دەنساۋلىق ساقتاۋ مينيسترلىگىنىڭ مالىمەتى بويىنشا, 27 119 ادام كورونوۆيرۋس ينفەكتسياسىنان ەمدەلۋدە, ولاردىڭ ىشىندە 6 492 پاتسيەنت ستاتسيوناردا, 20 627 ناۋقاس امبۋلاتوريالىق دەڭگەيدە ەم قابىلداۋدا. دەرتكە شالدىققانداردىڭ اراسىندا 266 ادامنىڭ جاعدايى اۋىر, 39 پاتسيەنتتىڭ جاعدايى وتە اۋىر, 38 ناۋقاس ءوجت اپپاراتىندا جاتىر.
جيىن بارىسىندا ۆيتسە-مينيستر كوروناۆيرۋس ۆاكتسيناسىن ساقتاۋ ءۇشىن ءوڭىر اكىمدىكتەرى توڭازىتقىش قۇرىلعىلارىن الىپ جاتقانىن اتاپ ءوتتى. ونىڭ ايتۋىنشا, ۆاكتسينانى جەتكىزۋ جۇمىسى نەگىزگى 4 كەزەڭنەن تۇرادى. ەڭ الدىمەن وندىرۋشىدەن بىرىڭعاي ديستريبيۋتوردىڭ قويماسىنا جەتكىزىلەدى. ودان كەيىن بىرىڭعاي ديستريبيۋتوردىڭ قويماسىنان وڭىرلەردەگى دەنساۋلىق ساقتاۋ باسقارمالارىنىڭ ءدارىحانا قويمالارىنا اكەلىنەدى. وسىدان كەيىن ءۇشىنشى كەزەڭدە وڭىرلەردەگى دەنساۋلىق ساقتاۋ باسقارمالارى بۇل ۆاكتسينالاردى قالالار مەن اۋداندارداعى مەديتسينالىق ۇيىمدارعا تاسىمالدايدى. ءتورتىنشى كەزەڭدە ۆاكتسينا سول مەديتسينالىق ۇيىمداردا ساپالى كۇيدە ساقتالۋى كەرەك.
«ۆاكتسينالاۋ ەكى كەزەڭنەن تۇرادى. العاشقى كەزەڭدە 0,5 مل مولشەرىندە سالىنادى. وسىدان كەيىن ەكىنشى كەزەڭدە 21 كۇننەن سوڭ 0,5 مل مولشەرىندە ەكىنشى كومپونەنت سالىنادى. ۆاكتسينا بۇلشىق ەتتىڭ ىشىنە جىبەرۋ ارقىلى عانا ەگىلەتىنىن اتاپ ءوتۋ كەرەك. ونى بۇلشىق ەتكە سالادى. يىقتىڭ سىرتقى بولىگىنە ەگەدى. ۆاكتسينانى سالماس بۇرىن ۆاكتسينا فلاكونى بولمە تەمپەراتۋراسىندا ساقتالۋى كەرەك. 0,5 مل دوزانى الاتىن ءبىر رەتتىك شپريتس قولدانىلادى. جىلىتىلعان فلاكوننان 3 مل-عا دەيىن دوزانى الۋعا بولادى. ياعني ءبىر فلاكون 5 ادامعا جەتەدى», دەدى م.شورانوۆ.
م.شورانوۆ كوروناۆيرۋس ينفەكتسياسىنا قارسى «سپۋتنيك V» ۆاكتسيناسىنىڭ قانداي جاعدايدا ەم بولمايتىندىعىن ايتىپ بەردى.
