سونىڭ ءبىرى ءوزىممىن. ءومىردىڭ وزىندەي تابيعي اڭگىمە, حيكاياتتارى جۇرەككە جىلى ءتيىپ, ءدال سول جىلدارى ول ماعان قازاقتىڭ گايدارى بوپ كورىنەتىن. بۇل ويىم مەنى الداعان جوق, جاسوسپىرىمدەرگە ارناپ جازعان «كۇن ۇياسى», «العاشقى ساباق», «ساياق», «بوگەن اۋىل بالالارى» كىتاپتارى دەرەۋ تارالىپ كەتتى. اۋىلدىڭ قارا دومالاق بالالارىنىڭ مىنەز-قۇلقى, ارەكەتى, قيالعا تۇنعان ءورشىل ماقساتى سول كەزەڭدەگى جاس ۇرپاقتىڭ تۇلعاسىن قالىپتاستىرۋعا تىكەلەي اسەر ەتكەنى راس ەدى. جاقاۋدىڭ بۇل ورايداعى ىزدەنىسى ەش تولاستاعان ەمەس. بالعىن كەيىپكەرلەرى زامان تالابىنا ساي ءوسىپ-ءونىپ, نەبىر قىزىقتى قىلىقتارى كۇنى بۇگىنگە دەيىن شىنايىلىقپەن سۋرەتتەلە جالعاسۋدا. سونىڭ شاعىن ايعاعى – اۆتوردىڭ ء«تاتاي بالا جانە ونىڭ دوستارى» اتتى قيال-بايانى. تەحنولوگيانىڭ تىم شارىقتاپ كەتكەن بۇگىنگى جاعدايىندا ءبۇلدىرشىن سانا-سەزىمىنىڭ قالاي دامىپ, قاي باعىتتا ءوربيتىنى جازۋشى جاقاۋ داۋرەنبەكوۆتى قاتتى الاڭداتاتىنىن اڭعارامىز بۇل شىعارماسىنان. ءدال قازىرگى ۋاقىتتا ءتاتاي بالانىڭ بەينەسى جاس وقىرمانعا اسا قاجەتتى دەپ سانايمىن. قازاقتىڭ ۇل, قىزىن قاتقىلدىققا, جاساندىلىققا قۇرىلعان شەتەلدىك شىتىرمان شىرعالاڭىنان قۇتقارۋ قانشالىقتى قيىن دەسەك تە وعان توتەپ بەرۋدىڭ ءبىر امالى جاقاۋدىڭ ءتاتاي بالاسىن نەعۇرلىم كەڭىرەك ناسيحاتتاپ, بۇگىنگى ورتاعا ‘جان-جاقتى تانىستىرۋ بولسا كەرەك. بالدىرعاندارىمىزدىڭ ۇلتتىق سيپاتىن ساقتاپ, وي ءورىسىنىڭ شارىقتاۋىنا بۇكىل الەم جۇرتشىلىعى قۇلاپ-سۇرىنە جاقسى كورەتىن گارري پوتتەر ەمەس, ب.سوقپاقباەۆتىڭ قوجاسى, ج.داۋرەنبەكوۆتىڭ ءتاتاي بالاسى اسەر ەتۋىن ارماندايتىنىم دا سوندىقتان. بالا جانىن ءتۇسىنىپ, تەرەڭىنە بويلاي ءبىلۋى جاقاۋدىڭ كوپ قىرلى تالانتىنىڭ ءبىر عانا كورىنىسى. شىعارماشىلىق بەتاشارىن وسى تاقىرىپتان باستاعان جازۋشىنىڭ بالالار الەمىنە ءالى دە ادالدىق تانىتىپ كەلە جاتقانى قازاق ادەبيەتىنىڭ ورتاق يگىلىگى.
