پورتۋگاليا پرەمەر-ءمينيسترى انتونيو كوستامەن كەزدەسۋدەن كەيىن وتكەن ءباسپاسوز كونفەرەنتسياسىندا: «ۆاكتسيناتسيا تۋرالى تولقۇجاتتىڭ بولۋى مىندەتتى. بۇل مەديتسينالىق قاجەتتىلىك», - دەدى ەۋروپالىق كوميسسيانىڭ باسشىسى. ۋرسۋلا فون دەر لەيەننىڭ پىكىرىنشە, پىكىرسايىستا مۇنداي قۇجاتتى ەنگىزۋ ادامنىڭ قانداي قۇقىقتارىنا اسەر ەتۋى مۇمكىن ەكەنىن تالقىلاۋى كەرەك. ەو-عا مۇشە بىرنەشە مەملەكەت قازىردىڭ وزىندە مۇنداي «ۆاكتسيناتسيا تولقۇجاتى» ديسكريميناتسيانىڭ كوزى بولۋى مۇمكىن دەپ ەسكەرتتى, ويتكەنى بۇل يەلەرىنە بۇكىل ەۋروپا بويىنشا ەركىن ساياحاتتاۋعا مۇمكىندىك بەرەدى, ال ۆاكتسيناتسيا كەزەگىن كۇتكەن باسقالارى دا مۇنداي قۇقىققا يە بولمايدى.
سونىمەن بىرگە, وداقتىڭ كەيبىر مەملەكەتتەرى ءتۋريزمدى قالپىنا كەلتىرۋ جانە پاندەميا كەزىندە ەلدەر اراسىنداعى ساياحاتشىلاردىڭ قوزعالىسىن جەڭىلدەتۋ ماقساتىندا وسى جوبانى العا تارتۋدا.
ء«ادىل تەپە-تەڭدىكتى تابۋ ارقاشان ماڭىزدى. مىسالى, ءسىز سەرتيفيكاتتى كوروناۆيرۋسقا - ۆاكتسيناعا ءالى قول جەتكىزە الماعان ادامدارعا ارنالعان تەستتىڭ تەرىس ناتيجەسىمەن بىرىكتىرە الاسىز », - دەپ ۇسىندى ۋ.لەيەن ەۋروپالىق دەڭگەيدەگى كەلىسىمدەرگە شاقىرا وتىرىپ.
21 قاڭتاردا ەو ۇكىمەت باسشىلارى كوروناۆيرۋستىق داعدارىسقا بايلانىستى ۆاكتسينالار مەن ۆاكتسيناتسيا تولقۇجاتىن قۇرۋ مۇمكىندىكتەرىن تالقىلاۋ ءۇشىن بەينەكونفەرەنتسيا ارقىلى كەزدەسەدى.
بۇعان دەيىن دۇنيەجۇزىلىك دەنساۋلىق ساقتاۋ ۇيىمى (ددسۇ) COVID ۆاكتسيناسى بار ساياحاتشىلارعا پاسپورت ەنگىزۋدى ۇسىنباعان, دەلىنگەن ۇيىمنىڭ رەسمي سايتىندا جاريالانعان حابارلامادا.
«ۆاكتسينالاردىڭ بەرىلۋدى ازايتۋعا اسەرى ءالى بەلگىسىز ەكەنىن جانە ۆاكتسينالارعا قول جەتىمدىلىكتىڭ قازىرگى ۋاقىتتا شەكتەۋلى ەكەندىگىن ەسكەرە وتىرىپ, كوميتەت ەلدەرگە كەلگەن ساياحاتشىلاردان ۆاكتسيناتسيا تۋرالى دالەلدەمە تالاپ ەتپەۋگە كەڭەس بەرەدى», - دەدى ددۇ توتەنشە جاعدايلار كوميتەتى.
وندا سونىمەن قاتار, كوميتەت «ەلدەردى جولاۋشىلاردىڭ قاۋىپسىز ساياحاتىن قامتاماسىز ەتۋ ءۇشىن ۇيلەستىرىلگەن جانە عىلىمي نەگىزدەلگەن شارالاردى قابىلداۋعا شاقىردى جانە ددۇ-عا وتكەن ساباقتارى مەن وزىق تاجىريبەلەرى تۋرالى ەسەپ بەردى» دەلىنگەن.
