13 جاستاعى ازامات نۇرقوجا اقتاۋداعى №8 مەكتەپتە ءبىلىم الۋدا. اناسىنىڭ ايتۋىنشا, بالاقايدىڭ ونەرىن ءۇش جاسىندا بايقاعان. وسى جاسىندا ءبۇلدىرشىن شپاگاتقا وتىرىپ, بەس جاسىندا اياعىن موينىنا اسىپ قويىپ ءجۇرىپتى.
"تۇندە كەيدە بۇرالىپ ۇيىقتاي بەرەدى. العاشىندا ۇرەيلەنىپ, كەيىن بۇل ارەكەتتەرىن ۆيدەوعا ءتۇسىرىپ, تۋىستارعا جىبەرەتىن بولدىق. ءبىراز جارىستارعا دا قاتىسىپ, تانىلا دا باستادى. ازامات ەڭ العاش 7 جاسىندا “بالانىڭ ءبارى تالانتتى” باعدارلاسىنا قاتىسقانى ءۇشىن "ماڭعىستاۋ” تەلەارناسىنىڭ باسشىسىنان العىس حات العان بولاتىن”- دەيدى ازاماتتىڭ اناسى بايبوزوۆا جاننا.
مەكتەپ ديرەكتورى يسجانوۆا اسەلحاننىڭ ايتۋىنشا: "ازاماتتىڭ ساباق ۇلگەرىمى جاقسى, بارلىق ساباقتارعا بەلسەندى جانە ءوزىن ءاردايىم ىزدەنىس ۇستەندەگى وقۋشى ەكەنىن كورسەتىپ وتىرادى.
اتاپ ايتاتىن بولساق ازامات تالانتى مەن تاربيەنى قاتار الىپ جۇرگەن وقۋشى. ۇيدەگى اتا-انا تاربيەسى بالا ءۇشىن ماڭىزدى. سوندىقتان ازاماتتىڭ بويىنان تالانتىنان بولەك تاربيە مەن ساباققا دەگەن ىنتاسىن كورۋگە بولادى” - دەيدى.
“وركەستر مۇشەسى بولىپ جوعارى جەتىستىكتەرگە جەتكىم كەلەدى. بۋىنسىز بالا رەتىندە ماعان كوپ شاقىرتۋلار كەلدى. بىراق مەن دومبىرا قۇلاعىندا ويناپ جوعارعى دەڭگەيدەگى كۇيشى بولعىم كەلەدى”- دەيدى ونەرپاز.
ازامات وسىعان دەيىن ءبىراز جەتىستىككە جەتكەن:
2018 جىلى "بالاپان" تەلەارناسىندا "دارا بالا" تەلەجوباسىنىڭ قاتىسۋشىسى; رەسپۋبليكالىق "قازاقستان تالانتتارى" بايقاۋىندا ديپلومانت; حالىقارالىق "بالا شابىتى" بايقاۋىندا II ورىن; " ۇلى دالا ۇرپاعىمىز" جارىسىندا لاۋرەات; "تاڭعى شۇعىلا" بايقاۋىندا "بۋىنسىز بالا" نوميناتسياسىنىڭ I ورىن يەگەرى; حالىقارالىق "زۆەزدا ۋداچي" دوداسىنىڭ I ورىن جۇلدەگەرى.
