حالىقارالىق باسىلىمدار گونكونگتىڭ ازاتتىعى ءۇشىن كۇرەسىپ جۇرگەن بەلسەندىلەردىڭ اقش-تان پانا سۇراپ كەلگەنىن حابارلادى. بەلسەندىلەر قارجى حابىنان مۇحيت اسىپ كەلىپ, ازاتتىق ءۇشىن كۇرەستى جالعاستىراتىنىن ايتتى. امەريكالىق «گونكونگ دەموكراتيالىق كەڭەسى» توبىن اقش-تاعى جاس بەلسەندىلەر قارسى الىپ, ولارعا قولداۋ كورسەتكەن.
«وسىنداعى 30 جاسقا تولماعان جاس بەلسەندىلەر وتكەن جىلعى شىلدەدە گونكونگ دەموكراتياسى ءۇشىن كۇرەس ميتينگىنە قاتىسىپ, قۇقىق قورعاۋ ورگاندارىنىڭ قۋدالاۋىنا ۇشىرادى», دەدى گونكونگ دەموكراتيالىق كەڭەسىن قۇرۋشى سامۋەل چۋ. ونىڭ ايتۋىنشا, بەلسەندىلەر اقش-قا قونىس اۋدارىپ, وسى جاقتا ازاتتىق ءۇشىن كۇرەسىن جالعاستىراتىنىنا قۋانىشتى. «اقش ءبىزدى پاناسىنا الىپ, جاڭا ءومىر باستاۋعا كومەكتەسەدى دەپ سەنەمىز», دەدى بەلسەندى.
ءيا, ەلدەگى تولقۋلاردى الەمدەگى احۋال دا توقتاتا المادى. كوروناۆيرۋس پاندەمياسى ءورشىپ تۇرعان كەزدە, ياعني بىلتىر ءساۋىر-مامىر ايلارىندا دا اكتسيالار جالعاسىپ جاتتى. 2021 جىلدىڭ العاشقى ايىندا دا بىرنەشە نارازىلىق اكتسياسى وتكىزىلىپ, ونداعان بەلسەندى تۇتقىنعا الىندى. ولارعا ساياسي وپپوزيتسيا دەگەن ايىپ تاعىلىپ, ءىس قۇزىرلى ورگانداردىڭ قاراۋىنا الىندى. بۇگىندە 50-گە جۋىق بەلسەندى الەمنىڭ ءتۇرلى ەلدەرىن پانالاۋدا. وپپوزيتسيانىڭ جۇزدەگەن وكىلى كورشىلەس تايۆان مەملەكەتىندە ءجۇر.
وتكەن اپتادا گونكونگتەگى ءىرى اۋدانداردىڭ ءبىرى كارانتينگە جابىلعان. جەرگىلىكتى بيلىك 150-دەن استام ۇيدە تۇراتىن بىرنەشە مىڭ ادامنىڭ سىرتقا شىعۋىنا تىيىم سالىپ, 48 ساعات بويى ونداعى جۇرتشىلىققا تەست جاسالاتىنىن حابارلادى. ءتارتىپتىڭ بۇزىلماۋىن قاداعالاۋعا قۇقىق قورعاۋ ورگاندارىنىڭ 1,7 مىڭ قىزمەتكەرى جۇمىلدى. بەلسەندىلەر بۇل شەكتەۋدىڭ مەديتسينالىق ەمەس, ساياسي نەگىزدە قابىلدانعانىن ايتىپ جاتتى.
سوڭعى دەرەك بويىنشا, اكىمشىلىك ايماقتى 10 222 ادام ۆيرۋس جۇقتىرعان. سوڭعى تاۋلىكتە 64 ناۋقاس تىركەلىپتى. ال ۆيرۋستان قايتىس بولعاندار سانى 173-كە جەتىپ وتىر. نەگىزىنەن, بۇل 7,4 ملن-عا جۋىق حالقى بار ايماق ءۇشىن تىم كوپ ەمەس. كەيبىر ساراپشىلار تولقۋلار باسىلماسا جاعداي ءورشي ءتۇسۋى مۇمكىن دەگەن بولجام جاساۋدا.
ماسەلەنىڭ ءبارى 2019 جىلى گونكونگ ۇكىمەتى ايىپتالعانداردى ەكستراديتسيالاۋ تۋرالى زاڭ جوباسىن قولعا العاندا باستالعان-دى. ناقتىلاي ايتقاندا, ميلليونداعان تۇرعىن ءىستى بولعان گونكونگتىقتاردىڭ تاعدىرىن قىتايعا تاۋەلدى ەتۋگە قارسى بولىپ, ناۋرىز ايىندا العاشقى اكتسيانى وتكىزدى. سول جىلى جازدا قالادا كولىك قوزعالىسى تەجەلىپ, بىرقاتار ءوندىرىس توقتاپ قالدى.
