قازاق ادەبيەتىندەگى شوقتىعى بيىك شىعارمالار مەن الەم ادەبيەتى جاۋھارلارىنىڭ ۇزدىك اۋدارمالارىن باسىپ شىعارۋدى ماقسات تۇتقان جوبا 2020 جىلدىڭ باسىندا قولعا الىنىپتى. جوسپار بويىنشا بىلتىر «Qasym» باسپا ۇيىنەن 50 كىتاپ جاريالانۋ كەرەك-ءتى. الايدا شارتاراپتى شارلاعان كوروناۆيرۋس پاندەمياسىنا بايلانىستى 22 كىتاپ باسىلىپ شىققان. ارقايسىسى 1000-2000 دانامەن جاريالانىپ, كەي وقىلىمدى كىتاپتار 2-3 رەت قايتا باسىلىپتى.
ال جارىققا شىعاتىن كىتاپتاردىڭ ءتىزىمى جازۋشى, كىتاپحاناشىلارمەن اقىلداسىپ شەشىلەدى ەكەن. باسپا قازاق ادەبيەتىنىڭ ەڭ جاقسى شىعارمالارى مەن الەم ادەبيەتىنىڭ قازاق تىلىندەگى ءساتتى اۋدارمالارىنان بولەك ءتيىستى قالاماقىسىن تولەپ, ارنايى اۋدارمالار دا جاساتادى. ماسەلەن, اۋدارماشى كەنجەباي احمەتوۆ م.بۋلگاكوۆتىڭ «يت جۇرەگى», ل.تولستويدىڭ ء«ومىر تۋرالى» (الداعى ۋاقىتتا شىقپاق) شىعارمالارىن اۋداردى. بۇدان بولەك تاكەن الىمقۇلوۆتىڭ 60-جىلدارى اۋدارعان «كىشكەنتاي حانزاداسى» دا (اۆتورى انتۋان دە سەنت-ەكزيۋپەري) بار. سونداي-اق بەردىبەك سوقپاقباەۆتىڭ ەڭ سوڭعى جازىلعان شىعارماسى «ەرگەجەيلى ەلىنە ساياحات» العاش كىتاپ بولىپ شىعىپ وتىر.
قازاق ادەبيەتىنىڭ 50-جىلداردان باستاپ 80-جىلدارعا دەيىنگى كەزەڭىندە الەم ادەبيەتىنەن كوپتەگەن اۋدارما جاسالدى. بىراق تاۋەلسىزدىك جىلدارىنان بەرى ول شىعارمالار كىتاپ بولىپ قايتا باسىلىپ شىققان جوق. «Qasym kitaphanasy» سەرياسىنىڭ كوزدەگەن نەگىزگى ماقساتتارىنىڭ ءبىرى دە وسى. جانە قازاق ءھام الەم ادەبيەتىنىڭ جاقسى اۋدارمالارى مەن شىعارمالارىن ءبىر سەرياعا جيناۋ.
ايتا كەتەيىك, بۇل جوبامەن باسىلىپ شىققان كىتاپتار وتاندىق كىتاپ دۇكەندەرىندە جانە «Akel.kz» ينتەرنەت كىتاپ دۇكەنىندە دە ساتىلادى.
