ەلوردالىق جەدەل قۇرامنىڭ قاتارىن تولىقتىرعان ۇلاندار وتكەن جىلدىڭ سوڭىندا وتان الدىنداعى بورىشتارىن وتەۋ ءۇشىن ەلىمىزدىڭ بارلىق وڭىرىنەن جاساقتالعان بولاتىن.
ساقتىقتا قورلىق جوق. سانيتارلىق-ەپيدەميالىق تالاپتار كۇشەيىپ جاتقانىمەن, ءتارتىپ پەن تىنىشىقتىقتى قامتاماسىز ەتۋ – الدىڭعى قاتارداعى مىندەتتەردىڭ ءبىرى ەكەنى ءسوزسىز.
ال اسكەري انت قابىلداۋ ءراسىمى – اسكەر ءومىرىنىڭ بۇلجىتپاي ورىندالاتىن زاڭدىلىعى. سوندىقتان بۇل شارادان تەگىس باس تارتۋ, البەتتە مۇمكىن ەمەس. سوندىقتان ساپتىق الاڭدا ساپ تۇزەگەن ساربازدار ءۇشىن سانيتارلىق تالاپتار ساقتالا وتىرىپ, سالتاناتتى سەرت بەرۋ ءراسىمى وتكىزىلدى. ادەتتەگىدەي راسىمگە جاس جاۋىنگەرلەردىڭ اتا-انالارى مەن تۋىستارى قاتىسقان جوق. ولار ءۇشىن ارنايى ۇلتتىق ۇلاننىڭ الەۋمەتتىك جەلىلەرىندەگى رەسمي پاراقشالارىنان تىكەلەي ەفير ۇيىمداستىرىلدى. ءبىر ەمەس, بىرنەشە ەفير جاسالىپ, ءار ۆزۆود ءۇشىن بولەك-بولەك تىكەلەي كورسەتىلىم وتكىزىلدى.
ساپ تۇزەگەن ساربازدار سىمداي تىزىلگەن سوڭ الاڭعا جاۋىنگەرلىك تۋ ەنگىزىلىپ, اسكەري ءبولىم كومانديرىنە جەكە قۇرامنىڭ اسكەري انت قابىلداۋعا دايىن ەكەندىگى باياندالدى. پولكوۆنيك نۇرلان مۇحامەدوۆ جاۋىنگەرلەرگە جىگەرلى ءسوزىن ارنادى.
– اسكەري انت قابىلداۋ سالتاناتى – ءاربىر اسكەري ءبولىم ءۇشىن ەرەكشە وقيعا بولىپ ەسەپتەلەدى. ويتكەنى ءدال وسى كۇننەن باستاپ جەكە قۇرام قاتارىن تولىقتىرعان جاس ساربازدار رەسمي تۇردە وتان قورعاۋشى اتانادى. اسكەري انت – ەل ازاماتتارىنىڭ كونستيتۋتسيالىق قۇقىعى عانا ەمەس, ءوز ەلى مەن جەرىن قورعاۋعا قابىلەتتىلىگىن بىلدىرەتىن ماڭىزدى ءراسىم. جاۋىنگەرلەرىمىز انت قابىلداي وتىرىپ, تاۋەلسىز مەملەكەتىمىزدىڭ قورعانى بولۋعا سەرت بەرەدى. ەندەشە وسى سەرتكە ادال بولىپ, وزدەرىڭىزگە جۇكتەلەتىن جاۋىنگەرلىك مىندەتتى ابىرويمەن اتقارۋلارىڭىزعا تىلەكتەسپىن! – دەدى قۇتتىقتاۋ سوزىندە قۇراما كومانديرى.
بۇدان سوڭ قاز-قاتار تىزىلگەن 700-دەن اسا سارباز ساپتىق الاڭدا سالتاناتتى مارشپەن ءجۇرىپ ءوتتى.
ايتا كەتەيىك, انت قابىلداعان جاس جاۋىنگەرلەر ەكى اپتادان كەيىن ىشكى ىستەر ورگاندارىنىڭ قىزمەتكەرلەرىمەن بىرلەسىپ, قالا تىنىشتىعىن ساقتاۋعا, باس شاھاردىڭ قوعامدىق ءتارتىبى مەن قاۋىپسىزدىگىن قامتاماسىز ەتۋگە, تۇرعىندار مەن ازاماتتاردىڭ قۇقىقتارىن قورعاۋعا جۇمىلدىرىلادى.
وسىلايشا, قۇقىقتىق ءتارتىپ اسكەرىنىڭ جاۋىنگەرلىك جولىن جالعاستىراتىن بولادى.
