ەڭ العاشقى بولىپ الەمنىڭ ءبىرىنشى راكەتكاسى اتانۋ قۇرمەتىنە بولەنگەن ويىنشى يليە ناستاسە. بۇل اتاققا ول 1973 جىلى قول جەتكىزدى. 27 جاستاعى رۋمىنيانىڭ وكىلى سول ماۋسىمدا رولان گارروستا باس جۇلدەنى ولجالاعان ەدى. ونىڭ الدىندا اقش-تىڭ اشىق بىرىنشىلىگىندە الدىنا جان سالماي, ۋيمبلدوننىڭ فينالىندا وينادى. بارلىعى 88 تۋرنيردە توپ جاردى. ناستاسەنىڭ جۇلدىزدى ءساتى تۋرا 40 اپتاعا سوزىلدى. سودان كەيىن رۋمىنيالىق تەننيسشى ءوز تۇعىرىن دجون نيۋكومبكە بوساتتى. الايدا اۋستراليانىڭ ورەنى مارتەبەلى اتاقتى ۇزاق ساقتاپ تۇرا المادى. سەگىز اپتادان كەيىن نيۋكومب تۇعىرىنان تايدى.
جەتپىسىنشى جىلداردىڭ ەكىنشى جارتىسىندا امەريكالىق دجيممي كوننورس پەن شۆەتسيالىق بورن بورگتىڭ داڭقى دۇركىرەدى. اقش-تىڭ يللينويس شتاتىنىڭ تۋماسى 268 اپتا بويى الدىنا جان سالمادى. ءبىر عاجابى, شيرەك عاسىر بويى ءتۇرلى تۋرنيرلەردە كۇش سىناسقان كوننورس 45 جاسقا قاراعان شاعىندا عانا ۇلكەن سپورتتان قول ءۇزدى. سول ارالىقتا ول اقش-تىڭ اشىق بىرىنشىلىگىندە – بەس, رولان گارروستا – ءتورت جانە ۋيمبلدوندا ەكى رەت تەڭدەسسىز دەپ تانىلدى. دجيممي بارلىعى 120 جارىستا جەڭىمپاز اتاندى. بۇل رەكوردتى ءالى ەشكىم جاڭارتا العان جوق. سكانديناۆيالىق ساڭلاق 109 اپتا ۇزدىكتەر كوشىن باستادى. بورگ اقش-تىڭ اشىق بىرىنشىلىگى مەن رولان گارروستى ءتورت رەتتەن ۇتتى. ەكى مارتە ۋيمبلدوندا قارسىلاس شاق كەلتىرمەدى.
سەكسەنىنشى جىلدارى الەمنىڭ ءبىرىنشى راكەتكاسى اتانۋ باقىتى ءۇش تەننيسشىگە عانا بۇيىردى. ولار – امەريكالىق دجون ماكينروي, چەحوسلوۆاكيالىق يۆان لەندل جانە شۆەتسيالىق ماتس ۆيلاندەر. ماكينروي – 170, لەندل 270 اپتا بويى ءوز تۇعىرلارىن بوساتقان جوق. كوپتەگەن ءدۇبىرلى دودالاردا دارالانعان ايتۋلى ويىنشىلاردىڭ ەسىمدەرى الەمدىك سپورت تاريحىندا التىن ارىپتەرمەن جازۋلى. ال ۆيلاندەر 20 اپتا عانا مىقتىلار ءتىزىمىنىڭ الدىڭعى لەگىندە تۇراقتاي الدى.
توقسانىنشى جىلدارى تۇراقتىلىق بولمادى. كوشباسشىلار بىرىنەن كەيىن ءبىرى اۋىستى. ولار – شۆەتسيالىق ستەفان ەدبەرگ (72 اپتا), گەرمانيالىق بوريس بەككەر (12 اپتا), امەريكالىقتار دجيم كۋرە (58 اپتا), پيت سامپراس (286 اپتا), اندرە اگاسسي (101 اپتا), اۋستريالىق توماس مۋستەر (6 اپتا), چيليلىك مارسەلو ريوس (2 اپتا), يسپانيالىق كارلوس مويا (2 اپتا), رەسەيلىك ەۆگەني كافەلنيكوۆ (6 اپتا) جانە اۋستراليالىق پاتريك رافتەر (1 اپتا).
عاسىرلار توعىسىندا مارات ءسافيننىڭ جۇلدىزى جارقىراي جاندى. 1980 جىلى ماسكەۋدە تۋعان تاتار جىگىتى 20 جاستان اسقان شاعىندا اقش-تىڭ اشىق بىرىنشىلىگىندە قارسىلاس شاق كەلتىرمەي, الەمنىڭ ءبىرىنشى راكەتكاسى اتاندى. بىراق بۇل تۇعىردا ول ۇزاق تۇراقتاعان جوق. نەبارى توعىز اپتا عانا الدىڭعى لەكتەن كورىندى. سوعان قاراماستان, ونىڭ ەسىمى وسىنداي دەڭگەيگە كوتەرىلگەن تۇڭعىش مۇسىلمان رەتىندە تاريحتا قالدى. 2009 جىلى ماراتتىڭ تۋعان قارىنداسى دينارا سافينا دا WTA رەيتينگىندە كوش باستادى. 2000 جىلداردىڭ العاشقى جارتىسىندا برازيليالىق گۋستاۆو كۋەرتەن (43 اپتا), اۋستراليالىق للەيتون حيۋيتت (80 اپتا), يسپانيالىق حۋان كارلوس فەررەرو (8 اپتا) جانە امەريكالىق ەندي رودديك (13 اپتا) الما-كەزەك ءبىرىنشى ساتىعا كوتەرىلدى.
سوڭعى 17 جىل كولەمىندە دۇنيەجۇزىلىك رەيتينگتە كوش باستاۋ باقىتى ءتورت تەننيسشىگە عانا بۇيىردى. سولاردىڭ اراسىندا ەڭ از مەرزىم كوش باستاعان ەندي ماررەي. 2016 جىلى الەمنىڭ ءبىرىنشى راكەتكاسى اتانعان ۇلىبريتانيالىق ويىنشى 41 اپتا الدىنا جان سالمادى. ال وزگە تەننيسشىلەردىڭ كورسەتكىشى تىپتەن كەرەمەت. ماسەلەن, رودجەر فەدەرەر 310 اپتا بويى تەڭدەسسىز دەپ تانىلدى. بۇل – رەكوردتىق كورسەتكىش! شۆەيتساريانىڭ ماقتانىشى «ۇلكەن دۋلىعا» ساناتىنداعى جارىستاردا 20 مارتە توپ جاردى. ۋيمبلدون دوداسىندا سەگىز رەت دارا شىقتى. بۇل دا رەكوردتىق ناتيجەلەر! اسا ءىرى حالىقارالىق تۋرنيرلەردە فەدەرەر 103 رەت باس جۇلدەنى ولجالادى.
يسپانيالىق رافاەل نادال 209 اپتا شاشاسىنا شاڭ جۇتىرمادى. پيرەنەي تۇبەگىنىڭ تۇلەگى روللان گارروستى 13 مارتە ۇتتى. «ماستەرس» تۋرنيرلەرىندە 35 رەت جەڭىسكە جەتتى. وسى كورسەتكىشتەر جاعىنان جەر بەتىندەگى ەشبىر تەننيسشى نادالمەن تەڭەسە المايدى. بۇگىنگى تاڭدا اتر رەيتينگىندە ءبىرىنشى ورىندى يەلەنىپ وتىرعان نوۆاك دجوكوۆيچ 306 اپتا بويى ەشكىمگە ەسە جىبەرمەي كەلەدى. ياعني ول رەكوردتىق كورسەتكىشتى جاڭارتۋعا شاق قالدى. ەگەر 33 جاستاعى سەربيانىڭ ساڭلاعى وسى باعىتىنان جاڭىلماسا, جاسى 40-قا تاياپ قالعان رودجەر فەدەرەردى الداعى ناۋرىز ايىندا باسىپ وزۋى ابدەن مۇمكىن. تاعى ءبىر ايتا كەتەرلىك جايت, فەدەرەر, نادال جانە دجوكوۆيچ – «ۇلكەن دۋلىعا» تۋرنيرلەرىنىڭ بارلىعىندا توپ جارعان جەر-جاھانداعى ساناۋلى عانا تەننيسشىلەر.
بايىپتاپ قاراساڭىزدار, جارتى عاسىرعا جۋىق ۋاقىت ارالىعىندا نەبارى 25 تەننيسشىگە عانا الەمنىڭ ءبىرىنشى راكەتكاسى اتانۋ باقىتى بۇيىرعان ەكەن. وسى ورايدا, اقش-تىڭ كوشى وزگەلەردەن ىلگەرى ەكەنىن ايتا كەتكەن ابزال. ءار جىلدارى امەريكالىق التى ورەن اتر رەيتينگىندە الدارىنا جان سالمادى. سوڭعى رەت ولار وسىدان 18 جىل بۇرىن سونداي قۇرمەتكە بولەندى. شۆەتسيا, اۋستراليا جانە يسپانيانىڭ سايىپقىراندارى ءۇش رەتتەن تەڭدەسسىز دەپ تانىلدى.
قازاقستان قۇراما كومانداسىنىڭ مۇشەلەرى جايىندا ايتار بولساق, ەڭ ۇزدىك ناتيجە اندرەي گولۋبەۆكە تيەسىلى. ول 2010 جىلدىڭ قازان ايىندا اتر تىزىمىندە 33-ساتىعا دەيىن كوتەرىلدى. بىراق جەرلەسىمىز «ۇلكەن دۋلىعا» دودالارىندا ەكىنشى اينالىمنان ءارى اسا العان جوق. وعان قاراعاندا ميحايل كۋكۋشكيننىڭ اياقالىسى ءتاۋىر بولدى. ول 2012 جىلى اۋستراليانىڭ اشىق بىرىنشىلىگى مەن 2019 جىلى ۋيمبلدوننىڭ ءتورتىنشى كەزەڭىندە ونەر كورسەتتى. دەسەك تە الەمدىك رەيتينگتە كۋكۋشكين 39-ورىندى ەنشىلەۋمەن شەكتەلدى. بۇل ناتيجەگە وتانداسىمىز 2019 جىلدىڭ اقپان ايىندا قول جەتكىزگەن ەدى.
