سونىڭ ىشىندە 5 933 ناۋقاستا ۆيرۋستىڭ سيمپتومدى, ال 3585 ادامدا سيمپتومسىز ءتۇرى انىقتالعان. ىندەتتەن 99 ادام قايتىس بولعان. ءولىم-ءجىتىم كورسەتكىشى 1,06-نى قۇرايدى. ۆيرۋس جۇقتىرعانداردىڭ باسىم كوپشىلىگى ەرەسەك ادامدار. بارلىق ناۋقاستىڭ 8,3 پايىزى – 14 جاسقا دەيىنگى بالالار.
ىندەتتىڭ ەتەك الۋىنا ءوزىمىز سەبەپشى بولىپ وتىرمىز. ءالى كۇنگە دەيىن جاسىرىن توي-تومالاق, قۇدالىق تىيىلماي تۇر. العاشقى بەتتەگى ۇرەي سەيىلدى. ەسەسىنە, اۋرۋ كوبەيدى.
كوروناۆيرۋس دياگنوزى كوبىنەسە ناۋقاستاردىڭ ەمحاناعا وزدەرى بارىپ قارالۋ كەزىندە قويىلعان. سونداي-اق كوروناۆيرۋسقا شالدىققان ناۋقاستارمەن بايلانىستا بولعان ادامدار اراسىندا تەست جۇرگىزۋ جانە پروفيلاكتيكالىق سكرينينگتەر كەزىندە دە ىندەت ءجيى انىقتالىپ وتىر. وبلىس ەپيدەميالىق جاعدايعا بايلا
نىستى بىرنەشە اپتادان بەرى «قىزىل» ايماقتا. ەپيدەميالىق قىزمەتتىڭ مالىمەتتەرىن ساراپتاساڭىز, جاعدايدىڭ ۇدەپ بارا جاتقانىن اڭعارار ەدىڭىز. ماسەلەن, ءبىر تاۋلىكتىڭ ىشىندە وبلىستا 219 ۆيرۋس جۇقتىرۋ وقيعاسى انىقتالىپ وتىر. سوڭعى تاۋلىكتە جامان تۇماۋ جۇقتىرعان ناۋقاستارمەن بايلانىستا بولعان 594 ادام تۇراقتى باقىلاۋعا الىنعان.
بۇگىنگى تاڭدا, COVID-19 ۆيرۋسىمەن قاتار, وسى ۆيرۋس بەلگىلەرىنە ۇقساس پنەۆمونياعا شالدىعۋ دەرەكتەرى دە تىركەلۋدە. ماسەلەن, وبلىستا ءبىر اپتانىڭ ىشىندە مۇنداي دياگنوز 51 ادامعا, ال سوڭعى تاۋلىكتە 2 ادامعا قويىلعان.
سوڭعى تاۋلىكتە ۆيرۋس انىقتالعان ناۋقاستاردىڭ باسىم كوپشىلىگى كوكشەتاۋ, ستەپنوگور قالالارى مەن بۋراباي, ەسىل, زەرەندى, جارقايىڭ, تسەلينوگراد اۋداندارىندا. ال ىندەتتىڭ وقۋشىلار اراسىندا تارالۋ كورسەتكىشى بويىنشا كوكشەتاۋ قالاسى كوش باستاپ تۇر. ىندەت جۇقتىرعان 179 وقۋشىنىڭ 70-ءى ءداستۇرلى, 109-ى قاشىقتان ءبىلىم الىپ جاتقان بالالار. ەپيدەميالىق قىزمەت ماماندارى وقۋشىلار اراسىندا ىندەتتىڭ تارالۋىنا كارانتين تالاپتارىنىڭ ساقتالماۋى سەبەپ بولعانىن ايتادى. دەمەك, حالقىمىزدىڭ «ساقتانساڭ, ساۋ بولاسىڭ» دەيتىن ءتامسىلى ابدەن شىندىق.
اقمولا وبلىسى
