الماتى «قىزىل» ايماققا كىردى

ايماقتار • 27 قاڭتار، 2021

الماتى «قىزىل» ايماققا كىردى

72 رەت كورسەتىلدى

الماتىداعى كوروناۆيرۋس بويىنشا ەپيدەميالىق جاعداي سوڭعى 4 كۇندە كۇرت ناشارلادى، كۇنىنە 125-132 جاعداي تىركەلىپ جاتىر. بۇل تۋرالى ونلاين بريفينگ بارىسىندا قالانىڭ باس مەملەكەتتىك سانيتارى جانداربەك بەكشين ايتتى، دەپ حابارلايدى Egemen.kz

ايىم ءداۋىت

ونىڭ ايتۋىنشا، پاندەميا باستالعالى بەرى الماتى قالاسىندا كوروناۆيرۋس ينفەكتسياسىن 21547 ادام جۇقتىردى. 1662 الماتىلىقتان كوروناۆيرۋس پنەۆمونياسى انىقتالدى.

«قاڭتار ايىنىڭ 26 كۇنىندە 3026 كۆي جانە 237 پنەۆمونيا جاعدايى تىركەلدى. الماتى قالاسىنىڭ قىزىل ايماققا كوشۋىن كەلەسىدەي تۇسىندىرەمىز، كەز كەلگەن جۇقپالى اۋرۋدىڭ ەپيدەميولوگيالىق پروتسەسى تولقىن ءتارىزدى اعىمعا يە (ورلەۋ مەن قۇلدىراۋدىڭ كەزەكتەسۋى) – COVID-19 ەپيدەمياسى دا وسى زاڭدىلىققا باعىنادى: الماتىدا COVID-19 ەپيدەمياسى باستالعاننان باستاپ ناۋرىز – ءساۋىر ايلارىندا العاشقى تولقىن باستالدى (82 جانە 969 جاعداي)، شىلدە ايىندا 6 مىڭنان استام جاعداي تىركەلىپ تولقىننىڭ شىڭىنا جەتتى، قىركۇيەك ايىندا 165 جاعدايعا دەيىن تومەندەدى. قازان ايىنان باستاپ (366 جاعداي) اۋرۋدىڭ ءوسۋى باستالدى (ەكىنشى تولقىن)، قازىرگى ۋاقىتتا سول جالعاسۋدا»، دەيدى جانداربەك بەكشين.

سونىمەن قاتار، ول 31 جەلتوقاساننان باستاپ كوروناۆيرۋس جۇقتىرعانداردىڭ سانى كۇرت ءوسىپ جاتقانىن ايتتى.

«الماتى قالاسىنداعى كۆي بويىنشا ەپيدەميولوگيالىق جاعداي سوڭعى 4 كۇندە كۇرت ناشارلادى، كۇنىنە 125-132 جاعداي تىركەلىپ جاتىر. كۆي جاعدايلارىن ەپيدەميولوگيالىق تەكسەرۋ بارىسىندا قوعامدىق ورىنداردا ناۋقاستاردىڭ 40%-ى، قوعامدىق كولىكتە ناۋقاستاردىڭ 20%-ى، سونداي-اق اۋىرعانداردىڭ وتباسىلاردىڭ 28%-ى جۇقتىرعانى انىقتالدى. سوڭعى 3 اپتادا وتباسىلىق ءىس-شارالاردا (توي جانە وتباسىلىق ءىس-شارالار ج.ت.ب.) سونداي-اق كينوتەاترلار مەن تەاترلارعا بارعان كەزدە جۇقتىرعان جاعدايلاردا تىركەلدى»، دەيدى ول.

كۆي جوعارى اۋرۋشاڭدىعى 20-39 جاس ارالىعىنداعى ازاماتتار اراسىندا 35% دەڭگەيىندە، 40-59 جاس ارالىعىندا 27-28% دەڭگەيىندە تىركەلۋدە، بۇل ساۋدا وبەكتىلەرىنە (ساۋدا ويىن-ساۋىق ورتالىقتارى، ساۋدا ۇيلەرى، بازارلار) مەن قوعامدىق تاماقتانۋ ورىندارىنا بارۋ جانە قوعامدىق كولىكتى پايدالانۋمەن بايلانىستى.

«الماتى قالاسىنىڭ دەپارتامەنتى الەۋمەتتىك قاشىقتىقتى، ماسكا-قولعاپ رەجيمىن ساقتاۋ، ادامدار كوپ جينالاتىن جەرلەردەن اۋلاق بولۋ قاجەتتىلىگى تۋرالى حالىقتى ەسكەرتۋ بويىنشا جۇيەلى تۇردە جۇمىس جۇرگىزۋدە. ءبىز قىزىل ايماققا سايكەس شەكتەۋ شارالارىن ەنگىزۋ بويىنشا قر بمسد قاۋلىسىن مىندەتتى تۇردە ىسكە اسىرۋ شەڭبەرىندە جۇمىس ىستەيمىز»، دەدى قالانىڭ باس مەملەكەتتىك سانيتار دارىگەرى.

ەسكە سالساق، 27 قاڭتارداعى ەپيدەميولوگيالىق احۋالدى باعالاۋ ماتريتساسى بويىنشا قازاقستاننىڭ 6 وبلىسى مەن 2 قالاسى ءالى دە «قىزىل» ايماقتا تۇر. ولار: اقمولا، پاۆلودار، اتىراۋ، قوستاناي، سولتۇستىك قازاقستان، باتىس قازاقستان وبلىستارى مەن نۇر-سۇلتان جانە الماتى قالالارى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز