەل ويدىڭ كەنىشى, اقيقاتتىڭ الداسپانى دەپ ىركىلمەي سيپاتتاۋعا تۇراتىن ءىرى گازەتتىڭ تاريحتى تاڭبالاعان تاعى ءبىر قادامىنا قۇتتى بولسىن ايتا وتىرىپ, «ەگەمەنىم» ەلمەن بىرگە جاساسىن!» دەگەن تىلەكتى شىن جۇرەكتەن جەتكىزگىم كەلەدى.
بەكزات التىنبەكوۆ,
مەتسەنات, قاراعاندى وبلىستىق
قوعامدىق كەلىسىم كەڭەسىنىڭ توراعاسى,
وبلىستىق ءماسليحاتتىڭ دەپۋتاتى
جەزقازعان قالاسى