جاقاۋدىڭ پۋبليتسيستيكاسى جاستار گازەتىندە كۇن سايىن جاڭالىقتاي جاريالانىپ جارقىراپ كورىندى. وسى رەتتە قاي تاقىرىپقا قالامىن سالسا دا سونى سوقپاقپەن جۇرۋگە, فورمالىق ىزدەنىسكە بارۋعا, وزىندىك ءستيلدى ساقتاۋعا, وقشاۋ ويمەن تۇيىندەۋگە, جانرعا ءتان ەرەكشەلىككە كوركەمدىك ءنار بەرۋگە, توسىن تۇيىندەۋلەرگە بارۋعا, دەرەكتەردى وزىندىك ءسوز سارابىمەن سويلەتۋگە, ۇتىمدى سوزبەن ۇشقىر جازۋعا ۇمتىلىسى, جازۋداعى جۇلقىنىسى ءاربىر وچەركىندە, پۋبليتسيستيكالىق دۇنيەلەرىندە ايقىن كورىندى. وقىرمانعا وي تاستاپ قانا قويماي, نازارىن اۋدارتتى. جۋرناليستيكاداعى تانىمال دارا ەسىمگە اينالدى. وعان سول جىلداردا وتە سيرەك بەرىلەتىن جۋرناليستەر وداعىنىڭ سىيلىقتارىن الۋى, «شۇعىلالى شاق», «اۋىلىم – التىن بەسىگىم» پۋبليتسيستيكالىق كىتاپتارى كۋا. ونىڭ وسى ىزدەنىمپازدىعىن ء«سوز كيەسى» كىتابىنداعى پۋبليتسيستيكانىڭ تۇرلەرىمەن بايىتا جازعان (ويتولعاق, قاز-قالپىندا, سىر-سۇحبات, الىپتەمە, بايىمداما, جورگەمسوز, مارقايىس, سەركەسوز, مۇڭايىس, سيپاتتاما, لەبىز, ءداۋىر داۋاسى, ورايى كەلگەن اڭگىمە, عۇمىرناما, دابىلدى ويلار, اۋەزە, وچەرك, ءبىراۋىز ءسوز, ءويورىم) دۇنيەلەرى دارالاي تۇسەدى, ونداعى ءتىل, ستيل, فورما دەگەننىڭ نە ەكەنىن جاس جۋرناليستەر ۇلگى الارلىقتاي قالىپتا قازداي تىزىلۋىنەن قالامىنىڭ الىمى مەن قارىمى جارقىل سالىپ جاتقانداي. بۇل ماقتاۋ ءسوز ەمەس, باردىڭ ءمانىن اشىپ ناقتاۋ ءسوز, نىقتاۋ وي...
جاقاۋدىڭ جازۋ مەكتەبىنىڭ شەبەرلىگىن سەزىنۋ, پۋبليتسيستيكالىق پوتەنتسيالىن پايىمداۋ – وقىعان جاننىڭ ورەسىنە ءوزى-اق وي سالادى, بەلگىلى ءبىر بايىپقا ۇيىتادى, ۇلگى-ۋاجگە يلاندىرادى.
تاعدىر ءبارىمىزدى «لەنينشىل جاس» گازەتىنە توپتاستىردى. العاشقى كۇننەن-اق جيناقى, كەز كەلگەن تاپسىرماعا جاۋاپكەرشىلىكپەن قارايتىن ەرەكشەلىگىمەن باس رەداكتور سەيداحمەت بەردىقۇلوۆتىڭ سەنىمىنە كىرىپ ۇلگەردى. مەرەكەلىك گازەت نومىرلەرىنىڭ باسى-قاسىندا جاقاۋ جۇرەتىن. اسىرەسە ماكەت سىزۋدى, ماتەريالداردى ورنالاستىرىپ, ءتيىمدى ۇسىنۋدا الدىنا جان سالمايتىن. بۇعان قوسا بۇرقىراتىپ وچەرك, اڭگىمە, پروبلەمالىق ماقالالار جازادى. سونىڭ بارىنە قالاي ۇلگەرەدى ەكەن دەپ تاڭعالاتىنمىن. ەندى ويلاسام, قۇداي بەرگەن تالانتىنا ءوز-وزىنە تالاپ قويعىشتىعى, تارتىپكە تەمىردەي بەرىكتىگى, ادىلدىكتەن تايمايتىن تۋراشىلدىعى اينىماس سەرىك بولعانداي ەكەن.
نەسىن جاسىرايىن, كوڭىل-كۇيدىڭ سان قۇبىلار جاعدايىندا جۇرەتىن مەن ءۇشىن جاقاۋدىڭ نەندەي ماسەلەدە دە ايتقانىنان قايتپايتىنى, ەشقاشان جولدان تايمايتىنى, ءوز يدەياسىن جۇزەگە اسىرۋدا ەشكىمنەن تايسالمايتىنى پالەندەي ۇنامايتىن. قاي-قايسىمىزعا دا تاپسىرىلعان شارۋانىڭ قالايدا ورىندالۋىن قاداعالاپ, قىلتىڭ-سىلتىڭىمىزدى استە كوتەرمەيتىن. كۇن سايىن شىعاتىن گازەتتىڭ تالابىن جاقاۋداي تۇسىنبەيتىنىم راس ەدى.