نەگىزگى سەبەپ ول ەمەس, البەتتە. ءحىح عاسىردىڭ ورتاسىنا دەيىن ۇلىبريتانيا كولونياسىندا بولىپ, كەيىن كورولدىككە جالعا بەرىلگەن ايماق 1997 جىلى قىتاي حالىق رەسپۋبليكاسىنىڭ قۇرامىنا قايتارىلعان. ارنايى اكىمشىلىك اۋدان دەپ بەلگىلەنگەن قالا ءالى دە قىتايدىڭ اۆتونومياسى سانالادى.
قىتاي رەفورماتورى دەن ءسياوپيننىڭ ء«بىر ەل, ەكى جۇيە» دەگەن يدەياسى, ازاماتتاردىڭ ويىنشا, اكىمشىلىك ايماققا ەش پايدا بەرمەيدى. جالپى, قىتاي-بريتان دەكلاراتسياسى مەن گونكونگتىڭ نەگىزگى زاڭىنا سايكەس, ەلدىڭ ىشكى زاڭى مەن قارجى جۇيەسى ءوز ىشكى ماسەلەسى بولعانىمەن, سىرتقى ساياساتى مەن قورعانىسى – قىتايدىڭ قۇزىرىندا. بىلاي قاراساڭىز, ءتيىمدى جۇيە. ونىمەن قوسا, اتالعان اۋماققا ءوز كاپيتالى, ەكونوميكا مەن ساياسي جۇيەسىن قالىپتاستىرۋعا ۇلكەن مۇمكىندىك. دەگەنمەن حالىق ءىس جۇزىندە باسقا كارتينا قالىپتاسقانىن ايتىپ, نارازىلىق تانىتۋدا.
گونكونگ تۇرعىندارى قىتاي بيلىگى ورايى كەلسە ءوز ساياساتىن جۇرگىزىپ, ۇستەمدىگىن كورسەتۋدەن تارتىنبايدى دەپ ايىپتايدى. قىتاي اۋەلدەن قالىپتاسقان كاپيتاليستىك جۇيەگە وزگەرىس ەنگىزبەۋ جونىندەگى ۋادەسىندە تۇرماي, مەكتەپتەردە پاتريوتتىق تاربيە ءپانىن ەنگىزىپ, زاڭ جۇيەسىنە وزگەرىس جاساۋدا. وعان قوسا 2014 جىلى وتكەن سايلاۋعا دا ارالاستى. تۇرعىندار وسى كەزدە دە بوي كوتەرىپ, 79 كۇنگە سوزىلعان «قولشاتىر رەۆوليۋتسياسىن» وتكىزدى. ەندى ولار گونكونگتى قىتايدىڭ ادامى باسقارادى دەگەن پىكىردە.
بەلسەندىلەر ەلدە قىتاي ەكسپانسياسى ءجۇرىپ جاتقانىن بىرنەشە فاكتورمەن دالەلدەپ باعۋدا. ەڭ الدىمەن ايماقتا مەملەكەتتىك ءتىل دەپ سانالاتىن اعىلشىن ءتىلىن قىتاي ءتىلى ىعىستىرىپ كەلەدى ەكەن. حالىقتىڭ ءسوز بوستاندىعى مەن قوعامداعى دەموكراتياعا دا قول سۇعۋ بايقالادى دەيدى بەلسەندىلەر.
الەم جۇرتشىلىعىنىڭ نازارىنا ىلىنگەن قوزعالىسقا پاندەميا دا توسقاۋىل بولمايتىنىن تۇسىنگەن حالىقارالىق ۇيىمدار الاڭداۋشىلىق تانىتا باستادى. جاقىن كۇندەرى بۇل ماسەلەگە ەۋروپا پارلامەنتى ارالاسىپ, گونكونگ ازاتتىعى ءۇشىن كۇرەسىپ جۇرگەن وپپوزيتسيا وكىلدەرى دجوشۋا ۆونگ, يۆان لام, اگنەس چوۋلاردى تۇتقىننان بوساتۋ حاقىندا سۇراۋ جىبەردى. وعان قوسا پارلامەنت ەۋروپا ەلدەرىنە قىتاي مەن گونكونگتەگى جەكە تۇلعالارعا قاتىستى سانكتسيا ماسەلەسىن قاراۋدى ۇسىندى. ەۋروپا وداعىنىڭ ادام قۇقىقتارىنا قاتىستى جاھاندىق سانكتسيا رەجىمىنىڭ شەڭبەرىندە گونكونگ كوشباسشىسى كەرري لامعا قاتىستى شارا قولدانۋ ماسەلەسى دە تالقىلاندى.
مەملەكەتتەگى وزگەرىستەرگە كەلىسىم بەرسەك, تولىعىمەن قىتاي يەلىگىنە اينالامىز دەپ قاۋىپتەنەتىن بەلسەندىلەردىڭ ازىرگە العان بەتىنەن قايتاتىن ءتۇرى جوق. ولاردىڭ ءبىر بولىگى جات ەلدى پانالاپ ءجۇرىپ تە ءوز ءىس-قيمىلدارىن جالعاستىرا بەرمەك. وسىمەن ءۇشىنشى جىلعا سوزىلعان گونكونگتەگى تولقۋلاردىڭ سوڭى نەگە اكەلىپ سوعاتىنى ازىرگە بەلگىسىز.
