قازاقستان مەن بۇكىل الەم ءۇشىن 2020 جىل ەكونوميكالىق جانە الەۋمەتتىك دامۋدىڭ كۇردەلى كەزەڭىنە اينالدى. دۇنيەجۇزىلىك بانكتىڭ باعالاۋى بويىنشا 2020 جىلى الەمدىك ءىجو شامامەن 4,3 پايىزعا تومەندەدى. قازاقستاندا وتكەن جىلى ءىجو 2,6 پايىزعا قىسقاردى. سونىمەن قاتار قازاقستاندىق ءىجو-ءنىڭ جارتىسىنان استامىن قۇرايتىن قىزمەت كورسەتۋ سالاسى حالىق تابىسىنىڭ تومەندەۋى مەن تۇتىنۋشىلىق سۇرانىستىڭ السىرەۋىنەن 5,6 پايىزعا ازايدى.
پرەزيدەنت قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ۇلتتىق ەكونوميكا ءۇشىن اسا ماڭىزدى ماسەلەلەر قارالىپ, 2021 جىلعى دامۋ باسىمدىقتارى بەلگىلەندى.
مەملەكەت باسشىسى ەلىمىزدىڭ اۋماقتىق دامۋىنا ەرەكشە نازار اۋداردى. اتاپ ايتقاندا, ەلىمىزدىڭ كوپتەگەن وڭىرلەرىندە ساپالى ينفراقۇرىلىممەن قامتاماسىز ەتۋ ءالى دە وزەكتى ماسەلەلەردىڭ ءبىرى بولىپ وتىر. پاندەميا سالدارىنان بولعان داعدارىس كەزىندە بيزنەستى قولداۋ مەن جۇمىس ورىندارىن ساقتاپ قالۋ دا اسا ماڭىزدى. سونىمەن قاتار وتىرىستا مەملەكەت باسشىسى جەكە كاسىپكەرلەردى قولداۋعا باعىتتالعان شارالاردىڭ ءبىرى رەتىندە ونلاين كاسسالىق اپپاراتتار مەن POS-تەرمينالدار قولدانعان بيزنەس وكىلدەرىن سالىق تۋرالى ەسەپتى ۇسىنۋدان بوساتۋدى ۇسىندى.
ودان بولەك تۇراقتى اقپاراتتىق-كوممۋنيكاتسيالىق ينفراقۇرىلىم قۇرۋ دا كۇن تارتىبىندە ەكەنى بەلگىلى. ستاتيستيكا دەرەكتەرى بويىنشا جوعارى جىلدامدىقتى ينتەرنەتكە قوسىلۋ دەڭگەيى تۇراقتى ءوسۋ ديناميكاسىن كورسەتىپ وتىر: 2015 جىلعى 66,2 پايىزدان 2019 جىلى 86,8 پايىزعا دەيىن. سونىمەن قاتار ينتەرنەتكە قولجەتىمدىلىك ءالى دە كوڭىل كونشىتپەيدى. بۇل ءوز كەزەگىندە اۋىل تۇرعىندارىنىڭ تسيفرلى تەحنولوگيالاردى قولدانۋ كەزىندە قيىندىقتارعا تاپ بولىپ, ءوز مۇمكىندىكتەرىن تولىعىمەن قولدانا الماۋىنا اكەلدى. ادام كاپيتالىنىڭ دامۋى دا مەملەكەت نازارىنان تىس قالمايدى. ۇكىمەت وتىرىسىندا كۇردەلى كەزەڭدەگى باسىم باعىتتار مەن الداعى جوسپار ناقتىلانا ءتۇستى.
اننا الشانسكايا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ اعا عىلىمي قىزمەتكەرى