«ەڭ الدىمەن انامنەزدەگى اۋىر اللەرگيالىق رەاكتسيالار, جۇكتىلىك جانە بالا ەمىزۋ كەزەڭدەرى, 18 جاسقا دەيىنگى بالالار جانە 65 جاستان اسقان قارتتار. قازىرگى ۋاقىتتا اتالعان ساناتتاعى ادامداردى ۆاكتسينالاۋ تۋرالى دەرەكتەردىڭ از بولۋىنان, ءبىز وندىرۋشىلەر ۇسىناتىن ماتەريالداردى ۇنەمى زەرتتەپ وتىرامىز جانە وسى ساناتتارعا ۆاكتسينالاردى قاۋىپسىز جۇرگىزۋ تۋرالى جاڭا اقپارات تۇسكەن سايىن كورسەتكىشتەر كەڭەيتىلىپ وتىرادى», دەدى ول. ۆيتسە-مينيستر پرەپاراتتى باۋىر مەن بۇيرەكتىڭ سوزىلمالى اۋرۋى بارلارعا, قانت ديابەتى سىندى ەندوكريندىك جۇيەنىڭ ايقىن بۇزىلىسى بايقالعاندارعا ساقتىقپەن قولدانۋ قاجەتتىگىن ەسكەرتتى.
«قان ءتۇزىلۋ جۇيەسىنىڭ اۋىر سىرقاتتارىندا, ەپيلەپسيا, ينسۋلت جانە ورتالىق جۇيكە جۇيەسىنىڭ باسقا اۋرۋلارىندا, جۇرەك-قانتامىر جۇيەسى دەرتتەرىندە, باستاپقى جانە قايتالاما يممۋن تاپشىلىعى مەن اۋتويممۋندى, سونداي-اق, دەمىكپە جانە سوزىلمالى وبسترۋكتيۆتى وكپە اۋرۋلارىندا ساقتىق تانىتۋ قاجەت. ديابەتپەن جانە مەتابوليكالىق سيندروم, اتوپيا مەن ەكزەما اللەرگيالىق رەاكتسيالارى, سونداي-اق قاتەرلى ىسىك, قاتەرلى قان اۋرۋلارى بار ناۋقاستارعا ۆاكتسينا سالاردا اعزا جاعدايىن جەكەلەي قاراستىرۋ كەرەك. ياعني بۇل جاعدايلار ءابسوليۋتتى قارسى كورسەتىلىمدەرگە جاتپايدى جانە ۆاكتسينالاۋ كەزىندە ءار ناۋقاستىڭ جالپى جاعدايىنا بايلانىستى دەربەس تاعايىندالۋى ءتيىس», دەپ ءتۇسىندىردى ول.
سونىمەن قاتار ۆيتسە-مينيستر QazCovid-ءىn قازاقستاندىق ۆاكتسيناسىن ءبىرىنشى كەزەڭدە شامامەن 2 ملن دوزا كولەمىندە ءوندىرۋ جوسپارلانعانىن جەتكىزدى.
«ۆاكتسينا يناكتيۆيرلەنگەن ۆيرۋس پەن زيانسىز اديۋۆانتقا نەگىزدەلگەن, بۇل تەحنولوگيا ۋاقىتپەن تەكسەرىلگەن جانە ا گەپاتيتىنە, مەنينگوكوكك ينفەكتسياسىنا, تۇماۋعا, ءىش سۇزەگىنە, كەنە ەنتسەفاليتىنە جانە تاعى باسقا دا بۇرىننان قولدانىلىپ كەلە جاتقان ۆاكتسينالاردى وندىرۋدە قولدانىلادى», دەدى م.شورانوۆ. QazCovid-in ۆاكتسيناسىن COVID-19-عا قارسى كلينيكالىق زەرتتەۋدىڭ I جانە II فازالارىنىڭ ناتيجەسى ونىڭ قاۋىپسىز ەكەنىن كورسەتكەن. ءبىرلى-جارىم جاعدايلاردا ۆاكتسينا ەنگىزىلگەن جەردە قىزارۋ, ازداپ كۇيدىرۋ, شانشۋ اسەرلەرى بايقالعان. بۇل اعزانىڭ يممۋندىق جۇيەسىنىڭ ەنگىزىلگەن ۆاكتسيناعا رەاكتسياسى. اتالمىش بەلگىلەر زەرتتەۋ حاتتاماسىندا كۇتىلەتىن قۇبىلىس رەتىندە قاراستىرىلعان.
