پىكىر • 28 قاڭتار، 2021

رەسەيلىك ۆاكتسيناعا سۇرانىس كوپ

13 رەت كورسەتىلدى

2021 جىلعى 1 اقپاننان باستاپ ەل اۋماعىندا رەسەيدە شىعارىلعان گام-كوۆيد-ۆاك («سپۋتنيك V») ۆاكتسيناسىن پايدالانا وتىرىپ، كۆي-عا قارسى ۆاكتسينالاۋ باستالادى. ودان ءارى 15 اقپاننان باستاپ ۆاكتسينالاۋ پروتسەسىنە قاراعاندى فارماتسەۆتيكالىق كەشەنىنىڭ بازاسىندا وندىرىلگەن گام-كوۆيد-ۆاك ۆاكتسيناسى قوسىلادى. 2021 جىلدىڭ 2 توقسانىنان باستاپ ۆاكتسينالاۋعا وتاندىق ءونىم – QazCovid-In پرەپاراتىن قوسۋ جوس­پار­لانىپ وتىر. وتاندىق ۆاكتسينا قازىرگى ۋاقىتتا كلينيكالىق سىناقتاردىڭ 3-كەزەڭىنەن وتۋدە.

«سپۋتنيك V» ۆاكتسيناسىن 18 جاسقا دەيىنگى بالالار­عا قول­دانۋعا بولمايدى، سايكەسىنشە ونى تەك كامەلەتكە تول­­عان قازاقستان ازاماتتارى عانا الا الادى. اتالعان ۆاك­­تسينا رەسەي فەدەراتسياسىندا مەملەكەتتىك تىركەۋدەن ءوتتى جانە بىرنەشە اي بويى حالىقتىڭ وسال توپتارىن يم­مۋنداۋ ءۇشىن قولدانىلىپ كەلەدى. رەسەي فەدە­را­تسياسىنىڭ تىكەلەي ينۆەستيتسيالار قورىنىڭ مالىمەت­تەرى بويىنشا، بۇل ۆاكتسينانى ساتىپ الۋعا 50-گە جۋىق مەم­لەكەت ءوتىنىش بەرگەن، ال كەيبىر ەلدەر (بەلورۋسسيا، ار­گەن­تينا، سەربيا) قازىردىڭ وزىندە ونى ءساتتى قولدانىپ جاتىر.

قولدانىستاعى زاڭنامالارعا سايكەس قازاقستان رەسپۋب­ليكاسىنىڭ اۋماعىنا تىركەلمەگەن دارىلىك زاتتاردى اكەلۋ كەزىندە دارىلىك زاتتىڭ ساپاسىن راستايتىن ءوندىرۋشىنىڭ قازاق نەمەسە ورىس تىلدەرىنە اۋدارماسى بار قۇجاتىنىڭ ەلەكتروندىق كوشىرمەسى (تالداۋ سەرتيفيكاتتارى نەمەسە سىناق ەسەبى ياكي ساپانى باعالاۋ كورسەتكىشتەرى بار ساپا پاسپورتى) بولۋى قاجەت. قازىرگى ۋاقىتتا قازاقستان رەسپۋبليكاسى ۇكىمەتىنىڭ 2020 جىلعى 15 جەلتوقسانداعى №850 قاۋلىسىمەن قازاقستان رەسپۋبليكاسىندا وندىرىلگەن COVID-19 كوروناۆيرۋسىنا قارسى ۆاكتسينالاردى ۋاقىتشا مەملەكەتتىك تىركەۋ ەرەجەلەرى بەكىتىلدى.

ال قازىر قولدانىسقا ەنگىزىلىپ ۇلگەرگەن ۆاكتسينالار­دىڭ نەلىكتەن ەرتە دايىن بولعانىن قولدا بار ازىرلە­مەگە سۇيەنىپ جاساعانىمەن بايلانىستىرۋعا بولادى. ماسەلەن، «سپۋتنيك V» ۆاكتسيناسىن ازىرلەگەن ن.گاما­لەيا اتىن­داعى ەپيدەميولوگيا جانە ميكروبيولو­گيا ۇلتتىق زەرتتەۋ ورتالىعى پاندەمياعا دەيىن SARS-CoV-2 كوروناۆيرۋسى دا جاتقىزىلعان رنق بار قابىق­تى ۆيرۋستارعا قارسى ۆاكتسينالار مەن پرەپارات­تار جاساۋدىڭ تەحنولوگيالىق پلاتفورماسىن اشقان ەدى. دەمەك، الەمدەگى بىرنەشە مەملەكەت جاساپ شىققان ۆاكتسي­نا­لاردىڭ تەز ارادا دايىن بولۋى كومپا­نيالار­دىڭ قاۋىپ­سىزدىك حاتتامالارىنان اينالىپ وتكەنىن بىلدىرمەيدى.

وسى رەتتە تۇتىنۋشىلارعا، ەل ازاماتتارىنا قاۋىپتى ىندەتكە قارسى ەكپەنىڭ تەك رەسەيدەن عانا اكەلىنبەيتىنىن ايتا كەتكەن جوق. دەنساۋلىق ساقتاۋ مينيسترلىگى قازىرگى تاڭدا «Sinovac»، «Sinopharm» (قىتاي)، «Phizer» (اقش) قوسا العاندا، كوروناۆيرۋس ينفەكتسياسىنا قارسى ۆاكتسينا ءوندىرۋشى بىرقاتار مەملەكەتپەن كەلىسسوزدەر جۇرگىزۋدە.

 

ەرجان بايتاناەۆ،

دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى

 

سوڭعى جاڭالىقتار

ۇقساس جاڭالىقتار