ب. ساعىنتاەۆ بۇعان دەيىن تاۋداعى قاۋىپسىزدىكتى قامتاماسىز ەتۋ ءۇشىن مىڭداعان شاقىرىم تاۋ مارشرۋتىن تسيفرلاندىرىپ, 500 شاقىرىمىن اباتتاندىرۋ جونىندە ايتقاندارىن ەسكە سالدى.
«قاۋىپسىزدىكتى قامتاماسىز ەتىپ قانا قويماي, تاۋ جورىعىن قىزىقتى ءارى تانىمدى ەتۋ ءۇشىن گورەلنيك پەن ايۋساي شاتقالدارىندا ۆيزيت ورتالىقتار اشامىز», - دەپ جازدى الماتى اكىمى جەلىدەگى پاراقشاسىندا.
ب. ساعىنتاەۆ جۇمىس ساپارى كەزىندە ولاردىڭ الەۋەتىمەن تانىستى. مۇندا قاجەتتى جاعداي جاسالعان — تاماقتانۋ ورنى, سانيتارلىق-گيگيەنالىق توراپتار, جازعى تەرراسالار مەن تەگىن Wi-Fi بار. «تامىر» جابايى تابيعاتتا بولۋ مەكتەبىنىڭ ەرىكتىلەرى مەن كاسىبي الپينيستەرى تەگىن ەكولوگيالىق ساباقتار وتكىزەدى. تۋريستەرگە مارشرۋتتار تۋرالى اقپارات بەرىلىپ, قاۋىپسىزدىك پەن قورشاعان ورتاعا ۇقىپتى قاراۋدىڭ نەگىزدەرى تۇسىندىرىلەدى.
سونداي-اق, اكىم Ramada encore by Wyndham, Holiday Inn Express قوناق ۇيلەرىندە, Novotel living پەن Ibis برەندى ۇسىنعان «جەتىسۋ» كوپسالالى قوناق ءۇي كەشەنىنىڭ قۇرىلىس الاڭىندا بولدى. قوناق ءۇي ينفراقۇرىلىمىنداعى بۇل نىسانداردىڭ نەگىزگى ارتىقشىلىعى ساپا مەن باعا ساياساتىنىڭ ۇيلەسىم تابۋى جانە قولايلى جايلىلىق پەن ىڭعايلىعىندا. وسىلايشا تۋريستەردى ورنالاستىرۋ اۋقىمى كەڭەيتىلەدى.
بۇرىن حابارلانعانداي, ەكولوگيالىق ءتۋريزمدى دامىتۋ جانە تاۋلى ايماقتاردا ينفراقۇرىلىمدى قۇرۋ اياسىندا سوڭعى 4 جىلدا 1000 شاقىرىمنان استام تاۋلى باعىتتار تسيفرلاندىرىلدى. ونىڭ ىشىندە جالپى ۇزىندىعى 500 شاقىرىمعا جۋىق 36 باعىت اباتتاندىرىلدى.
تسيفرلاندىرىلعان باعىتتار ونلاين ءارى وففلاين رەجيمىندە GPS-Ranger جانە 2Gis ناۆيگاتورلارىندا قولجەتىمدى. ناۆيگاتسيانى جاقسارتۋ ماقساتىندا اقپاراتتىق ستەندتەر, باعىتتاردىڭ كۇردەلىلىگى تۋرالى اقپاراتتىق كورسەتىكشتەر ورناتىلعان.
2021 جىلى قوسىمشا 170 شاقىرىمعا جۋىق تاۋ سوقپاقتارىن اباتتاندىرۋ جانە 4 كەمپينگ ايماقتارىن قۇرۋ جوسپارلانۋدا. سونداي-اق تاۋ ءتۋريزمىن دامىتۋ بويىنشا ەكى جوبانى ىسكە اسىرۋ قولعا الىنادى. ولار — Medeu Resort تۋريستىك جانە Butakovka Med ساۋىقتىرۋ كەشەندەرى. بۇلاردان وزگە, «تسسكا» تاۋ شاڭعىسى بازاسىن مودەرنيزاتسيالاۋ جانە قالا تۇرعىندارىنىڭ سپورتتىق-اعارتۋشىلىق بەلسەندىلىگىن ارتتىرۋ جوسپارلانۋدا. مۇندا شاڭعىمەن سىرعاناۋعا, تيۋبيگنپەن اينالىسۋعا, جاز ايلارىندا ساداق اتۋعا, اتقا مىنۋگە جانە ۆەلوسيپەد تەبۋگە بولادى.
قوناق ءۇي بيزنەسىن دامىتۋ اياسىندا اعىمداعى جىلى 4 قوناق ءۇي كەشەنىن پايدالانۋعا بەرۋ جوسپارلانعان. بۇلار — 4 جۇلدىزدى Novotel Living, Ramada Encore by Wyndham قوناق ۇيلەرى جانە بيۋدجەتتىك ساياحاتشىلارعا ارنالعان 3 جۇلدىزدى IBIS, Holiday Inn Express قوناق ۇيلەر. جالپى, الماتىدا تۋريستەردى ورنالاستىراتىن 328 ورىن بار, ونىڭ ىشىندە قوناق ۇيلەر, حوستەلدەر جانە ساناتوريلەر.
