بىلتىر جەكە ينۆەستيتسيالار ەسەبىنەن 58 جاڭا قىزمەت كورسەتۋ نىسانى سالىندى. ەكى وبەكت «B» كاتەگورياسىنا ساي كەلەدى. وعان جانارماي قۇيۋ بەكەتتەرى, مەيمانحانالار, تەحنيكالىق قىزمەت كورسەتۋ ستانتسيالارى, اۆتوكولىك جۋ ورىندارى, مەديتسينالىق جانە تاماقتانۋ, بولشەك ساۋدا پۋنكتتەرى مەن سانيتارلىق توراپتار كىرەدى. جول بويىنداعى سەرۆيستىڭ 21 نىسانى «س» كاتەگورياسىنا جاتقىزىلادى. مۇندا كۇزەتىلەتىن تۇراقتار, تاماقتانۋ نۇكتەلەرى, سانيتارلىق توراپتار ورنالاسقان. ال 35 نىسان «D» كاتەگورياسىنا ساي جاراقتالعان. وعان جانارماي قۇيۋ بەكەتتەرى, سانيتارلىق توراپتار مەن بولشەك ساۋدا پۋنكتتەرى كىرەدى. بۇدان بولەك, 2020 جىلى سانيتارلىق-گيگيەنالىق توراپتاردىڭ 13 بىرلىگى تۇرعىزىلدى. ونىڭ 10-ى اۆتوموبيل جولدارىن رەكونسترۋكتسيالاۋ اياسىندا ورناتىلسا, ۇشەۋى جەكە ينۆەستيتسيالاردىڭ ەسەبىنەن قويىلدى.
وتكەن جىلدىڭ قورىتىندىسى بويىنشا ەڭ جاقسى جول بويىنداعى قىزمەت كورسەتۋ نىساندارى اتىراۋ وبلىسىندا بولىپ شىقتى. ونداعى وبەكتىلەردىڭ 81%-ى ۇلتتىق ستاندارت تالاپتارىنا ساي كەلەدى. بۇدان سوڭ 71%-بەن قوستاناي وبلىسى تۇر. ال ۇزدىك ۇشتىكتى 69%-بەن اقمولا وبلىسى تۇيىندەيدى.
ايتا كەتەيىك, جول بويىنداعى سەرۆيستى دامىتۋ باستى مىندەتتەردىڭ ءبىرى. ينفراقۇرىلىمدى دامىتۋعا باعىتتالعان «نۇرلى جول» مەملەكەتتىك باعدارلاماسىنىڭ اياسىندا 2025 جىلعا دەيىن 24 مىڭ شاقىرىم تاسجول جول بويىنداعى قىزمەت كورسەتۋ نىساندارىمەن قامتىلاتىن بولادى.