ول ءۇشىن گازەتتىڭ ۇساق-تۇيەك شارۋاسىنا دەيىن ماڭىزدى بولاتىن. ازدى-كوپتى جازعان دۇنيەلەرىمنىڭ بۋىنا مارقايىپ, كەيدە ارتىقتاۋ كەتكەن ساتتەر دە ءوتتى. ال جاقاۋدىڭ توقمەيىلسىگەنىن كورگەن ەمەسپىن. ەرتەلى-كەش ماكەت سىزۋ, باسپاحاناعا جۇگىرۋ, وقىرمانى اسىعا كۇتەتىن شىعارمالارىن دا جاريالاپ, قايناعان جۇمىستىڭ ورتاسىندا جۇرگەنى.
جاقاۋ – ناقتىلى ءىس-ارەكەتتىڭ ادامى. سىرتتاي قاتالداۋ كورىنگەنىمەن جۇرەگى جۇمساق, نيەتى تازا, قايىرىمدى.
قالامداستارىنىڭ نە جازىپ, نە قويعانىنان ۇدايى حاباردار, اسىرەسە بۇيىعىلاۋ تىرلىك كەشىپ, كىتاپتارىن جارىققا شىعارا الماي قينالعان ارىپتەستەرىنە كومەكتەسۋگە ءاردايىم دايىن. زامانداستارىمنىڭ اراسىنان جاقاۋ داۋرەنبەكوۆتى ايرىقشا اتاۋىمنىڭ سەبەبى كوپ. ەڭ الدىمەن ونىڭ ادالدىعى, ادىلدىگى, قاي ورتادا جۇرسە دە جۇيەلى ءتارتىپ ورناتىپ, توڭىرەكتەگىلەردى جۇمىسقا ۇيىمداستىرا ءبىلۋى قايران قالدىرادى. بۇل كوبىمىزدىڭ قولىمىزدان كەلمەيدى. ەكىنشىدەن, جەكە باسىما جاقاۋدىڭ جاساعان جاقسىلىعىن ايتپاۋعا ءداتىم شىداتپايدى. قينالىپ, قىسىلعاندا اقىل-كەڭەسىمەن, ۇسىنىس, تىلەگىمەن دەمەيتىنىن بىلاي قويعاندا, كىتاپتارىمنىڭ تولىققاندى تۇڭعىش رەت جارىق كورۋىنە تىكەلەي ىقپال ەتتى. ءوزى باسقارىپ وتىرعان «انا ءتىلى» باسپاسى ارقىلى ەل, جۇرتقا تانىلدىم, ۇزاق جىلدار ەش جەردە شىعارا الماعان ء«جانتاسىلىم» اتتى رومانىمدى ەكى توم ەتىپ, قالىڭ جۇرتشىلىققا ۇسىندى. «ادام-قۇپيا» كىتابىمدى قالاي بەزەندىرىپ شىعاردى دەسەڭىزشى! مۇنى قالاي ۇمىتايىن. مەن سياقتى ونداعان, جۇزدەگەن اۆتور جاقاۋعا قارىزدار بولسا كەرەك.
جاقاۋدىڭ قىزمەتىنە, جۇمىس ىستەۋ تاسىلىنە قىزىعا قارايمىن. بوس سوزگە, جاداعاي ماقتاۋ, كولگىرسۋگە ونىڭ تيتتەي ۋاقىتى جوق. قاراماعىنداعىلارمەن, اۆتورلارمەن قارىم-قاتىناسىنان ەرىكسىز ۇلگى, ونەگە الاسىڭ. ىشكى مازاسىزدىعى, تياناقتىلىعى بىلايعىلاردىڭ ارقانى كەڭگە سالعان بەيقامدىعىن, دەرەۋ ىسىرىپ تاستاپ, بىردەن ماسەلەنىڭ بە, شارۋانىڭ با, ءتۇيىنىن شەشۋگە ىقپال ەتەدى. سوندىقتان جاقاۋمەن جۇمىس جاساۋ ۇلكەن عانيبەت.
