ايماقتار • 28 قاڭتار، 2021

وسكەمەندە العاشقى اتىس جاتتىعۋى ءوتتى

79 رەت كورسەتىلدى

وتان الدىنداعى بورىشىن وتەۋگە اتتانعان بوزبالا ءبىرىنشى اسكەري فورما كيۋدى ارمان ەتسە، ەكىنشىدەن قولىنا قارۋ الىپ، ساپتا ءجۇرۋدى ماقتان ەتەدى. قارۋ دەمەكشى، وسكەمەن گارنيزونىندا اسكەري تەحنيكالىق مەكتەبىنىڭ كۋرسانتتارى العاش رەت اسكەري قارۋدان وق اتۋ جاتتىعۋلارىن ورىندادى، دەپ حابارلايدى Egemen.kz

اسكەري ومىرگە قادام باسقان جاس جەتكىنشەكتەر اتالمىش جاتتىعۋلار بارىسىندا اتىس قارۋىن پايدالانۋ مەن دۇرىس دالدەپ اتۋدى ۇيرەندى. اتىس جاتتىعۋىنىڭ اعا جەتەكشىسى، مايور سايات مولداحانوۆ پەن زاپاستاعى كاپيتان مەدەت سەيىتقۇماروۆ، زاپاستاعى اعا لەيتەنانت دارحان قاسىموۆ كۋرسانتتاردى اتۋدىڭ ءادىس-تاسىلدەرىنە باۋلىپ، قاۋىپسىزدىك ەرەجەلەرىنىڭ ساقتالۋىن ءجىتى قاداعالادى.

وبلىستىڭ ءار وڭىرىنەن كەلگەن اسكەري-تەحنيكالىق مەكتەپتىڭ كۋرسانتتارى اراسىنان اتىس جاتتىعۋىن ورىنداۋدا جوعارى ناتيجەگە قول جەتكىزگەن 1-ۆزۆود كۋرسانتتارى اقجول قالىم ۇلى، دانيار نۇرۇمقانوۆ، كونستانتين سكوريكوۆ جانە 2-ۆزۆود كۋرسانتتارى سەرگەي نەمچەنكو مەن قانات قۇسمانعازينوۆ بولدى.

– اسكەري ءومىردىڭ تىنىس-تىرشىلىگىنە ۇيرەنىپ قالدىق. بۇگىن العاش رەت اتىس قارۋىن قولىمىزعا الىپ، جاتتىعۋلاردى ورىندادىق. اتىس جاتتىعۋىنىڭ ناتيجەسىندە جوعارى ۇپاي جيناپ، جاقسى باعا الدىم. قىرىق كۇندىك كۋرستى تامامداعان سوڭ كەلىسىمشارت بويىنشا اسكەري قىزمەتكە بارۋ جوسپارىمدا، دەدى اسكەري-تەحنيكالىق مەكتەبىنىڭ كۋرسانتى اقجول قالىم ۇلى.

ءبىر اي ىشىندە ستاندارتتى باعدارلامالار بويىنشا كۋرسانتتار ءار ءتۇرلى جاتتىعۋلارعا قاتىسىپ، بىلىكتىلىكتەرىن، بىلىمدەرىن شىڭداي تۇسپەك.

وسكەمەن

سوڭعى جاڭالىقتار

ۇقساس جاڭالىقتار