جۋىردا عانا اقش-تاعى وقۋ-جاتتىعۋ جيىنىنا قاتىسىپ كەلگەن قوڭقاباەۆ ەلگە كەلە سالا, كاسىبي شارشى الاڭداعى ءۇشىنشى جەكپە-جەگىنە دايىندالىپ جاتىر. «جوسپار بويىنشا اقپان ايىنىڭ سوڭىندا كاسىپقوي مانسابىنداعى ءۇشىنشى جەكپە-جەگىم وتەتىن بولادى. اقش-تان كەلگەن بويدا سوعان دايىندىق ۇستىندەمىن. ودان كەيىن ۇلتتىق قۇرامامەن بىرگە حالىقارالىق جارىستارعا قاتىسۋدى جوسپارلاپ وتىرمىن. گەرمانيا, يسپانيا, بولگاريا ەلدەرىندە تۋرنيرلەر وتەدى. قايسىسىنا قاتىساتىنىمدى باپكەرلەر ۋاقىتى جاقىنداعاندا جاريالايدى. ايتا كەتەرلىگى, بيىلعى ماۋسىمداعى بار جۇمىس ەڭ باستى ماقساتىم – وليمپيادا چەمپيونى اتانۋ ءۇشىن جاسالادى», دەيدى بوكسشى.
قامشىبەك قوڭقاباەۆ جانە ۇلتتىق قۇرامانىڭ وزگە دە بوكسشىلارى اعا جاتتىقتىرۋشى مارات جاقيەۆتىڭ باسشىلىعىمەن اقش-تا ەكى اپتالىق جاتتىعۋ جيىنىن وتكىزدى.
