قالا اكىمى ب.ساعىنتاەۆ Instagram-داعى ءوزىنىڭ پاراقشاسىندا الماتىدا وقۋشى ورىندارىنىڭ تاپشىلىعىن ازايتۋ بويىنشا جۇرگىزىلىپ جاتقان جۇمىستار تۋرالى ايتتى. ول تۇركسىب اۋدانىنىڭ قايرات ىقشاماۋدانىنداعى 1500 ورىنعا ارنالعان مەكتەپ قۇرىلىسىنىڭ الاڭىندا جانە بوستاندىق اۋدانىنداعى 425 ورىندى №199 مەكتەپتىڭ جاڭا كورپۋسىندا بولدى.
«بيىل جىل سوڭىنا دەيىن قالا بيۋدجەتى ەسەبىنەن ناۋرىزباي اۋدانىنداعى قالقامان-2, الاتاۋ اۋدانىنداعى نۇركەنت, مادەنيەت, سايالى, توميريس, دارحان ىقشاماۋداندارىندا جانە جوعارىدا اتالعان تۇركسىب اۋدانىنىڭ قايرات ىقشاماۋدانىنداعى 8 مەكتەپتى تاپسىرۋدى جوسپارلاپ وتىرمىز», دەپ جازدى ب. ساعىنتاەۆ.
قىركۇيەككە قاراي بوستاندىق, اۋەزوۆ, المالى, جەتىسۋ اۋداندارىنداعى 17 مەكتەپتىڭ جانىنان جاڭا كورپۋستار سالىنادى. بۇل رەتتە مەكتەپ جانىنداعى ايماقتار دەنە شىنىقتىرۋ جانە سپورتپەن شۇعىلدانۋ ءۇشىن جاڭا سپورت الاڭدارى مەن ستاديوندار سالۋ ارقىلى مودەرنيزاتسيالانادى. جالپى جىل قورىتىندىسى بويىنشا 20 700 وقۋشى ورنى اشىلاتىن بولادى.
اۋەزوۆ پەن تۇركسىب اۋداندارىندا تاعى 2 مەكتەپ جەكە ينۆەستيتسيالار ەسەبىنەن سالىنادى.
ب. ساعىنتاەۆ تۇركسىب اۋدانىنداعى جاس قانات ىقشاماۋدانىندا 150 ورىنعا ارنالىپ سالىنىپ جاتقان دەنە شىنىقتىرۋ-ساۋىقتىرۋ كەشەنىنىڭ قۇرىلىس الاڭىندا بولدى. بيىل مەدەۋ, جەتىسۋ, الاتاۋ اۋداندارىندا وسىنداي تاعى 5 كەشەن سالىنۋدا.
الماتى اكىمى بارلىق قۇرىلىس-مونتاج جۇمىستارىن جىل سوڭىنا دەيىن اياقتاۋدى تاپسىردى. ونىڭ ايتۋىنشا, جاڭا الماتىنىڭ شەتكى ىقشاماۋداندارىندا تۇراتىن بالالاردىڭ زاماناۋي جانە جايلى جاعدايلاردا سپورتپەن شۇعىلدانۋلارى ءۇشىن بارلىق مۇمكىندىكتى جاساۋ قاجەت.
