قىرعىزستان العىس ايتادى, كومەك سۇرايدى

قىرعىز رەسپۋبليكاسى ۋاقىتشا ۇكى­مەتىنىڭ ءتورايىمى روزا وتۋنباەۆا ەل­­باسى نۇرسۇلتان نازارباەۆقا  جەدەلحات جولداپ, وندا قىرعىزستانداعى احۋالدى  رەتتەۋدەگى باعا جەتپەس كومەگى مەن ءجار­دە­مى ءۇشىن ەل حالقىنىڭ اتىنان شىنايى ريزاشىلىعىن ءبىلدىرىپ, بىرقاتار ماسە­لە­لەر­دى شەشۋگە قازاقستاننان كومەك كور­سە­تۋدى سۇرادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ء“سىزدىڭ تىكەلەي قاتىسۋىڭىزبەن قىرعىزستانداعى قاتەرلى دە شيەلىنىستى احۋالدى رەتتەۋ مۇمكىن بولدى, قازىر ەلدىڭ قۇقىقتىق ارناعا ناقتى بەتبۇرىسى جاسالدى”, دەلىنگەن جەدەلحاتتا. ودان ءارى حالىقتىڭ شۇعىل ماسەلە­لەرىن شەشۋگە قازىرگى ەكونوميكالىق جاعدايلارى مۇمكىندىك بەرمەيتىنىن ايتا كەلىپ, ەلباسىنان, تۋىسقان قازاق حال­قى­نان قازىرگى كەزدە رەسەي مۇناي وڭدەۋ زاۋىتتارى شىعارعان مۇناي ونىمدەرى ءتۇسىپ جاتپاۋىنا بايلانىستى قىرعىز وپەرا­تور­لارىنىڭ قويمالارىنداعى مۇناي ءونىم­دە­رى ءبىتۋدىڭ الدىندا تۇرعاندىقتان, كوكتەمگى ەگىس جۇمىستارىن ۋاقىتىندا جۇرگىزۋ ءۇشىن 10-15 مىڭ توننا جانار-جاعارماي ماتە­ريال­دارىن نەسيەگە جانە 10 مىڭ تون­نا­سىن گۋمانيتارلىق كومەك رەتىندە, سونداي-اق تىڭايتقىشتار مەن تۇقىم ماتەريال­دارىن  بەرۋ جونىندە كومەك سۇرايدى. پرەزيدەنت نۇرسۇلتان نازارباەۆ پرەمەر-مينيستر ك.ماسىموۆكە وسى ماسەلەلەردى شەشۋ جونىندە كەلىسسوز جۇرگىزۋدى تاپسىردى. *  *  * كەشە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تاپسىرماسىمەن پرەمەر-مينيستر كارىم ءماسىموۆ قىرعىز رەسپۋبليكاسى ۋاقىتشا ۇكىمەتى  باسشىسىنىڭ ورىن­با­سارى المازبەك اتامباەۆتى قابىلدادى. كارىم ءماسىموۆ قازاقستاننىڭ قىرعىزستان رەسپۋبليكاسىندا بارىنشا قىسقا مەرزىمدە تۇراقتىلىق ورناۋىنا مۇددەلى ەكەندىگىن ايتا كەلىپ, تۋىسقان حالىققا بارىنشا كومەك كورسەتىلەتىندىگىن جەتكىزدى. سونداي-اق پرەمەر-مينيستر بۇرىن قول جەت­كىزىلگەن ەكىجاقتى ساۋدا-ەكونوميكالىق كەلىسىمدەردىڭ جۇزەگە اسىرىلۋىندا جال­عاستىلىق بولاتىندىعى­نا ءۇمىت ءبىلدىرىپ, قىرعىز ەلىنىڭ ەكونو­ميكاسىنا قازاق­ستان­نىڭ ءىرى ينۆەستور بولىپ وتىرعان­دى­عىن, الداعى ۋاقىتتا دا ينۆەستيتسيالىق بايلانىستاردى جالعاس­تىرۋعا ءازىر ەكەندىگىن اتاپ كورسەتتى. ءوز كەزەگىندە المازبەك اتامباەۆ قىر­عىزستانعا جاسالىپ جاتقان تۋىسقاندىق كومەك ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا شىنايى العىسىن جەتكىزدى. كەزدەسۋ قورىتىندىسىندا تاراپتار قازاقستان مەن قىرعىزستان اراسىنداعى ساۋدا-ەكونومي­كالىق بايلانىستى ودان ءارى دامىتۋعا مۇددەلى ەكەندىكتەرىن ءبىلدىردى. كەزدەسۋدەن كەيىن قىرعىز رەسپۋبلي­كا­سى ۋاقىتشا ۇكىمەتى باسشىسىنىڭ ورىن­باسارى المازبەك اتامباەۆ باق وكىل­دەرىمەن جۇزدەستى. ول قازاقستان ۇكىمەتىنىڭ باسشىسىمەن بولعان كەزدەسۋدە ەكى ەل اراسىنداعى شەكارانى اشۋ, قازاق­ستانعا كەلىپ ەڭبەك ەتىپ جاتقان قىرعىز­ستاندىقتارعا بۇرىنعى رەجىمدى قولدانۋ, كوكتەمگى ەگىسكە بايلانىستى قىرعىز ەلىنە جانار-جاعارماي ءۇشىن ارناۋلى ليميت ءبولۋ ماسەلەلەرى تالقىلانعاندىعىن ايتتى. كەزدەسۋدە وسى ءۇش ماڭىزدى ماسەلە بويىنشا دا كەلىسىمگە قول جەتكىزىلگەن. قا­زاقستان كورشى ەلگە كوكتەمگى ەگىس جۇمىستارىنا قاجەتتى جانار-جاعارمايدى تولىق مولشەردە بوساتاتىن بولدى. شە­كارانى اشۋ ماسەلەسىندە دە ۋاعدالاستىققا قول جەتكىزىلدى. ا.اتامباەۆ قازاق ەلىنىڭ قىر­عىزستانعا تۋىسقاندىق كومەك قولىن سوزعانىنا شىنايى العىس ايتتى. جۋر­ناليستەردىڭ قويعان سۇراقتارىنا جاۋاپ بەرە كەلىپ, ا.اتامباەۆ جالالاباد ءوڭىرىن­دە ءالى دە تۇراقسىزدىقتىڭ ورىن الىپ وتىر­عاندىعىن حابارلادى. بۇرىنعى پرە­زيدەنت ق.باكيەۆتىڭ ماڭايىنداعى بيلىك ەلدەگى قىلمىستىق توپپەن بىتە قايناسىپ كەتكەندىگىن, قازىرگى كۇنى سول كۇشتەردىڭ ەلدە تۇراقسىزدىقتى قالىپتاستىرۋعا كۇش سالىپ جاتقاندىعىن ايتتى. ۋاقىتشا ۇكى­مەت وكىلى قانداي جاعداي بولسا دا بەيبىت حالىققا قارسى كۇش قولدانىل­ماي­تىندىعىن اتاپ كورسەتتى.