ەكى ۇجىم اراسىنداعى العاشقى ويىن وتكەن جىلدىڭ قازانىندا نۇر-سۇلتاندا ءوتىپ, سول باسەكەدە قوناقتار «بارىستى» 5:4 ناتيجەسىمەن وۆەرتايمدا قاپى قالدىرعان بولاتىن. حەلسينكيگە ەلورداداعى كەتكەن ەسەنى قايتارۋعا بارعان جەرلەستەرىمىز ءوز دەگەندەرىنە جەتتى. ءبىرىنشى كەزەڭدە كوماندالار ءبىر-ءبىرىنىڭ قاقپا كىلتىن ۇزاق ۋاقىت تابا المادى. دەسەك تە 19-مينۋتتا «بارىستىڭ» كانادالىق لەگيونەرى فيليپ ۆارونە ەسەپ اشتى. ۇزىلىستەن كەيىن دە ەكى جاق ءبىراز تىرەسكەنىمەن, شايبا سوعا المادى.
ءۇشىنشى كەزەڭدە ايدىن يەلەرىنەن الەكس گرانت (42-مينۋت) ەسەپتى تەڭەستىرۋگە مۇمكىندىك العانىمەن, بۇل شايبا «يوكەريتتىڭ» وسى ويىنداعى العاشقى جانە سوڭعى گولى بولدى. تەڭ ەسەپتى قاناعات تۇتپاعان جەرلەستەرىمىز قارقىنىن ودان ءارى كۇشەيتتى. ناتيجەسىندە, 51 جانە 56-مينۋتتاردا كيورتيس ۆولك قارسىلاستىڭ قاقپاسىن ەكى مارتە ءدال كوزدەسە, 59-مينۋتتا انتون ساگادەەۆ كەزدەسۋدىڭ نۇكتەسىن قويدى. وسىلايشا, «بارىس» سىرت ايدىندا «يوكەريت» ۇجىمىنان ەسە قايتارىپ, 4:1 ەسەبىمەن جەڭىسكە جەتتى. ەلوردا كومانداسى كەلەسى كەزدەسۋىن بۇگىن ماسكەۋدە «دينامو» كلۋبىمەن وتكىزەدى.
