روبوتوتەحنيكا بويىنشا حالىقارالىق جارىسقا ۇسىنىلعان «RUD SMART MASK» جوباسى رەسپيراتورلىق ماسكا مەن قورشاعان ورتا اناليزاتورى فۋنكتسياسىن اتقارا الادى.
- ماسكا نەگىزگى ەكى بولىكتەن تۇرادى: ءبىرىنشىسى, اۋاداعى گازدى انىقتاۋعا ارنالعان تالداعىش پەن سيگنال بەرۋشى قۇرىلعى, ولار bluetooth-مودۋل ارقىلى اقپارات تاراتادى. ال ەكىنشى بولىگى سۇزگى ەسەبىندە قولدانۋعا بولاتىن ماسكا, ول اعزامىزدى لاستانعان اۋا مەن ۆيرۋستان قورعايدى. تۇتىنۋشىعا ىڭعايلى بولۋ ءۇشىن ەكى كومپونەنت ءوزارا نەوديم ماگنيتىمەن جالعانىپ تۇر, - دەيدى ونەرتاپقىش وقۋشى.
ماسكا قازىرگى ۋاقىتتا كوپتىڭ قاجەتتىلىگىنە اينالعاندىقتان, ونىڭ ساپاسى ءارى قايتا پايدالانۋ مۇمكىندىگى اسا ماڭىزدى. وسى تۇرعىدا جاس ونەرتاپقىش «اقىلدى ماسكانى» تازالاۋعا ارنالعان RUD STAND قۇرىلعىسىن دا جاساعان.
- ماسكا ءفيلترى ۋلترامەدكول, سپانبوند, بەلسەندىرىلگەن كومىر قوسىلعان ماتا جانە اكريلدەن جاسالدى, ال بۇل اپپارات ونى ارنايى ۋلتراكۇلگىن ساۋلەلەر كومەگىمەن بىرنەشە مينۋت ىشىندە زالالسىزداندىرادى. ناتيجەسىندە ماسكا قاۋىپسىزدىكتى قامتاماسىز ەتەدى, - دەيدى اقتوبەلىك زياتكەر.
ش.ءۋاليحانوۆ مەكتەبى ۇيىمداستىرعان حالىقارالىق جارىسقا رەسەي مەن وزبەكستان, تۇركيا مەملەكەتتەرىنەن دە جوبالار ۇسىنىلدى. الەمدەگى كورونوۆيرۋستىق پاندەمياعا بايلانىستى بايقاۋ ونلاين فورماتتا ءوتتى.
