اتالعان شاراعا ەلىمىزگە بەلگىلى قوعام قايرەتكەرلەرى, ءباسپاسوز سالاسىنىڭ مايتالماندارى قاتىستى. اتاپ ايتساق, ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى, پۋبليتسيست قايرات ساق, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, «باس رەداكتورلار كۋلبىنىڭ» ورىنباسارلارى, قر ۇعا اكادەميگى, قازاقستان ۇلتتىق جاراتىلىستانۋ عىلىمدارى اكادەمياسىنىڭ ۆيتسە-پرەزيدەنتى كارىمبەك قۇرمانالى, «ادىلەت.رۋحاني جاڭعىرۋ» گازەتىنىڭ باس رەداكتورى مۇراتبەك توقتاعازين, «Sakhara» رەسپۋبليكالىق قوعامدىق-ساياسي گازەتى باس رەداكتورىنىڭ ورىنباسارى كەنجەبولات جولدىباي, «وتانداستار قورى» كەاق-نىڭ رەسمي وكىلى, جۋرناليست ەركىن بايعابىل ۇلى, قازاقستان جازۋشىلار وداعىنىڭ نۇر-سۇلتان قالالىق فيليالىنىڭ توراعاسى, اقىن داۋلەتكەرەي كاپ ۇلى, «Egemen Qazaqstan» گازەتى باسقارما توراعاسىنىڭ ورىنباسارى ەربولات قامەنوۆ, ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالباەۆا جانە فيليولوگيا عىلىمدارىنىڭ كانديداتى, دوتسەنت گۇلميرا اشىربەكوۆا قاتىسىپ, جارىق كورگەن جيناققا وڭ باعاسىن بەردى.
قازاقستاننىڭ حالىق جازۋشىسى قالتاي مۇحامەدجانوۆ نەگىزىن قالاعان Túrkistan حالىقارالىق گازەتى 1994 جىلعى 28 قاڭتاردان باستاپ شىعا باستادى. سول ۋاقىتتان بەرى باسىلىم بەتىندە ساياسي-قوعامدىق, تاريحي-تانىمدىق, رۋحاني, مادەني تاقىرىپتارداعى ساراپتامالىق ماقالالار, ورامدى ويلار مەن پاراساتتى پايىم-پىكىرلەر ۇزبەي جاريالانىپ كەلەدى. اسىرەسە, تۋىسقان تۇركى تىلدەس حالىقتاردىڭ ىنتىماقتاستىعى مەن الىس-جۋىقتاعى قانداستار ماسەلەسى دە نازاردان تىس قالعان ەمەس. ەلدىك سيپاتى جاعىنان وزىندىك باعىتى انىق قالىپتاسقان, قازاق باسپاسوزىندە ورنى بار باسىلىم تاۋەلسىزدىك جىلدارىنىڭ ءاربىر ەلەۋلى وقيعاسىن تۇراقتى جازىلىپ كەلەدى.
«ەل تاۋەلسىزدىگىن نىعايتۋدا قازاق ءباسپاسوزىنىڭ دە قوسقان ۇلەسى زور. سونىڭ ىشىنىدە حالىقارالىق Túrkistan گازەتىنىڭ ورنى ەرەكشە. از جىلدىڭ ىشىندە تەك ەلىمىز عانا ەمەس, كۇللى تۇركى تىلدەس حالىقتاردىڭ ىنتىماقتاستىعىنىڭ ءۇنجارياسىنا اينالدى. ال بۇگىنگى تۇساۋى كەسىلىپ وتىرعان جيناق قالىڭ وقىرمانعا رۋحاني ازىق بولسا, قازاق ءباسپاسوزىن زەرتتەۋشىلەرگە جانە جۋرناليستيكانىڭ وقۋىنا ەندى تۇسكەن جاس تۇلەكتەر ءۇشىن تاپتىرماس قۇرال. مۇنداي جيناقتى جاي گازەت شىعارا المايدى. تەك ىرگەلى باسىلىمداردىڭ مۇمكىندىگى جەتەتىن دۇنيە», – دەدى ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق.
سونىمەن قاتار فيليولوگيا عىلىمدارىنىڭ كانديتاتى, دوتسەنت گۇلميرا اشىربەكوۆا باسىلىم جايلى ارانيى عىلىمي بايانداما جاسادى. شاراعا زيالى قاۋىم وكىلدەرىمەن بىرگە ل.گۋميلەۆ اتىنداعى ەۋرازيا ۇلتتىق ۋنيۆەسيتەتى جۋرناليستيكا جانە ساياساتتانۋ فاكۋلتەتىنىڭ ستۋدەنتتەرى دە قاتىستى.
«تاۋەلسىزدىك جىلدارىندا Túrkistan گازەتىنىڭ كوتەرگەن جۇگى مول. قازىر ساراپتامالىق ماتەريالدارى وسى گازەتتەن كوپ وقيمىن. اسىرەسە, الەمنىڭ ءار تۇكپىرىندە جۇرگەن قازاقتار جايلى شىققان وتە قىزىقتى سۇحباتتاردى وقىپ, ريزا بولدىم. سونىمەن قاتار «ATAJURT» جوباسىن ايىرىقشا ايتۋعا بولادى. بۇل – جوبا ەلىمىزدىڭ ۇلتتىق دەموگرافياسى ءۇشىن اسا قاجەتتى باستاما», – دەدى «باس رەداكتورلار كلۋبىنىڭ» ۆيتسە-پرەزيدەنتى, «Sakhara» رەسپۋبليكالىق قوعامدىق-ساياسي گازەتى باس رەداكتورىنىڭ ورىنباسارى كەنجەبولات جولدىباي.
Túrkistan حالىقارالىق گازەتىنىڭ جيناعىنا تاۋەلسىزدىك جىلدارى باسىلىم بەتىندە جاريالانعان تاڭداۋلى ماتەريالدار ىرىكتەلىپ ەنگىزىلگەن. ەلدىك بىرلىككە, ۇلتتىق تۇتاستىققا ۇندەيتىن سۇبەلى ماقالا, سۇحباتتار توپتاستىرىلعان كىتاپ ەل تاۋەلسىزدىگىنىڭ شەجىرەسى ىسپەتتى.
