قالا اكىمى ب. ساعىنتاەۆ ءوزىنىڭ Instagram-داعى اككاۋنتىندا جول ايرىقتارى, ەلەكتر پودستانتسيالارى مەن سۋ قابىلدايتىن ستانتسيالاردى سالۋ بويىنشا جۇمىستاردىڭ بارىسىن تەكسەرگەنى تۋرالى جازا كەلە: «سەيفۋللين داڭعىلى مەن جانسۇگىروۆ كوشەسىندەگى جولايرىقتىڭ قۇرىلىسى جالعاسۋدا. بيىل مۇندا كولىك قوزعالىسىن اشۋ ءۇشىن ءتيىستى شارالاردى قولعا الۋدى تاپسىردىم. وسىلايشا سەيفۋللين داڭعىلىنىڭ كولىك وتكىزۋ قابىلەتى 15-20%-عا, جانسۇگىروۆ كوشەسىندە 10-15%-عا وسەدى», – دەءدى.
اكىمنىڭ مالىمەتى بويىنشا بوستاندىق اۋدانىندا 110 كۆ-تىق «الماگۇل» قوسالقى ستانساسى سالىنۋدا. ول قالانىڭ وڭتۇستىك بولىگىندە سالىنىپ جاتقان جاڭا تۇرعىن ءۇي كەشەندەرىنە قاجەت قوسىمشا 100 مۆت ەلەكتر ەنەرگياسىمەن قامتاماسىز ەتۋگە مۇمكىندىك بەرەدى. بۇل شامامەن 200 مىڭ تۇتىنۋشى.
بۇدان وزگە «حان ءتاڭىرى» ىقشاماۋدانىندا بوي كوتەرىپ جاتقان 110 كۆ-تىق تاعى ءبىر قوسالقى ستانسا ەسكىرگەن جەلىلەردى اۋىستىرۋعا مۇمكىندىك بەرىپ قانا قويماي, ەلەكتر ەنەرگياسىنا 64 مۆت ءوسىم بەرەدى. «الاتاۋ», «نۇرلىتاۋ», «ەرمەنساي», «جايلاۋ» ىقشاماۋداندارىن ەنەرگيامەن قامتاماسىز ەتۋ جاعى جاقسارادى. بۇل قوسىلعان اۋماقتاردىڭ شامامەن 250 مىڭ تۇتىنۋشىسىن قامتيدى.
«ناۋرىزباي اۋدانىنىڭ 50 مىڭعا جۋىق تۇرعىنىن ساپالى اۋىز سۋمەن قامتاماسىز ەتۋ ءۇشىن «قارعالى» سۋ تارتۋ جانە سۇزگى ستانسالارىنىڭ قۇرىلىسى ءجۇرىپ جاتىر. بيىل بۇل ستانسانى ءتورت ىقشاماۋدانمەن بايلانىستىراتىن ماگيسترالدىق جەلىلەردىڭ قۇرىلىسى باستالادى», – دەپ اتاپ ءوتتى الماتى اكىمى ب. ساعىنتاەۆ.
