“وسى جىلدار ىشىندە ەلىمىزدە ەلباسىمىز نۇرسۇلتان ءابىش ۇلى نازارباەۆتىڭ باستاماسىمەن بىرقاتار ساياسي, ەكونوميكالىق جانە الەۋمەتتىك رەفورمالار تابىستى ىسكە اسىرىلدى. كوپتەگەن تىڭ باعدارلامالار مەن جوبالار قولعا الىندى. سونىڭ بارىندە پارلامەنت ەرەكشە ءرول اتقاردى. سەبەبى, پارلامەنت ساپالى زاڭدار ارقىلى ۇلتتىق مۇددە جولىندا اتقارىلعان ءار جۇمىستىڭ قۇقىقتىق نەگىزىن قالىپتاستىرىپ وتىردى.
قازىرگى كەزەڭدە مەملەكەت باسشىسى قاسىم-جومارت كەمەل ۇلى توقاەۆتىڭ كەشەندى جاڭعىرۋ باعدارلاماسىن ءساتتى جۇزەگە اسىرۋدى زاڭنامالىق تۇرعىدان قامتاماسىز ەتۋ – پارلامەنتتىڭ باستى مىندەتى.
جالپى, شيرەك عاسىردا پارلامەنت وتانىمىزدىڭ ءوسىپ-وركەندەۋىنە ىقپال ەتەتىن 2940 زاڭ قابىلداعان ەكەن. ونىڭ 200-دەن استامىنا دەپۋتاتتار باستاماشى بولدى. حالىق قالاۋلىلارى تەك زاڭ شىعارىپ قانا قويماي, دەپۋتاتتىق ساۋالدار ارقىلى دا قوعامدى الاڭداتقان كوپتەگەن ماسەلەنىڭ وڭ شەشىلۋىنە اتسالىسىپ كەلەدى. ماسەلەن, 25 جىلدا تەك سەناتورلاردىڭ وزدەرى 2140 ساۋال جولداپ, حالىقتىڭ ءۇنىن بيلىككە جەتكىزە ءبىلدى.
سوڭعى كونستيتۋتسيالىق رەفورمانىڭ ناتيجەسىندە ەلىمىزدە پارلامەنتتىڭ وكىلەتتىگى كۇشەيتىلگەنى بەلگىلى. سول ارقىلى زاڭ شىعارۋ قىزمەتىنە تىڭ سەرپىن بەرىلدى. پرەزيدەنتىمىزدىڭ باستاماسىمەن پارلامەنتتىك وپپوزيتسيا ينستيتۋتىنىڭ زاڭمەن بەكىتىلۋى دە وكىلدى ورگاننىڭ بەدەلىن وسىرگەن ماڭىزدى قادام بولدى.
سونداي-اق, حالىقارالىق ىنتىماقتاستىقتى نىعايتۋ ماسەلەسىندە پارلامەنتتىڭ الار ورنى بولەك. بۇگىندە بارلىق سەرىكتەس مەملەكەتتەردىڭ پارلامەنتتەرىمەن تىعىز بايلانىس ورنادى. پارلامەنتارالىق ۇيىمدارمەن دە قارىم-قاتىناس جۇيەلى جولعا قويىلدى.
قازىرگى تاڭدا قوس پالاتالى پارلامەنت تولىق قالىپتاسىپ جانە ءوزىن بيلىكتىڭ نەگىزگى تارماقتارىنىڭ ءبىرى ەكەنىن ءىس جۇزىندە ناقتى دالەلدەپ ۇلگەردى. شىن مانىندە, زاڭ قابىلداۋ بارىسىندا ءماجىلىستىڭ دە, سەناتتىڭ دا ماڭىزى زور. بۇل جەردە, ەڭ الدىمەن, تۇتاس ەلدىڭ جانە ءار ءوڭىر مەن ءار ازاماتتىڭ مۇددەسى ەرەكشە نازارعا الىنادى. سول سەبەپتى, زاڭ جوبالارىن قاراۋ كەزىندە وسى ماسەلەلەرگە باسا ءمان بەرىلەدى.
پارلامەنتتە پالاتا وتىرىستارىنان بولەك, وزەكتى تاقىرىپتارعا ارنالعان پارلامەنتتىك تىڭداۋلار, ۇكىمەت ساعاتتارى, كوشپەلى وتىرىستار, دوڭگەلەك ۇستەلدەر, كوميتەتتەردىڭ وتىرىستارى جانە تاعى دا باسقا ءىس-شارالار جۇمىستىڭ نەگىزگى باعىتتارى بولىپ سانالادى.
ارىپتەستەرىمدى پارلامەنتتىڭ 25 جىلدىعىمەن قۇتتىقتاي وتىرىپ, زاڭ شىعارۋ بيلىگىن جۇزەگە اسىراتىن ەڭ جوعارى وكىلدى ورگان الداعى ۋاقىتتا دا تاۋەلسىز قازاقستاننىڭ ودان ءارى دامۋى ءۇشىن ناتيجەلى قىزمەت ەتە بەرەدى دەپ سەنەمىن”, دەلىنگەن ماۋلەن اشىمباەۆتىڭ جازبادا.