ءبىر جولى ءساتى ءتۇسىپ, حالقىمىزدىڭ بەلگىلى اقىنى ءماريام حاكىمجانوۆانىڭ ءۇش تومدىق شىعارمالار جيناعى جاقاۋ باسقارىپ وتىرعان باسپادان جارىق كورۋگە ءتيىس بولدى. قۇراستىرۋعا ءوزىم نيەت ەتكەن كىتاپتاردىڭ قالاي تەز شىققانىن بايقاماي دا قالدىم. قىرۋار جۇمىستىڭ باس-اياعىنىڭ جىمداسىپ, ەكى تومنىڭ جىپ-جيناقى قولعا تيگەنى الدىمەن جاقاۋدىڭ ەرەك ەڭبەگى. جۇزدەگەن, مىڭداعان جازبا قاعازدار مۇراعاتتا ساقتالىپ, شاڭ باسقان قولجازبا اراسىنان بۇرىن جاريالانباعان دۇنيەلەرىن ىزدەيمىن دەپ, ۋاقىتتى ابدەن وزدىرعانىمدا, جاقاۋدىڭ ىمىراسىز قاتاڭ سىن, ەسكەرتپە جاساعانى دەرەۋ ەسىمدى جيعىزدى. سونشالىقتى سىرلاسىپ, رۋحاني جاقىن ارالاسقانىمىزبەن ناقتىلى ىسكە بايلانىستى ول ەشقاشان ايتقانىنان قايتپايدى. قارسىلاسۋعا تيتتەي مۇرشاڭدى كەلتىرمەيدى, ويتكەنى قويىپ وتىرعان تالابى ورىندى.
جاۋاپكەرشىلىك جۇگىن ءدال جاقاۋداي كوتەرەتىن جان ءسىرا دە سيرەك شىعار. قوعامنىڭ, ەلدىڭ, ۇكىمەتتىڭ بە, وقىرماننىڭ, وتباسىنىڭ با, ايتەۋىر كىم-كىمنىڭ دە الدىنداعى پارىزىن, قارىزىن ازاماتتىقپەن اتقارىپ كەلە جاتقانى اقيقات. جاقاۋ جۇرگەن جەردە قاشان دا تاپ-تازا, كيىمىنىڭ, ءتىپتى تاققان گالستۋگىنىڭ ءتۇر-تۇسىنە دەيىن جوعارى تالعامنان حابار بەرىپ, توڭىرەگىندەگىلەردى دە سوعان باۋلىعانداي اسەر ەتەدى. ونىڭ قاسىنداعىلار قالاي بولسا سولاي, القام-سالقام, بەي-بەرەكەت, تىرلىك كەشە الماسا كەرەك. ۇلكەندى دە, كىشىنى دە باعالاي وتىرىپ, تۇلعا رەتىندە ءوزى تۇيە بىلگەن قاعيداعا باعىندىرا بىلەتىنى كەز كەلگەننىڭ ورەسى جەتە بەرمەيتىن قاسيەت. جەكە باسىنىڭ قادىرىنە, قابىلەتىنە, كۇشىنە سەنەتىندەردىڭ عانا قولى جەتەر جايت قوي بۇل.
ءبىزدىڭ تولقىن وكىلدەرىنە ءتان ورتاق ەرەكشەلىك ەڭبەكقورلىق, جالتاقتاماۋ, ەشقاشان ەشكىمنىڭ الا ءجىبىن اتتاماۋ, قيانات جاساماۋ, الايدا تالانتىنا ساي اتاق, داڭق يەمدەنگەندەرى ساۋساقپەن سانارلىقتاي عانا. جالعان داقپىرت, داڭعازا قۋعان ءبىر دە ءبىرى جوق, ءبارى دە ۇزدىكسىز ىزدەنىس ۇستىندە. قالامدارىنىڭ قۋاتىمەن قاراپايىم عۇمىر كەشىپ, ۇلتىمىزدىڭ زيالى قاۋىمىن قۇراعان ءىرى تۇلعالار اراسىندا جاقاۋ داۋرەنبەكوۆ تە بار.
