سىبايلاس جەمقورلىققا قارسى قىزمەتى «سق-فارماتسيا»-نىڭ ءدارى قويماسىن تەكسەردى

قوعام • 26 قاڭتار، 2021

سىبايلاس جەمقورلىققا قارسى قىزمەتى «سق-فارماتسيا»-نىڭ ءدارى قويماسىن تەكسەردى

23 رەت كورسەتىلدى

«استانا – ادالدىق الاڭى» جوباسى اياسىندا نۇر-سۇلتان قالاسىنداعى سىبايلاس جەمقورلىققا قارسى قىزمەت دارىلىك زاتتار مەن مەديتسينالىق بۇيىمدار ساقتالاتىن «سق-فارماتسيا» لوگيستيكالىق حابىنا مونيتورينگ جۇرگىزدى، دەپ حابارلايدى Egemen.kz

ايىم ءداۋىت

ەلوردالىق بىرىڭعاي ديستريبيۋتور 85 مەملەكەتتىك مەديتسينالىق ۇيىمدى ءدارى-دارمەكپەن تەگىن قامتاماسىز ەتەدى. قويمانىڭ جالپى اۋماعى 6،5 مىڭ شارشى مەتردى قۇرايدى، وندا ءدارى-دارمەكتى ساقتاۋعا قاجەتتى مۇزداتقىش كامەرالارى، بولىنگەن ايماقتار، بەلگىلى ءبىر تەمپەراتۋرالىق رەجىم سىندى بارلىق جاعداي قامتىلعان.

«سق-فارماتسيا» جشس باسقارۋشى ديرەكتورى – باسقارما مۇشەسى ايمۇرات ساليەۆ ەلوردالىق حابتا وتكەن مونيتورينگتە: «نۇر-سۇلتان قالاسىنداعى بىرىڭعاي ديستريبيۋتور ارقىلى سولتۇستىك قازاقستان، پاۆلودار، اقمولا، قاراعاندى، قوستاناي وبلىستارى جانە نۇر-سۇلتان قالاسىنداعى 85 مەديتسينالىق ۇيىم قامتاماسىز ەتىلەدى. ونىڭ ىشىندە 5 رەسپۋبليكالىق كلينيكا مەن 80 قالالىق ماڭىزى بار مەديتسينالىق ۇيىم بار. بىزدە ءدارى-دارمەك ءبىر جىلدان ەكى جىلعا دەيىن ساقتالادى. شىلدە ايىندا ۆەدومستۆوارالىق كوميسسيانىڭ قاۋلىسى بويىنشا 44 اتاۋدان تۇراتىن ءدارى-دارمەكتىڭ ازايمايتىن قورىن قۇرۋ تۋرالى تاپسىرما بەرىلدى. جەلتوقسان ايىندا دەنساۋلىق ساقتاۋ مينيسترلىگىنىڭ تاپسىرماسىمەن، ءۇش دارىلىك زات ءبىر پرەپاراتقا اۋىستىرىلدى، ءبىر پرەپارات – «رەمەديسيۆير» كوروناۆيرۋستى ەمدەۋ پروتوكولىنان شىعارىلدى. سول سەبەپتى قازىر 44 اتاۋدىڭ 40-ى ساقتالۋدا. دارىلەر بويىنشا تاپشىلىق جوق. مۇندا ەكى ايلىق ءدارى-دارمەكتەر قورى قۇرىلعان»، دەپ اتاپ ءوتتى.

ۇيىمنىڭ حابارلاۋىنشا، ازايمايتىن قوردىڭ ەڭ تومەنگى تولەمى ەكى ايلىق بولۋى كەرەك. ياعني اي سايىن كەمىندە 60 مىڭ پاتسيەنتتى ەمدەۋگە جەتكىلىكتى ءدارى-دارمەك بولۋى كەرەك. ياعني، بۇل قوردان قانداي دا ءبىر ءدارى وڭىرلەرگە جىبەرىلسە، دەرەۋ تولىقتىرىلىپ وتىرۋى كەرەك. قازىرگى ۋاقىتتا پاندەميا كەزىندە «سق-فارماتسيا» قويمالارىنىڭ جۇمىسى وزگەرگەن.

جۇمىسشىلار تاۋلىك بويى ءۇزىلىسسىز بىرنەشە اۋىسىممەن جۇمىس ىستەيدى. كەلگەن ءدارى-دارمەك قويمادا كوپ جاتپاي، بىردەن ۇيلەستىرىلىپ، تيەلەدى. سونىمەن بىرگە سىبايلاس جەمقورلىققا قارسى ءىس-قيمىل اگەنتتىگىنىڭ ەلوردالىق دەپارتامەنتىندەگى پرەۆەنتسيا جانە پاراساتتىلىق باسقارماسىنىڭ باسشىسى مارات حايرۋللين مونيتورينگتى قورىتىندىلادى.

«بۇگىن «استانا – ادالدىق الاڭى» جوباسى اياسىندا «سق-فارماتسيا» قويمالارىنىڭ دارىلىك زاتتارمەن جانە قورعانىش قۇرالدارىمەن قامتاماسىز ەتۋ قىزمەتىنە مونيتورينگ جۇرگىزدىك. «سق-فارماتسيا» ۇيىمى كەلتىرگەن دەرەكتەرگە سايكەس، قويمادا توتەنشە جاعدايلارعا، ونىڭ ىشىندە كوروناۆيرۋس ينفەكتسياسىنا ارنالعان قور بار. وزدەرىڭىز بىلەتىندەي، پاندەميانىڭ باسىندا ءدارى-دارمەكپەن قامتاماسىز ەتۋ جۇيەسىنىڭ جەتكىلىكتى دەڭگەيدە بولماعانى ايتىلىپ ەدى. قازىر جاعدايدىڭ تۇزەلگەنىن كورىپ وتىرمىز، بارلىق ءدارى-دارمەك جەتكىلىكتى، دەنساۋلىق ساقتاۋ قىزمەتكەرلەرى جەكە قورعانىس قۇرالدارىمەن جابدىقتالعان. مونيتورينگتىڭ نەگىزگى ماقساتى – سىبايلاس جەمقورلىق فاكتىلەرىنە جول بەرمەۋ، ونىڭ ىشىندە قوعامدى مەملەكەتتىك ۇيىمدار جۇمىسىن باقىلاۋعا تارتۋ. بۇگىنگى تەكسەرۋ بويىنشا ەسكەرتۋلەر بولعان جوق، «سق-فارماتسيا» دەنساۋلىق ساقتاۋ نىساندارىنا جىبەرىلەتىن بارلىق جوسپارلى شىعىندار تۋرالى مالىمەتتى بەردى»، دەيدى مارات حايرۋللين.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز