وسى ەكى كەزەڭنىڭ ناتيجەسى بويىنشا ۆاكتسينا ءوزىنىڭ يممۋنوگەندىگىن جانە تيىمدىلىگىن كورسەتتى. ەگەر ەكپەنىڭ يممۋننوگەندىگىن ءسوز ەتسەك, وندا ونىڭ قاۋىپسىزدىگى جونىندە دە ايتىپ وتىرعانىمىز انىق. بۇل – تۇتىنۋشى ءۇشىن ەڭ باستى كوڭىل اۋداراتىن ماسەلە.
كلينيكالىق زەرتتەۋدىڭ العاشقى كەزەڭىندە 44 ەرىكتىگە ەكپە ەگىلدى. ال ەكىنشى كەزەڭدە 200 ۆولونتەر وتاندىق ەكپەنى سىناقتان وتكىزۋگە قاتىستى. ەكى كەزەڭنىڭ ناتيجەسىندە ايتارلىقتاي تەرىس كورسەتكىشتەر انىقتالمادى. تەك ەكپەنى قابىلداعاندار ينەنى سالعان كەزدە شانشۋدىڭ اسەرىنەن كىشكەنە ءىسىنۋدىڭ بولعانىن, بىراق العاشقى 2-3 كۇندە جاعىمسىز اسەردىڭ جويىلعانىن جەتكىزگەن. قازىر ۆاكتسينا كلينيكالىق سىناقتىڭ ءۇشىنشى كەزەڭىنە ءوتتى. ويتكەنى 2020 جىلدىڭ 18 جەلتوقسانىندا دەنساۋلىق ساقتاۋ مينيسترلىگى مەن مەديتسينالىق جانە فارماتسەۆتيكالىق باقىلاۋ كوميتەتى QazCovid-in يناكتيۆتەلگەن ۆاكتسيناسىن كلينيكالىق سىناقتىڭ ءۇشىنشى كەزەڭىنەن وتكىزۋگە رۇقسات بەردى. سودان 25 جەلتوقساندا كلينيكالىق سىناقتىڭ ءۇشىنشى كەزەڭى بويىنشا ۆاكتسينالاۋ باستالىپ, 3 مىڭ ەرىكتىگە ەكپە ەگىلدى.
زەرتتەۋدىڭ حاتتاماسىنا سايكەس, كلينيكالىق سىناقتىڭ ءۇشىنشى كەزەڭى 180 كۇندى قۇرايدى. سوڭعى كەزەڭنىڭ اياقتالۋى شامامەن بيىلعى ماۋسىمعا جوسپارلانىپ وتىر. دەگەنمەن مۇنىڭ ءوزى وزگەرمەيتىن مەرزىم ەمەس. ءبارى دە زەرتتەۋدىڭ بارىسىنا بايلانىستى. سەبەبى الگىندە ايتقانىمىزداي, سىناق سۋبەكتىلەرىن باقىلاۋدىڭ وزىنە 180 كۇن كەرەك, ودان كەيىن زەرتتەۋدىڭ ساراپتامالىق قورىتىندىسى دايىندالادى.
ۆاكتسينانى وندىرۋگە ۋاقىتشا تىركەۋ بەرىلگەن. سوندىقتان الداعى ءساۋىر ايىنان باستاپ وتاندىق ءونىم وندىرىلە باستايدى. ءوندىرىس جۇمىستارى بيىلعى قىركۇيەك ايىنىڭ سوڭىندا اياقتالادى. ال ءساۋىر ايىنىڭ سوڭىندا وتاندىق ۆاكتسينانىڭ ءبىرىنشى پارتياسى دايىن بولادى. سودان سوڭ وتاندىق ەكپەنى سالدىرۋ باستالادى.
نۇرلان اۋكەنوۆ,
دەنساۋلىق ساقتاۋ مينيسترلىگى عىلىم جانە ادامي رەسۋرستار دەپارتامەنتىنىڭ باسقارما باسشىسى