جۋرناليست, جازۋشى رەتىندە جاقاۋدىڭ وزىنە عانا ءتان قولتاڭباسى بولسا, باسپاگەر, باسشى رەتىندە جاقاۋ قالىپتاستىرعان دارا مەكتەپ بار. شۇكىر, سول سيرەك مەكتەپتىڭ يگىلىگىن كورىپ جاتقاندار ۋاقىت وتكەن سايىن كوبەيۋدە. مىنە, وتىز جىلدىق تاۋەلسىزدىگىمىزدە وتىز جىل بويى رۋحاني قازىنامىزدى ناسيحاتتاپ كەلە جاتقان, اتاپ وتكەلى وتىرعان وتىز جىلدىعىمىزبەن قۇرداس «انا ءتىلى» باسپاسىنىڭ اۆتورلارى قازىر تۇتاستاي ءبىر زيالى قاۋىمدى قۇرايدى. قازاق ءتىلىنىڭ ۋىزىنا قاندىرىپ, ادەبيەت, ونەر تىلسىمىنا بويلاتقان, تۋعان تاريح, مادەنيەتىمىزگە ءۇڭىلتىپ, ادەت-عۇرىپ, سالت-ءداستۇر, ىرىم-جورالعىلارىمىزدىڭ لوگيكالىق جەمىسىن تابۋعا باعىشتالعان دۇنيەلەردى جاقاۋ العاش شىعارا باستادى. قالامگەرلىك قۋاتىنا قايراتكەرلىك باتىلدىعى قوسىلىپ, وقىرماننىڭ وي-ءورىسىن كەڭەيتۋگە كول-كوسىر ىقپال ەتۋدە.
ول ۋاقىت تالابىن دا سەرگەكتىكپەن قابىلداۋعا بەيىم. قوعام مەن ادام سۇرانىسىن سوندىقتان دا ەش قينالماي ايىرىپ, انىقتاي الادى. بۇل جاقاۋدىڭ باسپاگەرلىك تۇلعاسىن ودان ارمەن بيىكتەتە تۇسكەندەي. حالىققا نە قاجەت, رۋحاني مۇقتاجىنىڭ قانداي ەكەنىن ول جاقسى بىلەدى. اۆتورلار اياسىن كەڭەيتىپ, تاقىرىپ تاڭداۋداعى تالعامپازدىعى دا ەل يگىلىگىنە اينالىپ جاتادى.
ءوز ۇلتىنا ادال ەڭبەك ەتىپ جۇرگەن جاقاۋدىڭ شىعارماشىلىق كوكجيەگى ارنايى تالداپ-زەرتتەۋدى قاجەت ەتەدى. جان دۇنيەسىنىڭ ىشكى بەيمازا, تىنىمسىزدىعى جازۋشىلىق كەلبەتىن ايقىنداپ, سونى جاڭالىق, وقىس تۇجىرىمدارعا جەتەلەۋدە. سوڭعى كەزدە باسىلىم بەتتەرىندە ۇزىك-ۇزىك جاريالانعان كوركەم وي-سۋرەتتەرى, كوزقاراس-پايىمدارى مۇلدەم وزگەشە, كەڭ تىنىستىڭ ناتيجەسى ىسپەتتەس. بۇل جاقاۋدىڭ ۇدايى ىزدەنىس ۇستىندە ەكەنىن دالەلدەيدى. قىسقا دا نۇسقا ءسوز مارجاندارىنىڭ بەرەرى مول, فيلوسوفيالىق استارى قالىڭ, تاربيەلىك ءمانى تەرەڭ, تاجىريبەلىك تاعىلىمى كول-كوسىر.
مۇنشالىق تەلەگەي-تەڭىز وي تاسقىنىنىڭ قوپارىلا اقتارىلۋىنا نە سەبەپ بولعانىن ءتۇسىندىرۋ, ارينە مۇمكىن ەمەس. جازۋشى جاقاۋدىڭ جان قويناۋىندا جاسىرىنعان جانارتاۋدىڭ الاپات كۇشىن ەندى-ەندى عانا بولجاعاندايمىز. تالانت بولمىسىنىڭ جارقىراي كورىنۋى, مىنە وسىندايدان باستالادى.
ءبىز ءبىر-ءبىرىمىزدىڭ تابىسىمىزعا ۇدايى قۋانىپ, اشىق پىكىرلەسۋدى ەجەلدەن داعدىعا اينالدىرعانبىز. گازەت, جۋرنالداردا اراگىدىك جاريالانار ماقالالارىمىزعا دەيىن تالداپ وتىرامىز. سوڭعى جىلدارى سان الۋان وزەكتى ماڭىزدى ماسەلەلەرگە قاتىستى باتىل دا وقىس ويلارىمەن جاقاۋ باسپاسوزدە ءجيى كورىنۋدە. بۇل دا ونىڭ بەلسەندىلىگىنىڭ, ازاماتتىق پوزيتسياسىن اشىق بىلدىرە الاتىنىن اڭعارتادى. كوز الدىڭدا ءوتىپ جاتقان جاعىمدى, جاعىمسىز وزگەرىستەرگە قايراتكەر رەتىندە ول بەيجاي قاراپ وتىرا المايدى. مەن ءۇشىن جاقاۋدىڭ وسى قالامگەرلىك قاسيەتى اسا قىمبات. ءوزىم كۇماندانار قايسىبىر جايتتارعا كاتىستى سىر بولىسكەنىمدە, ونىڭ كەسىپ ايتار پىكىرلەرى شەشۋشى ءمان اتقاراتىنى راس. جازعان-سىزعانىم تۋرالى جىلى سوزدەرى ءاردايىم مەرەيىمدى ءوسىرىپ, قاناتتاندىرىپ جىبەرەتىنىن دە ايتسام دەيمىن. جازۋ ءادىسىمىزدىڭ دۇنيەتانۋداعى كوزقاراسىمىزدىڭ, حال-جاعدايىمىزدىڭ مۇلدەم ۇقسامايتىنىنا قاراماستان, قاشان دا ءبىر باعىت, ءبىر ەندىكتە قاتار كەلە جاتقانى ارىپتەستەرمىز. اعارتۋشىلىق قىزمەتىمەن قۇبىلىس جاساعان بەلگىلى قالامگەر قۇرمانعازى قارامان ۇلى باستاپ, جان-جاقتى جاڭالىعىمەن وقىرمانىن تاڭعالدىرار جانات ەلشىبەكوۆ قوستاعان توپتىڭ ىشىندە جاقاۋدىڭ دا جۇلدىزى جارقىراي جانۋدا. وزىنە عانا ءتان قولتاڭباسى, مىنەزى, ءوزى عانا تاڭداپ باعىندىرعان كەڭىستىگى بار.
تاپتاۋرىن جولدى شيىرلاي بەرگەننەن ساقتاسىن ءبىزدى. جاقاۋ مۇنى اسقان نازىكتىكپەن تۇسىنەدى. قاي تاقىرىپقا قالام تەربەپ, قانداي ءىستى باستاسا دا شىنايىلىعىمەن, شەبەرلىگىمەن الدەقاشان ءوزىن مويىنداتىپ ۇلگەرگەن جاقاۋ داۋرەنبەكوۆ قالامىنىڭ قالىبى بار, قارىمىنىڭ ءوز كەڭىستىگى بار, ءوز ويى بار ورەلى ءسوز يەسى.
پەشەنەسىنە جازۋمەن تىرلىك كەشۋ جازعان قالامگەردىڭ جان مۇراتى دا وسى – سارابدال ءسوز يەسى بولا ءبىلۋ.
وسى ەسسەمدى اياقتاپ رەداكتسياعا ۇسىنار ءسات تۋعاندا جاقاۋدىڭ وزىنەن حابار كەلدى.
– ماعيرا! قۋانىشتى حابار, پرەزيدەنتىمىز قاسىم-جومارت كەمەل ۇلى توقاەۆتان قۇتتىقتاۋ حات الىپ, توبەم كوككە جەتىپ وتىر. مىڭ العىس پرەزيدەنتىمىزگە!
پرەزيدەنت ءوز حاتىندا حالىقتىڭ جاقاۋدى قازاق جۋرناليستيكاسىنىڭ كورنەكتى وكىلدەرىنىڭ ءبىرى, جازۋشى, سونداي-اق قوعام دامۋىنا بەلسەنە ارالاسىپ كەلە جاتقان ىسكەر ازامات رەتىندە بىلەتىنىن اتاپ وتكەن. زامانداسىمىزدىڭ تالعامى جوعارى وقىرماندارعا تاعىلىمدى دۇنيەلەر ۇسىنۋ ارقىلى رۋحاني سالانىڭ كەڭ قانات جايۋىنا قوسقان ۇلەسى مەن «انا ءتىلى» باسپاسىنا شيرەك عاسىر بويى باسشىلىق جاساعاندا پوليگرافيا ءىسىنىڭ وركەندەۋىنە زور ەڭبەك سىڭىرگەنىن ايتىپ, الداعى ۋاقىتتاعى باستامالارىنا ساتتىلىك تىلەپتى.
مەن دە تولقىپ كەتتىم.
بۇل ادىلەتتى ايقىن ماقسات تۇتقان, حالىق ءۇنىن تىڭداي بىلەر پرەزيدەنتىمىزدىڭ ۇلگى بولارلىق ىزگى ۇلىق قاسيەتى دەپ بىلەمىن!
بارەكەلدى!
قۋانىش كوپ بولسىن!
ماعيرا قوجاحمەتوۆا,
جازۋشى, قازاقستاننىڭ ەڭبەك سىڭىرگەن قايراتكەرى
