قازاقستان تەننيس فەدەراتسياسى تاراتقان اقپارات بويىنشا بۇل جارىستا مەلبۋرندە كارانتينگە بايلانىستى تولىق وقشاۋلانىپ, ءوز قوناقۇي بولمەلەرىنەن شىعا الماعان سپورتشىلار باق سىنايدى. ولاردىڭ اراسىندا قازاقستاندىقتاردان ەلەنا رىباكينا مەن يۋليا پۋتينتسەۆا بار. 2 اقپاندا باستالاتىن اتالعان دوداعا سونداي-اق كانادالىق بيانكا اندرەەسكۋ, شۆەيتساريالىق بەليندا بەنچيچ, بەلارۋس وكىلى ۆيكتوريا ازارەنكو, گرەكيالىق ماريا ساككاري جانە تاعى باسقا تانىمال تەننيسشىلەر قاتىسادى.
ايتا كەتەيىك, «ۇلكەن دۋلىعا» ساناتىنا جاتاتىن ءتورت ءىرى جارىستىڭ ءبىرى – اۋستراليانىڭ اشىق بىرىنشىلىگى 8-21 اقپان ارالىعىندا مەلبۋرندە وتەدى. ايتۋلى جارىستا قازاقستاننىڭ التى تەننيسشىسى ونەر كورسەتەدى. ولار – ەلەنا رىباكينا, يۋليا پۋتينتسەۆا, زارينا دياس, ياروسلاۆا شۆەدوۆا, الەكساندر بۋبليك جانە ميحايل كۋكۋشكين.
